ވ. އާރަށުގެ މައްސަލާގައި ރައީސް ޔާމީންގެ ގާނޫނީ ޓީމުން ތަހުގީގު މަޖިލީހުން ތަނާޒުލްވެއްޖެ
އެ މައްސަލަ އިތުރަށް ތަހުގީގު ކުރެވޭނެ އެއްވެސް ޖާގައެއް ނެތް
ރައީސް ޔާމީން ފުލުހުންގެ އިދާރާއަށް ހާޒިރުކުރުކުރުން
ވ.އާރަށުގެ މައްސަލާގައި ކުރީގެ ރައީސް ޔާމީންގެ ގާނޫނީ ޓީމުން ތަހުގީގު މަޖިލީހުން ތަނާޒުލް ވެއްޖެއެވެ.
ރައީސް ޔާމީންގެ ވެރިކަމުގައި ބޭރުގެ ބަޔަކަށް ވ. އާރަށް ވިއްކާލައި، ލިބުނު 1 މިލިއަން ޑޮލަރު އެމަނިކުފާނުގެ އަމިއްލަފުޅު އެކައުންޓަށް ޖަމާކުރައްވާފައިވާ މައްސަލާގެ ތަހުގީގަށް ފުލުހުންގެ އިދާރާއަށް ހާޒިރުކުރީ، ހޯމަ ދުވަހުގެ މެންދުރު 2:00ގައެވެ. މި މައްސަލާގެ ތަހުގީގަށް މިމަހުގެ 10 ވަނަ ދުވަހުވެސް ރައީސް ޔާމީންވަނީ ވަނީ ފުލުހުންގެ އިދާރާއަށް ހާޒިރުކޮށްފައެވެ.
ހޯމަ ދުވަހުން ފުލުހުންގެ އިދާރާއަށް ހާޒިރުކުރުމަށްފަހު ކުރިއަށްގެންދިޔަ ތަހުގީގުގެ މަޖިލީހުން ތަނާޒުލްވުމަށްފަހު، ގާނޫނީ ޓީމްގެ އިސްކޮށް ހުންނަވާ ކުރީގެ ނައިބު ރައީސް ޑރ. މުޙައްމަދު ޖަމީލް އަޙުމަދު ވިދާޅުވީ ވ. އާރަށުގެ މައްސަލައަކީ ފުލުހުން ތަހުގީގުކޮށް ނިންމައި ބަޔާން ނަގާ ނިމިފައި އޮތް މައްސަލައެއް ކަމަށެވެ. އެހެންކަމުން ދެން އެ މައްސަލަ އިތުރަށް ތަހުގީގު ކުރެވޭނެ އެއްވެސް ޖާގައެއް ނެތް ކަމަށެވެ.
ހޯމަ ދުވަހުގެ ތަހުގީގު މަޖިލީހުގައި ފުލުހުންނާއި ޕީޖީގެ ނިންމެވުން ލިޔުމުން ދިނުމަަށް އެދިލެއްވި ކަމަށް ޑރ. ޖަމީލް ވިދާޅުވިއެވެ. ފުލުހުން ޕީޖީއަށް މައްސަލައެއް ފޮނުވުމަށްފަހު ތިން ގޮތަކަށް ނިންމަންޖެހޭ ކަން ފާހަގަކުރައްވަމުން ޑރ.ޖަމީލް ވިދާޅުވީ، އެ މައްސަލަ އަނބުރާ ފޮނުވާލުން، ނުވަތަ މައްސަލަ ނިންމާލުން، ނުވަތަ މައްސަލައިގައި ދައުވާ ކުރަން ފޮނުވުން ކަމަށެވެ. އެހެންކަމުން ޕީޖީ ފުލުހުންނަށް ފޮނުވި ލިޔުމުގައި އޮތް އެއްޗެއް ސާފު ކުރުމަށް ލިޔެކިޔުންތައް ހޯދުމަށް އެދިވަޑައިގަތް ކަމަށެވެ. ޑރ. ޖަމީލް ތަކުރާރުކޮށް ވިދާޅުވީ، މިހާރު ފުލުހުން އެކުރާކަމަކީ އެއްވެސް ގާނޫނަކުން ތަންދޭ ކަމަކަށް ނުވާތީ ތަހުގީގު މަޖިލީހުން ތަނާޒުލްވީ ކަމަށެވެ. ރައީސް ޔާމީން މިހާރު ފުލުހަށް ހާޒިރު ކޮށްގެން މިހާރު އެކުރާ ކަމަކީ ވަގިގޮތަކަށް ތަހުގީގު އަނބުރާލުމަށް ހިންގާ ކަމެއްގެ ގޮތުގައި ޑރ. ޖަމީލް ސިފަކުރެއްވިއެވެ.
ރިސޯޓެއްގެ ގޮތުގައި ތަރައްގީކުރުމަށް ވ. އާރަށް ބޭރުގެ ބަޔަކަށް ވިއްކައިގެން ލިބުނު ފައިސާ ރައީސް ޔާމީންގެ އަމިއްލަފުޅު އެކައުންޓަށް ޖަމާކުރައްވާފައިވާ ކަމަށް ބުނާ މައްސަލައެއްގައި ދައުވާ ކޮށްދިނުމަށް އެދި އެ މައްސަލަ ޕީޖީއަށް ފޮނުވާފައިވަނީ މި އަހަރުގެ އޭޕްރީލް މަހުގެ ތެރޭގައެވެ. އާރަށުގެ އަގުގެ ގޮތުގައި ލިބުނު 1 މިލިއަން ޑޮލަރު އަމިއްލަފުޅު އެކައުންޓަށް ޖަމާކުރައްވާފައިވާ ކަަމަށް ތަހުގީގު ރިޕޯޓުގައިވެއެވެ. ރައީސް ޔާމީންގެ މައްޗަށް މިފަހަރު ކޮށްފައިވަނީ ރިޝްވަތު ނެންގެވުމާއި ކަޅު ފައިސާ ދޮވުމުގެ ތުހުމަތުގެ ދައުވާއެވެ.
ވ. ތިނަދޫ ކައިރީގައި އޮތް އާރަށަކީ ޕިކްނިކް ދާ ކުޑަރަށެކެވެ. އެ ރަށަކީ ޑީއާރްޕީގެ ކުރީގެ ލީޑަރު އަޙުމަދު ތަސްމީން ޢަލީގެ ހިއްސާ އޮންނަ ކުންފުންޏަކަށް ކުރިން ދީފައި އޮތް ރަށެކެވެ. އޮގަސްޓް 2015ގައި ތަސްމީންގެ އަތުން އެރަށް އަތުލައި، ހަމަ އެ އަހަރުގެ ސެޕްޓެމްބަރު މަހު އެރަށް ހަވާލުކޮށްފައިވަނީ ވ. ފެލިދޫ ދާއިރާގެ ކުރީގެ މެމްބަރު ޔޫސުފް ނަޢީމްއާއެވެ.
ރައީސް ޔާމީނާ ގާތް ގުޅުމެއް އޮންނަ ޔޫސުފް ނަޢީމަށް އެރަށް ހަވާލުކުރިތާ އެއް މަސްތެރޭގައި ބޭރުގެ ކުންފުންޏަކަށް ރަށް ވިއްކާލައިގެން ލިބުނު 1 މިލިއަން ޑޮލަރު އެޗްއެސްބީސީގައި އޮންނަ ރައީސް ޔާމީންގެ އަމިއްލަފުޅު އެކައުންޓަށް ޖަމާކުރައްވާފައިވާ ކަމަށް ވެއެވެ.
އެމްއެމްޕީއާރްސީ މައްސަލާގައި ރައީސް ޔާމީން މިހާރުވެސް 5 އަހަރުގެ ޖަލު ހުކުމެއް ތަންފީޒު ކުރައްވަމުން ގެންދަވާއިރު އެމަނިކުފާނު މިހާރު ހުންނެވީ ވަގުތީ ގޮތުން ގޭ ބަންދުގައެވެ. ރިޝްވަތު ނެންގެވުމާއި ކަޅު ފައިސާ ދޮވުމުގެ އެހެން މައްސަލައެއްގެ ޝަރީއަތް ރައީސް ޔާމީންގެ މައްޗަށް ކްރިމިނަލް ކޯޓުގައި މިހާރު ވެސް ހިނގަމުންދެއެވެ. އެއީ މަގާމުގެ ނުފޫޒު ބޭނުން ކުރައްވައިގެން އެމްއެމްޕީއާރްސީ މެދުވެރިކޮށް ރ. ފުއްގިރި ވިއްކައިގެން ލިބުނު 1.1 މިލިއަން ޑޮލަރު އެމަނިކުފާނުގެ އެކައުންޓަކަށް ޖަމާކުރައްވާފައިވާ މައްސަލައެވެ. އެ މައްސަލައިގައި ރައީސް ޔާމީންގެ މައްޗަށް ދައުވާ އުފުލާފައި ވަނީ ޖޫން 2020ގައެވެ.
އެހެންކަމުން އާރަށުގެ މައްސަލާގައި ރައީސް ޔާމީންގެ މައްޗަށް ޕީޖީ ދައުވާ އުފުލައިފި ނަމަ އެ މައްސަލަ ވާނީ އެމަނިކުފާނުގެ މައްޗަށް އުފުލާ 6 ވަނަ ޖީނާޢީ ދައުވާއަށެވެ. ހުކުމްކޮށްފައިވާ މައްސަލައާއި މިހާރު ކޯޓުގައި ކުރިއަށްދާ މައްސަލާގައި ވެސް، ރައީސް ޔާމީންގެ މައްޗަށް ކޮންމެ މައްސަލައެއްގައި ދެ ދައުވާ ކުރެއެވެ.
