ހުޅުމާލެ ސަހަރާ މިސްކިތުގައި ކުޑަ ކުދިންތަކެއް އިމާމުވެ ނަމާދުކުރާ މައްސަލައެއް!
އެއީ އުމުރުން 13، 14، ނުވަތަ 15 އަހަރުގެ ކުދިން ކަމަށް މައުލޫމާތު ލިބޭ
ހުޅުމާލެ ސަހަރާ މިސްކިތް
ހުޅުމާލެ ސަހަރާ މިސްކިތުގައި ކުޑަކުދިންތަކެއް އިމާމުވެ ނަމާދުކުރާ މައްސަލަ ފެންމަތިވެއްޖެއެވެ.
އިތުބާރު ހުރި ފަރާތަކުން ރާއްޖެއެމްވީއަށް ބުނީ ހުޅުމާލެ ސަރަހަރާ މިސްކިތުގައި މުދިމު ބަންގި ގޮވާ ނިމުމުން، އިމާމުވެ ޖަމާއަތުގައި ނަމާދުކުރަނީ ކުޑަ ކުދިން ކަމަށެވެ. އެއީ އުމުރުން 13، 14، ނުވަތަ 15 އަހަރުގެ ކުދިން ކަމަށް މައުލޫމާތު ލިބެއެވެ. ދެފަންގިފިލާއަށް އިމާރާތްކޮށްފައިވާ އެމިސްކިތުގެ ތެރޭގައި އެކުދިންތައް ދިރިއުޅެމުންދާއިރު، ކޮންމެ ނަމާދަކަށް ބަންގި ގޮވާ ނިމުމުން އިމާމުވެ ނަމާދު ކުރުމަށް މަތީ ފަންގިފިލާއިން ތިރިއަށް ފައިބަނީ ފަހަރަކު ކުއްޖެއް ކަމަށާއި، ނަމާދުކޮށް ނިމުމުން އެކުއްޖާ މަތީފަންގިފިލާއަށް އަރާ ކަމަށެވެ. އެގޮތަށް އެކި ކުދިން އިމާމުވެ ނަމާދުކުރާ ކަމަށް އެމީހާ ބުނެއެވެ.
މާލެސިޓީ ކައުންސިލުންގެ ބެލުމުގެ ދަށުން ހިންގާ މިމިސްކިތުގައި ކުޑަ ކުދިންތަކެއް އިމާމުވެ ނަމާދުކުރަމުންދާ މައްސަލައާ ގުޅިގެން ސީޓީ ކައުންސިލްގެ ބަހެއް ހޯދުމަށް ކުރި މަސައްކަތް ވަނީ ކާމިޔާބުވާ ގޮތް ނުވެފައެވެ. މޭޔަރު ޑރ.މުޙއްމަދު މުޢިއްޒުގެ ފޯނަށް ގުޅި ނަމަވެސް ޖަވާބު ދެއްވާފައެއްނުވެއެވެ. މީގެ އިތުރުން އިސްލާމިކް މިނިސްޓްރީން ބުނެފައިވަނީ ހުޅުމާލެ ސަހަރާ މިސްކިތުގައި ކުޑަ ކުދިންތަކެއް އިމާމުވެ ނަމާދުކުރާ މައްސަލަ މިނިސްޓްރީއަށް ހުށަހަޅާފައިނުވި ނަމަވެސް އިތުރަށް ބަލަން ޖެހޭ ކަންކަން މިނިސްޓްރީން ބަލާނެ ކަމަށެވެ.
އިމާމުގެ މިސްކިތުގައި ނަމާދުކުރެވޭނީ ޚާއްސަ ސެޓްފިކެޓެއް ހާސިލްކުރުމުން އިސްލާމިކް މިނިސްޓްރީގެ ޚާއްސަ ހުއްދައާއެކު އެވެ. ހުއްދަނެތި އިމާމުވެ މިސްކިތްތަކުގައި ނަމާދު ކުރުމަކީ މަނާ ކަމެކެވެ.
