މިގައުމުގެ މިނިވަންކަމާއި ސިޔާދަތާއި އަމިއްލަ ވެރިކަން މިވަނީ މުޅި ދުނިޔެއިން ބަލައިގެންފައި- މިނިސްޓަރ
15 ޖުލައި 2021 | ބުރާސްފަތި 10:52ފޮރިން މިނިސްޓްރީ ޢިމާރާތުގެ ނަން ފަތުޙުﷲ ޖަމީލް ބިލްޑިންގެ ނަމަށް ވަނީ ބަދަލު ކޮށްފައި
ރައީސުލްޖުމްހޫިރއްޔާ އިބްރާހިމް މުހައްމަދު ސާލިހު އަދި ފޮރިން މިނިސްޓަރު އަބްދުالله ޝާހިދު
ރައީސުލްޖުމްހޫިރއްޔާ އިބްރާހިމް މުހައްމަދު ސާލިހުގެ ރިޔާސަތުގެ ދަށުން ދިވެހިރާއްޖެ ވަނީ ބައިނަލްއަގްވާމީ މައިދާނުގައި ހުރި އެންމެ އުސް ކުރިބޯއްޓަށް ދިވެހިރާއްޖެ ވާސިލުކޮށްދެއްވާފައި ކަމަށް ފޮރިން މިނިސްޓަރު އަބްދުالله ޝާހިދު ވިދާޅުވެއްޖެއެވެ.
ފޮރިން މިނިސްޓްރީ އިމާރާތުގެ ނަން ފަތުޙުﷲ ޖަމީލް ބިލްޑިންގެ ނަމަށް ބަދަލުކުރުމަށް ބޭއްވި ރަސްމިއްޔާތުގައި ވާހަކަފުޅުދައްކަވަމުން މިނިސްޓަރ ވިދާޅުވީ މިގައުމުގެ މިނިވަންކަމާއި ސިޔާދަތާއި އަމިއްލަ ވެރިކަން މިވަނީ މުޅި ދުނިޔެއިން ބަލައިގެންފައި ކަމަށެވެ. އަދި އެއީ އެމަނިކުފާނުގެ ހިކުމަތު އަމަލީގެ ނަތީޖާ ކަމަށެވެ.
ދުނިޔޭގެ އެހެން ހަޟާރަތްތަކުގައި ވެސް، އަދި ސިވިލައިޒޭޝަންތަކުގައި ވެސް، އެ ސިވިލައިޒޭޝަނަކަށް ނުވަތަ އެ ހަޟާރަތަކަށް ޚިދުމަތް ކުރައްވާ ޚިދުމަތްތެރިންގެ އަގު ދައުލަތުގެ ފަރާތުން ބަލައިގަނެ، ވަޒަން ކުރެއްވުން އެއީ އެހަޟާރަތްތައް ބިނާވެ އައުމަށް މަގުފަހިވެގެންދާ ކަމެއް ކަމަށެވެ. އަދި އެއީ ކުރަމުން އަންނަ ކަމެއް ކަމަށާއި، ރަނގަޅު ހެޔޮ އާދަކާދައެއް ކަމަށް ވިދާޅުވިއެވެ.
އެގޮތުން ދިވެހިރާއްޖޭގެ ވެރިކަމަށް ރައީސް ހަވާލުވެވަޑައިގަތުމަށްފަހު ރާއްޖޭގެ ޚިދުމަތްތެރިންނަށް އެޚިދުމަތުގެ އަގު ވަޒަންކުރެއްވުމުގެ ގޮތުން ކުރައްވަމުން ގެންދަވާ މަސައްކަތްޕުޅުތަކުގެ އެއް ހަރުފަތެއްގެ ގޮތުން ޚާރިޖީ ވުޒާރާ ހިންގާ އިމާރާތް، ދިވެހިރާއްޖޭގެ މިނިވަންކަމުގެ 56 އަހަރުގެ ތެރެއިން އެންމެ ގިނަ ދުވަހު ޚާރިޖީ ވަޒީރުކަން ކުރެއްވި ވަޒީރުކަމުގައިވާ އަލްއުސްތާޛް ފަތުހުﷲ ޖަމީލްގެ ނަންފުޅަށް ތަހުސީސް ކުރައްވަން ނިންމެވިކަމަށްޓަކައި ރައީސަށް މިނިސްޓްރީގެ ނަމުގައި ޝުކުރު ދަންނަވާ ކަމަށެވެ.
މިނިސްޓަރ ވިދާޅުވީ އޮނަރަބަލް ފަތުހުﷲ ޖަމީލުގެ ޚާރިޖީ ހިންގެވުމުގައި ވެސް ވިސްނުންފުޅަކީ އެއީ ކަމަށެވެ. އެމަނިކުފާނު ބޭރު މީހުންނާ ބައްދަލުކުރެއްވުމަށް ޖެހިލުންވެވަޑައިނުގަންނަވާ ކަމަށާއި، ދަތި ވަގުތުތަކުގައި ވެސް އެމަނިކުފާނު ބޭރު މީހުންނާ އެކު ވާހަކަފުޅު ދައްކަވައިގެން ހައްލު ހޯއްދެވުމަށް މަސައްކަތްޕުޅު ކުރެއްވި ކަމަށެވެ.
މިނިސްޓަރ ވިދާޅުވީ އަލްއުސްތާޛް ފަތުހުﷲ ޖަމީލްގެ ގައުމީ ޚިދުމަތުގައި ދިވެހި ދައުލަތުގައި އެންމެ ބޮޑަށް ފާހަގަވެގެން ގޮސްފައިވަނީ އެ މުއައްސަސާ ބިނާކުރެއްވުމުގައި ކަމަށެވެ. މީގެ އިތުރުން މިނިސްޓަރ ވިދާޅުވީ މިއަދުގެ އުއްތަމަ ފަނޑިޔާރަކީ ވެސް އެ މިނިސްޓްރީގައި ގާތްގަނޑަކަށް 20 ވަރަކަށް އަހަރު ދުވަހު ޚިދުމަތް ކުރައްވާފައި ހުންނެވި ބޭފުޅެއް ކަމަށެވެ.
