އިންޑިޔާގެ އުއްތަރު ޕްރަދޭޝުން ކައްޕާ ވޭރިއަންޓް ފެނިއްޖެ

އިންޑިއާގެ އެންމެ ބައިބޯ ސްޓޭޓް ކަމަށްވާ އުއްތަރު ޕްރަދޭޝުން ކޮވިޑް-19 ގެ ކައްޕާ ވޭރިއަންޓް ފެނިއްޖެއެވެ.

އިންޑިއާގެ ނޫސްތަކުގައި ރިޕޯޓްކޮށްފައިވާ ގޮތުން ކައްޕާ ވޭރިއަންޓްގެ ކޭހެއް ފެނިފައި ވަނީ އުއްތަރު ޕްރަދޭޝްގެ ކަބީރުނަގަރުންނެވެ. މި ވޭރިއަންޓް ފެނިފައި ވަނީ ކޮވިޑަށް ޕޮޒިޓިވްވި އުމުރުން 66 އަހަރުގެ ފިރިހެނެއްގެ ޖެނޯމް ސީކުއެންސިން ޓެސްޓުކުރުމުން ކަމަށް ރިޕޯޓްތައް ބުނެއެވެ. އެމީހާ މިހާރު ވަނީ ކޮވިޑަށް ފަރުވާ ހޯދަމުން ދަނިކޮށް މަރުވެފައެވެ.

ރިޕޯޓްތައް ބުނާގޮތުން އޭނާ ކޮވިޑަށް ޕޮޒިޓިވްވެފައި ވަނީ މެއި 27 ވަނަ ދުވަހުއެވެ. އަދި ޖެނޯމް ސީކުއެންސަށް ސާމްޕަލް ނަގާފައި ވަނީ ޖޫން 13 ވަނަ ދުވަހުއެވެ. ކައްޕާ ވޭރިއަންޓްކަން ދެނެގަނެވިފައި ވަނީ ދިއްލީގައި ހުންނަ ސީއެސްއައިއާރު އިންސްޓިޓިއުޓް އޮފް ޖެނޯމިކްސް އެންޑް އިންޓެގްރެވިޓީ ބަޔޮލޮޖީއަށް ފޮނުވައި ޓެސްޓުކުރުމުންނެވެ. އޭނާ މަރުވެފައި ވަނީ ޖޫން 14 ވަނަ ދުވަހުއެވެ. އެއީ އެއްވެސް ތަނަކަށް ދަތުރުކޮށްފައި ނުވާ މީހެއްކަމަށް ނޫސްތަކުގައިވެއެވެ.

އުއްތަރު ޕްރަދޭޝުން މިހަފުތާގެ ތެރޭގައި ޑެލްޓާ ޕްލަސްގެ ދެ ކޭސް ފެނިފައިވާ އިރު، ޖެނޯމް ސީކުއެންސް ހެދުމަށް 2،000ށް ވުރެ ގިނަ ސާމްޕަލް ވަނީ ފޮނުވާފައެވެ. އެ ސްޓޭޓުން ފެނުނު މި ތިން ކޭހުގެ ތެރެއިން އެއްވެސް ކޭހަކީ އުއްތަރު ޕްރަދޭޝްއިން ބޭރަށް ދަތުރުކޮށްފައި ނުވާ ކޭހެއް ކަމަށާއި އެހެންކަމުން އެ ސްޓޭޓްގައި ކޮވިޑް މިއުޓޭޓްވާން ފަށާފައިވާކަން ސާބިތުވާ ކަމަށް މާހިރުން ބުނެއެވެ.

ކައްޕާ ވޭރިއަންޓަކީވެސް ޑެލްޓާ ޕްލަސް ވޭރިއަންޓް ފަދަ ނުރައްކާތެރި އައު ވޭރިއަންޓެކެއެވެ.