ގއ. ވިލިނގިލި ބަނދަރު ފުންކުރުމުގެ މަޝްރޫއުގެ މަސައްކަތުގެ 70 އިންސައްތަ މަސައްކަތް ނިންމާލައިފިއެވެ.

މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ)ން ބުނީ ވިލިނގިލި ބަނދަރު ފުންކުރުމުގެ މަޝްރޫއުގެ މަސައްކަތުގެ 70 އިންސައްތަ މަސައްކަތް ނިމިފައިވާ ކަމަށެވެ. އަދި ހާބަރ ބޭސިން ފުންކުރުމުގެ މަސައްކަތުގެ 82 އިންސައްތަ މަސައްކަތް ނިމިފައިވާ ކަމަށް އެމްޓީސީސީން ބުނެއެވެ.

މި މަޝްރޫއުގެ ދަށުން 71،519 ކިއުބިކް މީޓަރުގެ ސަރަހައްދެއްގެ ބޭސިން ފުންކުރުމަށް ވަނީ ހަމަޖެހިފައިވެއެވެ. އޭގެ އިތުރުން ނެރު ފުންކުރުމުގެ މަސައްކަތް ވެސް ހިމެނޭކަމަށް ވެސް އެމްޓީސީސީން ވަނީ ބުނެފައިވެއެވެ.

އެމްޓީސީސީން ހިންގާ މި މަޝްރޫއަކީ 9.1 މިލިއަން ރުފިޔާގެ މަޝްރޫއެކެވެ.

ގއ.ވިލިނގިއްޔަކީ ފުޅާ ދާއިރާއެއްގައި މަސްވެރިކަން ކުރާ އެއްރަށެވެ. ގިނަ އަދަދެއްގެ އޮޑި ދޯނިފަހަރު ގެންގުޅޭއިރު ބަނދަރު ޒަމާނީ ފެންވަރަށް ތަރައްގީ ވެގެން ދިއުމަކީ އެރަށު ރައްޔިތުންގެ އުންމީދެކެވެ. އަތޮޅުގެ މަސްވެރިން ވިލިނގިލީގެ ބަނދަރު ބޭނުންކުރަމުންދާއިރު، މިމަޝްރޫއާއެކު ބޮޑެތި ފަސޭހަތަކެއް ލިބިގެންދާނެއެވެ.