ކޯލިޝަން ސަރުކާރާއެކު އެމްޑީޕީގެ އެޖެންޑާ ހިންގުމަށް ހުރަސްތަކެއް ކުރިމަތިވޭ: އާޒިމް

ކޯލިޝަން ސަރުކާރާއެކު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ އެޖެންޑާ ހިންގުމަށް ހުރަސްތަކެއް ކުރިމަތިވާ ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި އެޕާޓީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެއެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި އާޒިމް ވިދާޅުވީ ވެރިކަން ކޯލިޝަންއާއެކު ކުރިމަތިލައި ކާމިޔާބު ކުރެވުނު ކަމުގައިވީ ނަމަވެސް ރައްޔިތުން މަޖިލީހަށް އެމްޑީޕީން ކުރިމަތިލީ ކޯލިޝަންގެ ތެރެއިން ނޫން ކަމަށެވެ. ރައްޔިތުން އެމްޑީޕީއަށް މަޖިލީހުގެ ސުޕަރ މެޖޯރިޓީ ދިނީ ވަރަށް ބޮޑު އިތުބާރަކާއެކު ކަމަށް އާޒިމް ވިދާޅުވިއެވެ.

އެގޮތުން ރައްޔިތުންނަށް އަމާން އަރާމު ދިރިއުޅުމެއް ހޯދައިދިނުމަށްޓަކައި، އެޖެންޑާ-19ން ގިނަ ވައުދުތަކެއް ވެފައިވާ ކަމަށް އާޒިމް ވިދާޅުވިއެވެ. އާޒިމް ވިދާޅުވީ އެޖެންޑާ-19ގެ ވައުދުތައް ފުއްދުމުގެ ގޮތުން ގާނުނުތަކެއް ހަދާފައިވާ ކަމަށާއި، ރައްޔިތުންނަށް ގިނަ ކަންކަން ފަހިކޮށްދިނުމަށް ކުރަން ޖެހޭ މަސައްކަތްތައް ކުރަމުންދާ ކަމަށެވެ. އަދި އެޖެންޑާ-19ން ތަންފީޒުކުރުމަށް ކަނޑައެޅި ގާނޫނުތަކުގެ ތެރެއިން 80 އިންސައްތަ މަސައްކަތް ނިމިފައިވާ ކަމަށް އާޒިމް ވިދާޅުވިއެވެ. ނަމަވެސް ކޯލިޝަންއާއެކު އެމްޑީޕީގެ އެޖެންޑާ ހިންގުމަށް ހުރަސްތަކެއް ކުރިމަތިވާ ކަމަށް އާޒިމް ވިދާޅުވިއެވެ.

ކާމިޔާބު މަޖިލީހެއްކަމަށް ސިފަކުރައްވައި އާޒިމް ވިދާޅުވީ ރައްޔިތުންނަށްވީ ވައުދުތަކަށް ބަލާއިރު ވަރަށް ގިނަ ކަންތައްތަކެއް ހާސިލްކުރެވިފައިވާ ކަމަށެވެ. ނަމަވެސް އާއްމުންގެ ތެރޭގައި ހިޔާލު ތަފާތު ކަމަށާއި، ހައްލު ކުރަންޖެހޭ ކަންކަން ހައްލު ކުރުމަކީ ވެސް މަޖިލީހުން ކުރަން ޖެހޭ ކަމެއް ކަމަށް ބައެއް އާއްމުން ދެކޭ ކަމަށެވެ. އަދި މިފަހަރުގެ ރައްޔިތުންގެ މަޖިލީހަކީ ތަފާތު މަޖިލީހެއް ކަމަށްވާއިރު، މަޖިލީހުގެ ރައީސްއަކަށް ކުރީގެ ރައީސް ހުންނެވުމަކީ ވެސް މިފަދަ މޭރުމަކުން އާއްމުން ބަލާނެ ސަބަބެއްކަމަށް އާޒިމް ވިދާޅުވިއެވެ.