ވީއައިއޭ ތަރައްޤީކުރުމަށް ކުވައިތު ފަންޑުން 50 މިލިއަން ޑޮލަރުގެ ލޯނެއް

ވެލާނާ އިންޓަރނޭޝަނަލް އެއަރޕޯޓް (ވީއައިއޭ) ތަރައްޤީކުރުމަށް ކުވައިތު ފަންޑުން 50 މިލިއަން ޑޮލަރުގެ ލޯނެއް ނެގުމުގެ އެއްބަސްވުމުގައި ސޮއިކޮށްފިއެވެ.

ލޯނު އެއްބަސްވުމުގައި ދިވެހި ސަރުކާރުގެ ފަރާތުން ސޮއިކުރެއްވީ މިނިސްޓަރ އޮފް ފިނޭންސް އިބްރާހީމް އަމީރެވެ. އަދި ކުވޭތު ފަންޑުގެ ފަރާތުން ސޮއިކުރެއްވީ އެ ފަންޑުގެ އެޑްމިން އެންޑް ފައިނޭންސް އެފެއާޒްގެ ޑެޕިއުޓީ ޑިރެކްޓަރ ނަދާލް އަލް ޢުލަޔާނެވެ.

ކުވައިތު ފަންޑުން ރާއްޖެއަށް ދީފައިވަނީ 15 މިލިއަން ދީނާރު ނުވަތަ ދިވެހި ރުފިޔާއިން ނަމަ 770 މިލިއަނެވެ.

ކުވޭތު ފަންޑުންވަނީ 2016 ވަނަ އަހަރުވެސް ވެލާނާ އިންޓަރނޭޝަނަލް އެއަރޕޯޓުގެ އާ ޓާމިނަލްގެ މަސައްކަތަށް 50 މިލިޔަން އެމެރިކާ ޑޮލަރު ނުވަތަ 771 މިލިޔަން ރުފިޔާގެ ލޯނެއް ދީފައެވެ.

ރައީސް އަބްދުالله ޔާމީން އަބްދުލްގައްޔޫމުގެ ސަރުކާރުގައި ފެށި މި މަޝްރޫޢަކީ ގާތްގަނޑަކަށް 1.2 ބިލިއަން ޑޮލަރުގެ މަޝްރޫއެކެވެ. މި ބޮޑު މަޝްރޫއުގެ ދަށުން ވީއައިއޭގައި އާ ފަސިންޖަރު ޓާމިނަލަކާއި، ފިއުލް ފާމެއްގެ އިތުރުން ކާގޯ ޓާމިނަލަކާއި ވީއައިޕީ ބިލްޑިންއެއް އަދި އާ ސީޕްލޭން ޓާމިނަލެއް ގާއިމުކުރާނެއެވެ.

އައު ޓާމިނަލްގެ މަސައްކަތް ސަޢުދީ ބިންލާދިން ގްރޫޕާ، އެންމެ ފުރަތަމަ ޙަވާލުކޮށްފައި ވަނީ 2016 ވަނަ އަހަރުގެ މެއި މަހުގެ 22 ވަނަ ދުވަހުއެވެ. ނަމަވެސް ފަހުން ބިންލާދީން ގްރޫޕާއެކު ވެފައިވާ އެއްބަސްވުމަށް ބަދަލުތަކެއް ގެނެސް، އެ މަސައްކަތް ކުރުމުގެ އެއްބަސްވުމުގައި އެ ކުންފުންޏާއެކު އެމް.އޭ.ސީ.އެލުން އަލުން ސޮއިކޮށްފައިވަނީ 2019 ވަނަ އަހަރުގެ ޖޫން މަހުގެ 27 ވަނަ ދުވަހުއެވެ.

އެއަރޕޯޓުގެ އައު ޓާމިނަލްގެ މަސައްކަތަށް 357 މިލިއަން ޑޮލަރު ޚަރަދުވާއިރު، މި ޓާމިނަލަކީ ހަތްދިހަ އަށް ހާސް އަކަ މީޓަރުގެ ޖާގައިގެ ޓާމިނަލެކެވެ. ބިންލާދީން ގްރޫޕާއެކު ފަހުންވީ އެއްބަސްވުމުގެ ދަށުން ޓާމިނަލްގެ ބޮޑުކުޑަމިނަށް އެއްވެސް ބަދަލެއް ނާދެއެވެ.

ޓާމިނަލްގެ މަސައްކަތް މުޅިން ނިންމާލުމަށް ގާތްގަނޑަކަށް 30 މަސް ދުވަސް ހޭދަވާނެ ކަމަށް ކުރިންވަނީ ލަފާކޮށްފައެވެ. އަދި އެތަން ބޭނުން ކުރެވޭ ވަރުވާނީ 2022 ވަނަ އަހަރުގެ މެދުތެރޭގައި ކަމަށް ވެސް އެމްއޭސީއެލުން އޭރު ވިދާޅުވެފައެވެ. ވެލާނާ އިންޓަރނޭޝަނަލް އެއަރޕޯޓްގައި މިހާރު ހުރި ޓާމިނަލަކީ އަހަރަކު 1.5 މިލިއަން ފަސެންޖަރުންނަށް ޚިދުމަތް ދެވޭވަރުގެ ޓާމިނަލެއް ނަމަވެސް، އެންމެފަހުގެ ޒަމާނީ ވަސީލަތްތަކާއެކު އަލަށް ތަރައްޤީކުރާ ޓާމިނަލަކީ އަހަރަކު 7 މިލިއަން ފަސިންޖަރުންނަށް ޚިދުމަތްދެވޭ ފެންވަރަށް ތަރައްޤީކުރާ ޓާމިނަލެކެވެ.

މީގެއިތުރުން ވެލާނާ އިންޓަރނޭޝަނަލް އެއަރޕޯޓުގައި ތަރައްޤީކުރާ އައު ކާގޯ ޓާމިނަލަކީ އެންމެފަހުގެ ޒަމާނީ ވަސީލަތްތަކާއެކު ތަރައްޤީކުރަމުންދާ ޓާމިނަލެކެވެ. އާ ކާގޯ ޓާމިނަލްގެ މަސައްކަތް ކުރަމުންދަނީ އާ ރަންވޭގެ މަސައްކަތްވެސް ކޮށްފައިވާ ޗައިނާގެ ބެއިޖިންގ އަރބަން ކޮންސްޓްރަކްޝަން ގްރޫޕް (ބީ.ޔޫ.ސީ.ޖީ)އިންނެވެ.