އޮޅުވާލައިގެން ދެކުނު އޭޝިއާގެ ފަތުރުވެރިންނަށް ޚިދުމަތް ދިން މައްސަލަ ގެސްޓް ހައުސް އެސޯސިއޭޝަނުން ކުށްވެރިކޮށްފި

އޮޅުވާލައިގެން ދެކުނު އޭޝިއާގެ ފަތުރުވެރިންނަށް ހިދުމަތް ދިން މައްސަލަ ގެސްޓް ހައުސް އެސޯސިއޭޝަނުން ކުށްވެރިކޮށް ޓުއަރިޒަމް މިނިސްޓްރީން އަޅާފައިވާ ފިޔަވަޅުތަކަށް އެ އެސޯސިއޭޝަންއިން މަރުހަބާ ކިޔައިފިއެވެ.

ދެކުނު އޭޝިއާގެ ފަތުރުވެރިންނަށް ގަވާއިދާ ހިލާފަށް ޚިދުމަތް ދިން މައްސަލައާއި ގުޅިގެން ގެސްޓްހައުސް އެސޯސިއޭޝަނުން ނެރުނު ނޫސްބަޔާނުގައި ބުނެފައިވަނީ ދިވެހިރާއްޖޭގައި ކޮވިޑު-19ގެ ހާލަތުން އަރައިގަތުމަށްޓަކައި ސަރުކާރާއި ގެސްޓްހައުސް އެސޯސިއޭޝަން އޮފް މޯލްޑިވްސް ގުޅިގެން ނުހަނު ގިނަ މަސައްކަތްކޮށް، ސައުތު އޭޝިއާގެ ގެސްޓުން ގެނައުމުގެ ހުއްދަ 30 ޖުލައި 2021 އިން ފެށިގެން ދޭން ނިންމާފައިވާ ކަމަށެވެ.

އަދި އެކަން އިއުލާންކޮށްފައި ވަނިކޮށް 15 ޖުލައި ގައި ދިވެހިރާއްޖެ އަށް ޒިޔާރާތް ކުރި ސައުތު އޭޝިއާގެ ފަތުރުވެރިން ތަކެއް (މާލެ، ހުޅުމާލެ، ވިލިމާލެ) ގައި ހުއްދަ ދެވިފައިވާ ގެސްޓްހައުސް ތަކުގައި ތިބި ކަމަށް މިނިސްޓްރީ އޮފް ޓޫރިޒަމް އާއި އެޗްޕީއޭ ގުޅިގެން ކޮވިޑުގެ ގައިޑްލައިންއަށް އަމަލު ކުރޭތޯ ބެލުމަށްޓަކައި ހިންގުނު އިންސްޕެކްޝަންއަށް ފަހު އޮޅުވާލައިގެން ދެކުނު އޭޝިއާގެ ފަތުރުވެރިންނަށް ޚިދުމަތް ދެމުންދިޔަކަން ފާހަގަ ކުރެވިގެން މާލެ ސަރަހައްދުގެ ތިން ގެސްޓްހައުސްއެއްގެ ހުއްދަ ޓޫރިޒަމް މިނިސްޓްރީން ވަނީ ހިފަހައްޓާފައި ކަމަށެވެ.

ދެކުނު އޭޝިއާގެ ފަތުރުވެރިން ގެސްޓްހައުސް ތަކަށް ގެނައުމުގައި އަމަލު ކުރުމަށް އެޗްޕީއޭއިން ކަނޑައަޅާފައިވާ އޮންނަ އުސޫލާއި ޚިލާފުވެ ބައެއް ގެސްޓް ހައުސްތަކުން މި ހިންގި އަމަލު ގެސްޓް ހައުސް އެސޯސިއޭޝަން އޮފް މޯލްޑިވްސް އިން ކުށްވެރިކުރާ ކަމަށް އެ އެސޯސިއޭޝަނުން ބުނެއެވެ. އަދި މިނިސްޓްރީ އޮފް ޓޫރިޒަމުން އަޅާފައިވާ މި ފިޔަވަޅުތަކަށް އެސޯސިއޭޝަނުން މަރުހަބާ ކިޔާ ކަމަށް ބުނެފައިވެއެވެ.

އަދި މި ދަނޑިވަޅުގައި ފަތުރުވެރިން ގެސްޓް ހައުސްތަކަށް ގެނައުމުގައި އެޗްޕީއޭގެ ގައިޑްލައިންއާއި އެއްގޮތަށް އަމަލު ކޮށްގެން މެނުވީ ކޮވިޑް-19ގެ ހާލަތުން އަރައި ނުގަނެވޭނެ ކަމަށް އެސޯސިއޭޝަނުން ވަނީ ބުނެފައެވެ. ކުރިޔަށް އޮތް ދުވަސް ތަކުގައިވެސް އެއްވެސް ގެސްޓް ހައުސްއަކުން ގެސްޓުން ގެނެސް ގެސްޓް ހައުސް ހިންގުމުގެ ހުއްދަ ނެތް ތަންތަނުގައި ފަތުރުވެރިން ނުބޭތިއްބުމަށް ނަސޭހަތްތެރިވެފައިވެއެވެ.

އެ އެސޯސިއޭޝަނުން ވަނީ އެއްވެސް ގެސްޓް ހައުސް އަކުން އެޗްޕީއޭގެ ގައިޑްލައިނާއި ޚިލާފަށް އެއްވެސް އަމަލެއް ނުކުރުމަށް އިލްތިމާސްކޮށްފައެވެ. އަދި ހުރިހާ ގެސްޓް ހައުސްތަކުންވެސް މި ދަތި ދަނޑިވަޅުގައި ކެތްތެރިވެގެން ތިބުމަށާއި ހުރިހާ މުވައްޒަފުންނަށް ވެސް ވެކްސިން ފުރިހަމަ ކުރުމަށް ބާރު އަޅާފައިވެއެވެ.