ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހުއާއި ރައްޔިތުން މަޖިލީހުގެ ރައީސް، ރައީސް މުހައްމަދު ނަޝީދުގެ ހިޔާލު ތަފާތުވުން އަންނަ ވަގުތުތައް ވަރަށް ގިނަ ކަމަށް ރައްޔިތުންގެ މަޖިލީހުގެ މެދު ހެންވޭރު ދާއިރާގެ މެމްބަރު އަދި މޯލްޑިވިއަން ޑިމޮކްރެޓިކް ޕާޓީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް ވިދާޅުވެއްޖެއެވެ.
ރާއްޖެޓީވީގެ ފަލަސުރުހީ ޕްރޮގްރާމްގައި މެމްބަރު އާޒިމް ވިދާޅުވީ މިވަގުތު ޕީޖީ ލީޑަރުގެ މަގާމުގެ ހައިސިއްޔަތު ބޮޑަށް މަސައްކަތް ކުރަނީ ހިޔާލުތަފާތުވުންތައް އެއްގޮތް ކުރުމަށް ކަމަށާއި، މިހާރު އޮތް ނުތަނަވަސްކަން ނައްތާލުމަށް ކަމަށެވެ. ސިޔާސީ ކަންކަމުގައި ނުތަނަވަސްކަން އަންނާނެކަން ފާހަގަކުރައްވައި އާޒިމް ވިދާޅުވީ މިފަހަރު ތަންކޮޅެއް ބޮޑަށް ނުތަނަވަސްކަން އަންނަމުންދާ ކަމަށެވެ. އަދި މިވަގުތު އޭނާ ހުންނެވީ ދެ ވެރިންގެ ދެމެދުގައި ހުއްޓިފައި ކަމަށެވެ. އާޒިމް ވިދާޅުވީ ބައެއް ކަންކަމުގައި ރައީސް ސޯލިހުއަށް ދަންނަވާ މަޝްވަރާ ހޯދަން ޖެހޭ ކަމަށާއި، އަނެއް ބައިކަންކަމުގައި މަޖިލީހުގެ ރައީސް ނަޝީދުގެ މަޝްވަރާއާއި ހިޔާލު ހޯދަން ޖެހޭ ކަމަށެވެ. އަދި ދެބޭފުޅުންގެ ހިޔާލު ތަފާތުވުން އަންނަ ވަގުތު މަދެއް ނޫންކަން އާޒިމް ފާހަގަކުރެއްވިއެވެ.
މެދުގޮތް ހާމަކުރަން ލިބޭ ވަގުތު އެބައާދޭ. މެދު ގޮތް އިހުތިޔާރުކުރަން ލިބޭ ވަގުތު އެބަ އާދޭ. އަޅުގަނޑު އެބަޖެހޭ ރައީސުލްޖުމްހޫރިއްޔާއަށް ބައެއްކަންކަމުގައި ދަންނަވާ މަޝްވަރާ ހޯދަން. އަދި އަޅުގަނޑު އެބަޖެހޭ ރައްޔިތުން މަޖިލީހުގެ ރައީސް އަދި ޕާޓީގެ ރައީސް މަޝްވަރާ ހޯދާ ކަންކަން ކުރިއަށް ގެންދާނީ ކިހިނެތްތޯ އޮޅުން ފިލުވަން. ދެބޭފުޅުންގެ ހިޔާލު ތަފާތުވުން އަންނަ ވަގުތު މަދެއް ނޫން. ދުވަހަކަށް ވުރެ ދުވަހެއް ދަނީ އިތުރުވަމުން. އަޅުގަނޑަށް އެކަން އެންމެ ސާފުކޮށް ފެންނާނެ އެކަކު މިއީ. އެހެންވީމަ އެދޭތެރޭގައި ފިތިފައިތޯ ކޮޅަށްތޯ އަރިއަށްތޯ ބަލާކަށް ނުޖެހޭނެ. އަޅުގަނޑު އަބަދު ވެސް ނަގާނީ މިރާއްޖެއަށް މިގައުމަށް މިރައްޔިތުންނަށް އެންމެ ފައިދާ ހުރި ގޮތަކީ ބަލާފައި އެގޮތެއް އެނގޭތޯ. އެހެންވީމަ އެގޮތަށް މަސައްކަތް ކުރާއިރެއްގަ އެހެންވީމަ އެހެންމީހަކު ބޭނުންވާ ގޮތަށް ނުކުރީމަ ފަހަރުގައި ބުނެފާނެ އެގޮތަށް.މެދު ހެންވޭރު ދާއިރާގެ މެމްބަރު އަދި މޯލްޑިވިއަން ޑިމޮކްރެޓިކް ޕާޓީގެ ޕާލިމެންޓްރީ ގްރޫޕްގެ ލީޑަރު އަލީ އާޒިމް
ޕީޖީގެ ލީޑަރަކަށް ހުންނެވުމަކީ ވަރަށް ދަތި އުދަނގޫކަމެއްކަން ފާހަގަކުރައްވައި އާޒިމް ވިދާޅުވީ ރައްޔިތުން މަޖިލީހުގެ ސުޕަރ މެޖޯރިޓީއާއެކު ބޭނުން ކަމެއް ކޮށްލެވޭނެ ކަމަށާއި، ގާނޫނު އަސާސީ ވެސް ބަދަލުކުރަން ބޭނުންވާނަމަ އެކަން ވެސް ކުރެވޭނެ ކަމަށެވެ. ނަމަވެސް ގައުމަށް އެންމެ ފައިދާ ހުރީ ކޮން ގޮތެއްތޯ ބަލަން ޖެހޭ ކަމަށް އާޒިމް ވިދާޅުވިއެވެ. އާޒިމް ވިދާޅުވީ ބޭނުންވާ ކަމެއް ނުވާ ކޮންމެ ފަހަރަކު މެމްބަރުންނަކީ ފިނޑިން ކަމަށް ދެކި، ނުވަތަ ކަމެއް ކާމިޔާބުވުމުން ވަރަށް ގަދަ ބައެއް ކަމަށް ސިފަކުރުމަކީ ވެސް ދުނިޔޭގެ އާދައެއް ކަމަށެވެ. އަދި ޖަޒުބާތުގައި ޖެހިގެން ކަންކަން ކުރާނަމަ ވަރަށް ގިނަ ނުތަވަސްކަން ކުރިމަތިވާނެކަމަށް އާޒިމް ވިދާޅުވިއެވެ.
އާޒިމް ވިދާޅުވީ ސިޔާސީ ކަންކަން ކުރިއަށް ގެންދެވޭނީ މަޝްވަރާގެ ތެރެއިން ކަމަށާއި، ފަހަތަށް ޖެހެން ޖެހޭ ހަލަތްތަކުގައި ފަހަތަށް ޖެހެންޖެހޭ ކަމަށެވެ. އަދި އެއަށްފަހު ދެން ކުރިއަށްދެވޭނެ ގޮތަކާއި މެދު ވިސްނާއި މަޝްވަރާ ކުރުމަކީ އެންމެ ބުއްދިވެރި ގޮތްކަމަށް އާޒިމް ވިދާޅުވިއެވެ.
