ބޮމުގެ އިންޒާރު ދިނުމާ ގުޅިގެން ހައްޔަރުކުރި މީހާގެ ބަންދަށް ތިން ދުވަސް
އެކަކު ވަނީ ބަންދުގައި ބެހެއްޓުމަށްފަހު ހުކުރު ދުވަހުގެ ވަގުތެއްގައި ދޫކޮށްލާފައި
ރައީސުލްޖުމްހޫރިއްޔާގެ ރަސްމީ ގެކޮޅު މުލިއާގެ
މުލިއާގެ ކައިރިން ދަމުން އަތުގައި ބޮމެއް އޮތް ކަމަށް ބުނެ އިންޒާރު ދިން ދެމީހުންގެ ތެރެއިން އެކަކުގެ ބަންދަށް ތިން ދުވަސް ޖަހައިފިއެވެ.
ރާއްޖެއެމްވީއަށް މަޢުލޫމާތު ދެއްވަމުން ފުލުހުންގެ މީޑިއާ އޮފިސަރު ވިދާޅުވީ ބޮމެއް އޮތް ކަމަށް ބުނެ އިންޒާރު ދިން މީހާ ފުލުހުންގެ ބެލުމުގެ ދަށުގައި ބަހައްޓާފައިވާ ކަމަށާއި، އޭނާގެ ބަންދަށް ކޯޓުން ތިން ދުވަސް ޖަހާފައިވާ ކަމަށެވެ. ދެން ހުރި މީހާ ބަންދުގައި ބެހެއްޓުމަށްފަހު ހުކުރު ދުވަހުގެ ވަގުތެއްގައި ވަނީ ދޫކޮށްލާފައެވެ.
ހައްޔަރުކުރި ދެ މީހުންނަކީ ވެސް މަސްތުވާތަކެތީގެ މައްސަލަތަކުގެ ރެކޯޑް އޮންނަ ދެ މީހުން ކަމަށް މައުލޫމާތު ލިބިފައިވެއެވެ.
ހުކުރު ދުވަހުގެ މެންދުރު ވަގުތެއްގައި އެމީހުން ގެންގުޅުނު ފޮށިގަނޑެއްގައި ބޮމެއް އޮތް ކަމަށް ބުނުމާ ގުޅިގެން ފުލުހުންނާއި ސިފައިން އެކަމަށް އެޓްންޑްވެފައިވެއެވެ. މީގެ އިތުރުން މުލިއާގޭ ގޭޓް ގޮއްވާލާނެކަމުގެ އިންޒާރު މެއި މަހުގެ 30 ވަނަ ދުވަހުގެ ރޭ ލިބުމާއެކު މުލިއާގޭގެ ސެކިއުރިޓީ ވަރުގަދަ ކޮށްފައިވެއެވެ. އަދި އެސަރަހައްދު މޮނިޓަރ ކުރުމުގައި އަބަދުވެސް ސިފައިން ހަރަކާތްތެރިވަމުންދާނެއެވެ.
ނިރުބަވެރި އަމަލެއް ހިންގާނެ ކަމަށް ބުނެ އިންޒާރު ދިނުމަކީ ގާނޫނު ބުނާ ގޮތުން ކުށެކެވެ. މެއި މަހުގެ 6 ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ބޮމުގެ ހަމަލާއަށް ފަހު، އެފަދަ ކަންކަމަށް ވަރަށް ބޮޑަށް ސަމާލުކަން ވަނީ ހުއްޓިފައެވެ. އެގޮތުން ސިފައިންނާއި ފުލުހުން އެލާޓުގައި ތިބި އިރު ހަމަލާއަށް ފަހު މުލިއާގެއާއި، އަދި ވެސް މަތީ އެކި މަގާމުތަކުގައި ތިއްބަވާ ބޭފުޅުންގެ ސެކިއުރިޓީ ވަނީ ވަރުގަދަކޮށްފައެވެ.
