ފުރަތަމަ ދުވަހުވެސް އިންޑިއާއިން 7 ފްލައިޓް
އިންޑިގޯ 02 ފްލައިޓް އަދި ގޯ އެއަރގެ 03 ފްލައިޓް ވަނީ ރާއްޖެ އައިސްފައި
އެއަރ އިންޑިއާގެ ފްލައިޓެއް ވެލާނާ އިންޓަރނޭޝަނަލް އެއަރޕޯޓްގައި
ދެކުނު އޭޝިއާގެ ކޮވިޑް-19ގެ ހާލަތު ގޯސްވެ، އެސަރަހައްދުގެ ގައުމުތަކުން ފަތުރުވެރިން އައުން މަނާކޮށްފައި އޮތުމަށްފަހު އަލުން ހުޅުވާލުމާއެކު ފުަރަތަމަ ދުވަހުވެސް އިިންޑިއާއިން 7 ފްލައިޓެއް މިވަނީ ރާއްޖެ އައިސްފައެވެ.
އިންޑިއާ އަކީ ކޮވިޑް-19ގެ ސަބަބުން ރާއްޖޭގެ ބޯޑަރު ބަންދުކޮށްފައި އޮތުމަށްފަހު އަލުން ހުޅުވާލިފަހުން އެންމެ ގިނަ އަދަދެއްގެ ފަތުރުވެރިން ރާއްޖެ އައި ގައުމެވެ. އެގޮތުން ދެކުނު އޭޝިއާގެ ފަތުރުވެރިންނަށް ރާއްޖޭގޭ ބޯޑަރު ބަންދުކުރުމުގެ ކުރިން އެގައުމުން 62,000ށް ވުރެ ގިނަ ފަތުރުވެރިން ވަނީ ރާއްޖެ އައިސްފައެވެ.
އޭގެ އިތުރުން އިންޑިއާގެ 2 އެއަރލައިނަކުން މިހާރު މިވަނީ އަނެއްކާ އަލުން ރާއްޖެއަށް ދަތުރުކުރަން ފަށާފައެވެ. އެގޮތުން ބޯޑަރު ހުޅުވާލުމާއެކު ޖުލައި 15 ވަނަ ދުވަހު ރާއްޖެ އައި 7 ފްލައިޓްގެ ތެރޭގައި ހިމެނެނެނީ މޯލްޑިވިއަންގެ 2 ފްލައިޓްގެ އިތުރުން އިންޑިގޯ 02 ފްލައިޓް އަދި ގޯ އެއަރގެ 03 ފްލައިޓެވެ. އަދި އެއަރ އިންޑިއާގެ ފްލައިޓްތައް މިމަހުގެ ފަހުކޮޅު ފަށާނެ ކަމަށް ލަފާކުރެވޭ ކަމަށް މޯލްޑިވްސް މޯލްޑިވްސް އެއަރޕޯޓްސް ކޮމްޕެނީ ލިމިޓެޑް (އެމްއޭސީއެލް)ގެ ޖެނެރަލް މެނޭޖަރ ކޯޕަރޭޓް އެފެއަރޒް ހަސަން އަރީފް ވިދާޅުވިއެވެ.
ދެކެނު އޭޝިއާގެ ފަތުރުވެރިންނަށް ރާއްޖެ އައުމުގެ ހުއްދަ ދީފައި މިވަނީ ހާއްސަ އުސޫލެއްގެ ދަށުންނެވެ. އެސަރަހައްދުން ރާއްޖެ އަންނަ ފަތުރުވެރިންނަށް ހަމައެކަނި ރިސޯޓުތަކަށް ދިއުމުގެ ހުއްދަ ދިނުމަށް ނިންމާފައިވާއިރު، ގެސްޓް ހައުސްތަކަށް ދިއުމުގެ ހުއްދަ ލިބިގެންދާނީ ޖުލައި 30ން ފެށިގެންނެވެ. އޭގެއިތުރުން ދެކުނު އޭޝިއާގެ ޤައުމުތަކުން އަންނަ ފަތުރުވެރިންނަށް ޓްރާންސިޓް ކުރެވޭނީ ޓޫރިޒަމް މިނިސްޓްރީން ކަނޑައަޅާ ގެސްޓް ހައުސްތަކުގައި އެކަނި ކަމަށް ހެލްތް ޕްރޮޓެކްޝަން އެޖެންސީ ވަނީ ބުނެފައެވެ.
އެގޮތުން އެޗްޕީއޭ އިން ވަކި ގޮތެއް އަންގަންދެން މީހުން ދިރިއުޅޭ ރަށްރަށާއި އެ ރަށްރަށުގައި ހުންނަ ގެސްޓް ހައުސްތަކަށް ފަތުރުވެރިންނަށް ޗެކްއިން ނުވެވޭނެ ކަމަށާއި، މާލޭގައި ފަތުރުވެރިން ފުރުމަށްޓަކައި ޓްރާންސިޓް ކުރުމަށް ޓޫރިޒަމް މިނިސްޓްރީން ކަނޑައަޅާ އުސޫލުގެ މަތިން އެ މިނިސްޓްރީން ކަނޑައަޅާފައިވާ ގެސްޓް ހައުސްތަކުގައި ތިބެވޭނެ ކަމަށް ވަނީ ބުނެފައެވެ.
