ރާއްޖެ އިޝްތިހާރުކުރުމުގެ މަސައްކަތް 6 މާކެޓެއްގައި ދަނީ ކުރިއަށް - ތޮއްޔިބު
މިހާރު ރާއްޖެ އިޝްތިހާރުކުރުމުގެ މަސައްކަތް ކުރަނީ ޑިޖިޓަލް ފަރސްޓް ސްޓްރެޓެޖީގެ ދަށުން
އެމްއެމްޕީއާރްސީ އެމްޑީ ތޮއްޔިބު މުހައްމަދު
ބޭރުގެ ގައުމުތަކުގައި ރާއްޖެ މާކެޓުކުރުމުގެ މަސައްކަތް ހުއްޓާނުލާ ކުރިއަށް ގެންދާ ކަމަށާއި މިހާރުވެސް 6 މާކެޓެއްގައި ރާއްޖެ އިޝްތިހާރުކުރުމުގެ މަސައްކަތް ކުރިއަށްދާ ކަމަށް މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރުސީ)ގެ މެނޭޖިން ޑިރެކްޓަރ ތޮއްޔިބު މުހައްމަދު ވިދާޅުވެއްޖެއެވެ.
ކޮވިޑް-19 އާއެކު ރާއްޖޭގެ ފަތުރުވެރިކަމަށް ކުރިމަތިވި ގޮންޖެހުންތަކާއެކު އެމްއެމްޕީއާރުސީގެ މަސައްކަތްތައް ހުއްޓާނުލާ ކަމަށާއި ޑިޖިޓަލް ފަރސްޓް ސްޓްރެޓެޖީގެ ދަށުން ރާއްޖެ އިޝްތިހާރުކުރުމުގެ މަސައްކަތް ފެށިގެން ދިޔަކަމަށް ތޮއްޔިބު ވަނީ ފާހަގަކުރައްވާފައެވެ. އެގޮތުން 2020 ވަނަ އަހަރުގެ މާޗު މަހު ރާއްޖޭގެ ބޯޑަރު ބަންދުކުރެވުނު ހިސާބުން ބޯޑަރު އަލުން ހުޅުވުމަށް ގިނަ މަސައްކަތްތަކެއްކޮށް، ޖުލައި 15 ވަނަ ދުވަހު ބޯޑަރު ހުޅުވާލައި ފަތުރުވެރިން ރާއްޖެ ގެންނަން ފެށުނުކަމަށް ތޮއްޔިބު ވިދާޅުވިއެވެ.
ކޮވިޑްގެ ކުރިން އެމްއެމްޕީއާރުސީން ރާއްޖެ އިޝްތިހާރުކުރުމަށް ކުރި މަސައްކަތްތަކަކީ ވަރަށް ބޮޑަށް ފިޒިކަލް ޕްރެސެންސަށް ބަރޯސާވެގެން ކުރިއަށް ގެންދިޔަ މަސައްކަތްތައް ކަމަށް ތޮއްޔިބު ވިދާޅުވިއެވެ. ނަމަވެސް މިހާރު މަސައްކަތްތައް ބައްޓަން ކުރެވިފައި މިވަނީ ވީހާވެސް ޑިޖިޓަލައިޒްކޮށް ކުރިއަށް ގެންދިއުމަށް ކަމަށާއި މިިހާރު ކުރިއަށް ގެންދާ މަސައްކަތްތައް ސިނާއަތުގެ ހިއްސާދާރުންނާ ގުޅިގެން ކުރިއަށް ގެންދިއުމަށް ހާއްސަ ސަމާލުކަމެއް ދޭކަމަށް ތޮއްޔިބު ވިދާޅުވިއެވެ. އެގޮތުން ރާއްޖެ އާއި ރާއްޖެއިން ބޭރުގެ ފަރާތްތަކާ ގުޅިގެން މަސައްކަތްތައް ކުރިއަށް ގެންދާކަމަށް ވިދާޅުވިއެވެ.
ރާއްޖެ އިޝްތިހާރުކުރުމަށް އެމްއެމްޕީއާރުސީ އިން ފެއަރތަކާއި ވެބިނަރތަކުގެ އިތުރުން ފޭމް ޓްރިޕްސް އަދި ވިޒިބިލިޓީ ކެމްޕެއިންތައް ކުރިއަށް ގެންދެވެ. އޭގެ އިތުރުން ސޯޝަލް މީޑިއާ ޗެނަލްތައް މެދުވެރިކޮށް މި މަސައްކަތް ކުރަމުންދާ ކަމަށާއި ބޭނުމަކީ ހަމައެކަނި އިޝްތިހާރު ކޮށްލާފައި ދޫކޮށްލުން ނޫން ކަމަށާއި މީގެން ލިބޭ ނަތީޖާތައް ރަނގަޅުކުރުން ކަމަށް ތޮއްޔިބު ވިދާޅުވިއެވެ.
ތޮއްޔިބު ވިދާޅުވީ މިއީ ހަމައެކަނީ އެމްއެމްޕީއާރުސީގެ މަސައްކަތެއް ނޫން ކަމަށާއި މިކަމުގައި މުޅި ސިނާއަތުގެ ހިއްސާ އެބަ އޮތް ކަމަށެވެ. އަދި އެމްއެމްޕީއާރުސީ އިން ކުރަމުންދާ މަސައްކަތްތައް ހުއްޓާނުލާނެ ކަމަށާއި މި އަހަރުގެ މިހާތަނަށް ވަރަށް ގިނަ މަސައްކަތްތައް ކުރެވިއްޖެ ކަމަށާއި، މިހާރުވެސް ވަރަށް ގިނަ މަސައްކަތްތައް ކުރިއަށްދާ ކަމަށް ތޮއްޔިބު ވިދާޅުވިއެވެ. ތޮއްޔިބު ވަނީ އަހަރުގެ ކުރިއަށް މިއޮތް ދުވަސްތަކަށް ގިނަ ކަންތައްތަކެއް ރޭވިފައި އެބަހުރިކަމަށް ވިދާޅުވެފައެވެ.
ކުރެވުނު މަސައްކަތްތަކުގެ ނަތީޖާ މިހާރު އެބަ ފެންނަކަމަށާއި ނަތީޖާތައް ވަރަށް ރަނގަޅުކަމަށް ތޮއްޔިބު ވިދާޅުވިއެވެ.
ކޮވިޑް-19ގެ ސަބަބުން ރާއްޖޭގެ ފަތުރުވެރިކަމުގެ ކީމާކެޓުތައް ބަންދުވެގެން ދިއުމާއެކު މިހާރު ރާއްޖެއަށް މުޅިން އައު މާކެޓުތަކެއް ތައާރަފުވެގެން ގޮސްފައިވާކަން ތޮއްޔިބު ވަނީ މީގެ ކުރިން ވެސް ފާހަގަކުރައްވާފައެވެ. އެގޮތުން ކޮވިޑް-19ގެ ކުރިން ރާއްޖެއަށް އެންމެ ގިނަ އަދަދެއްގެ ފަތުރުވެރިން އަންނަ ގައުމުތަކުގެ ލިސްޓުގެ ހަ ވަނައިގައި އޮތް ރަޝިއާ އެއް ވަނައަށް ޖެހިލާފައިވާއިރު، ބައެއް ގައުމުތަކުން ރާއްޖެ އަންނަ ފަތުރުވެރިންގެ އަދަދު ވަނީ 100 އިންސައްތަ އިތުރުވެފައެވެ.
