އިއްޒުއްދީން ސްކޫލްގެ ޕްރިންސިޕަލް، އިސްމާއިލް ނަސީރު، ހަ ޓީޗަރަކަށް ޖިންސީ ފުރައްސާރަކުރި މައްސަލަ ސާބިތުވެފައިވަނިކޮށް އޭނާގެ މައްޗަށް އެއްވެސް ފިޔަވަޅެއް ނާޅާ އެހެން ސްކޫލަކަށް ބަދަލުކޮށްފިއެވެ.

ޓީޗަރުންނަށް އެކި ކަހަލަ ފުރައްސާރަކުރުމާއި، ބައެއް މުދައްރިސުންނަށް ޖިންސީ ފުރައްސާރަކުރުމުގެ ތުހުމަތާ ގުޅިގެން، މިނިސްޓްރީ އޮފް އެޑިއުކޭޝަންއާއި ކަމާބެހޭ ފަރާތްތަކަށް މައްސަލަހުށަހެޅުމާ ގުޅިގެން، މިނިސްޓްރީ އޮފް އެޑިއުކޭޝަންގެ ހާއްސަ ކޮމިޓީއަކުން މި މައްސަލަތައް ބަލައި، ޖިންސީ ފުރައްސާރައިގެ އަމަލު އޭނާގެ މައްޗަށް ސާބިތުވެފައިވާ ކަމަށް ޓީޗަރސް އެސޯސިއޭޝަން އޮފް މޯލްޑިވްސްއިން ބުނެއެވެ.

އެ މައްސަލަ ސާބިތުވެފައި ވަނިކޮށް މިއަމަލު ހިންގި ފަރާތަށް އެއްވެސް ފިޔަވަޅުއެޅުމެއްނެތި، އެފަރާތުގެ އެދުމުގެ މަތިން، ޕްރޮމޯޝަނަކާއެކު އެހެން ސްކޫލްއަކަށް ބަދަލުކޮށްފައިވާތީ އެ ޖަމްއިއްޔާއިން ވަނީ އެކަން ކުއްވެރިކޮށްފައެވެ. މިއީ ތައުލީމީ ދާއިރާގެ ގަދަރުވެރި މަޤާމެއްގައި ހުރެ، އޭނާގެ ދަށުން ތިބި މުއައްޒަފުންނަށް ޖިންސީ ފުރައްސާރަ ކޮށްފައިވާކަން ސާބިތުވެފައިވާ ހިނދު، އަނިޔާދިން ފަރާތުގެ މަސްލަހަތު ހިމާޔަތްކުރުމަށް، މިނިސްޓްރީ އޮފް އެޑިއުކޭޝަނުން މަސަކަތްކުރަމުންދާ ދިއުން ކަމަށް އެ ޖަމްއިއްޔާއިން ބުނެއެވެ.

މިކަމާ ގުޅޭގޮތުން އެޑިއުކޭޝަން މިނިސްޓްރީން އެއްވެސް ޖަވާބެއް ނުދެއްވައެވެ.

ޓީޗަރސް އެސޯސިއޭޝަން އޮފް މޯލްޑިވްސްއިން އިން ބުނެފައިވަނީ ޖިންސީ ފުރައްސާރައިގެ، ޝިކާރައަކަށްވި ފަރާތްތަކަށް ފިޔަވަޅުއެޅުމުގެ ގޮތުން އެހެން ސްކޫލްތަކަށް ބަދަލުކުރުމަށް ނިންމާފައިވާ ނިންމުން ބާތިލްކޮށް، އެމީހުންގެ ހައްޤުތައް ހިމާޔަތްކުރުމަށް ގޮވާލާ ކަމަށާއި، މިފަދަ ނިންމުންތަކަކީ ޖިންސީ ފުރައްސާރައިގެ އަމަލުތައް ހިންގާ ފަރާތްތަކަށް ހިތްވަރުލިބޭފަދަ ނިންމުން ތަކެއް ކަމަށް ވެސް އެޖަމުއިއްޔާއިން ބުނެއެވެ.

ޖިންސީ ފުރައްސާރައިގެ މައްސަލައިގެ ޝިކާރައަކަށްވި ފަރާތްތަކުގެ ވަކީލުންގެ ފަރާތުން ނެރެފައިވާ ބަޔާނުގައި ބުނެފައިވަނީ، މިނިސްޓްރީ އޮފް އެޑިއުކޭޝަންގެ ޖިންސީ ފުރައްސާރަކުރުމާއި ގޯނާ ކުރުން ހުއްޓުވުމުގެ ކޮމިޓީއިން މައްސަލަ ބައްލަވައި، އިއްޒުއްދީން ސުކޫލުގެ ޕްރިންސިޕަލް އިސްމާޢީލް ނަސީރުގެ ފުށުން ޖިންސީ ފުރައްސާރަ ކުރުމުގެ އަމަލެއް ހިންގިކަމުގައި ބުރަވެވެން އޮތްކަމަށް ނިންމެވި ކަމަށެވެ. އަދި ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނުގެ 22 ވަނަ މާއްދާގެ ދަށުން ފިޔަވަޅު އަޅަން ފެންނަ ކަމަށް މައްސަލަ ބެލި ކޮމެޓީގެ އިއްތިފާޤުން ނިމިފައިވާ ކަމަށެވެ.

ޖިންސީ ފުރައްސާރަކުރުމާއި ގޯނާކުރުން ހުއްޓުވުމުގެ ޤާނޫނުގެ 22 ވަނަ މާއްދާގައި ބުނެފައިވަނީ، އެފަދަ މައްސަލައެއް ސާބިތުވެއްޖެނަމަ، އެމީހަކަށް ލިޔުމުން ނަސޭހަތްތެރިވެ އިންޒާރު ދިނުމާއި، ވަކި މުއްދަކަަށް ވަޒީފާއިން ސަސްޕެންޑް ކުރުމާއި، އަދާ ކުރާ ޒިންމާތަކުން ވަކުކުރުމާއި، އަދާކުރަމުން ދިޔަ ވަޒީފާއަށްވުރެ ދަށު ދަރަޖައިގެ ވަޒީފާއަކަށް ބަދަލުކުރުން އަދި ވަޒީފާއިން ވަކިކުރުން ހިމެނޭ ކަމަށެވެ.

އެހެންނަމަވެސް، މައްސަލަ ރައްދުވި ފަރާތުގެ މައްޗަށް އެއްވެސް ފިޔަވަޅެއް އަޅާފައިވާކަން މައްސަލަ ހުށަހެޅި ފަރާތަން އަންގާފައިނުވާ ކަމަށެވެ.