ކްލެމެންސީ ބޯޑުން އެންމެ ގިނަ މައްސަލަތައް ނިންމި އަހަރަކަށް މި އަހަރު
9 ޖުލައި 2021 | ހުކުރު 07:38މި އަހަރުގެ ޖޫންގެ ނިޔަލަށް 429 މައްސަލަ ބޯޑުން ވަނީ ނިންމާފައި
ބަންޑާރަ ނައިބް އިބްރާހިމް ރިފްއަތު
ފާއިތުވެދިޔަ 11 އަހަރުގެ ތެރޭގައި މައްސަލަތައް ނިންމާފައި ނުވާ އަދަދަކަށް، މި އަހަރުގެ ހަ މަސް ދުވަހުގެ ތެރޭގައި އެކަނިވެސް ކްލެމެންސީ ބޯޑުން މައްސަލަތައް ނިންމައިފިއެވެ.
ކްލެމެންސީ ބޯޑަކީ މާފުދިނުމާއި އަދަބު ލުއިކޮށްދިނުމުގެ ގާނޫނުގެ ދަށުން ރައީސުލްޖުމްހޫރިއްޔާ އުފައްދަވާފައިވާ ބޯޑެކެވެ. ކްލެމެންސީ ބޯޑު ހަރަކާތްތެރިވާނީ އެޓަރނީ ޖެނެރަލްގެ ބެއްލެވުމުގެ ދަށުންނެވެ. ބޯޑުގެ ރައީސަކީ އެޓަރނީ ޖެނަރަލްއެވެ.
ކްލެމެންސީ ބޯޑުގެ ތަފާސްހިސާބުތަކުން ދައްކާ ގޮތުން މި އަހަރުގެ ޖޫންގެ ނިޔަލަށް 429 މައްސަލަ ބޯޑުން ވަނީ ނިންމާފައެވެ. މިއީ ފާއިތުވި 11 އަހަރުގެ ތެރޭގައި މިހާ ގިނަ އަދަދަކަށް މައްސަލަތައް ނިންމި ފުރަތަމަ ފަހަރެވެ. ވޭތުވެދިޔަ 11 އަހަރު އެވްރެޖުކޮށް ނިންމި މައްސަލަތަކާ އަޅާ ބަލާއިރު މިއީ 250 ޕަސެންޓް އިތުރުވުމެކެވެ. މި ނޫނީ އެ ބޯޑުން އެންމެ ގިނަ މައްސަލަ ނިންމާފައި ވަނީ 2016 ވަނަ އަހަރު އެވެ. އެއީ 307 މައްސަލައެވެ. ބޯޑުން އެންމެ މަދުން މައްސަލަ ނިންމާފައި ވަނީ 2012 ވަނަ އަހަރުއެވެ. އެއީ 33 މައްސަލައެވެ.
ކްލެމެންސީ ބޯޑުގެ ތަފާސްހިސާބުތަކުން ދައްކާ ގޮތުން މި އަހަރު ބޭއްވުމަށް އެޖެންޑާކޮށްފައި ވަނީ 23 ބައްދަލުވުމެވެ. އޭގެ ތެރެއިން އެއްވެސް ބައްދަލުވުމެއް ކެންސަލްކޮށްފައެއް ނުވެއެވެ. އަދި ވޭތުވެދިޔަ ދެ އަހަރު ވެސް އެ ބޯޑުން ބާއްވަން އެޖެންޑާކުރި އެއްވެސް ޖަލްސާއެއް ކޯރަމް ހަމަނުވެގެން ކެންސަލްކުރަން ޖެހިފައެއް ނުވެއެވެ. ކޯރަމް ހަމަނުވެގެން މިހާތަނަށް އެންމެ ގިނަ ބައްދަލުވުން ކެންސަލްކޮށްފައި ވަނީ 2011 ގައެވެ. އެ އަހަރު ތާވަލްކުރި 37 ބައްދަލުވުމުގެ ތެރެއިން 25 ބައްދަލުވުން ކެންސަލްކޮށްފައިވެއެވެ. މިހާތަނަށް ބޯޑުގެ އެންމެ ގިނަ ބައްދަލުވުންތައް ތާވަލްކޮށްފައި ވަނީ 2010 ގައެވެ. އެގޮތުން 2010 ވަނަ އަހަރު 59 ބައްދަލުވުން ތާވަލުކުރިއިރު، އޭގެ ތެރެއިން 7 ބައްދަލުވުން ވަނީ ކެންސަލްކޮށްފައެވެ.
ބޯޑުގެ ތަފާސްހިސާބުތައް ދައްކާ ގޮތުން މި ދިޔަ އަހަރުގެ އިލްތިމާސްތަކުގެ ތެރެއިން 35 މައްސަލަ ނުނިމި އެބަހުއްޓެވެ. އަދި 2021 ވަނަ އަހަރުގެ އިލްތިމާސްތަކުގެ ތެރެއިން 70 މައްސަލަ ނުނިމި އެބަހުއްޓެވެ. އަހަރު ފެށުނު އިރު ޖުމްލަ 637 އިލްތިމާސް ނުނިމި ހުރިއިރު ޖޫން މަހުގެ ނިޔަލަށް 144 އިލްތިމާސް ބޯޑަށް ހުށަހަޅާފައިވެއެވެ. އަހަރުގެ ފުރަތަމަ ހަ މަސް ދުވަހު 429 މައްސަލައެއްގައި ރައީސުލްޖުމްހޫރިއްޔާ އަށް އަރުވާނެ ލަފަޔަކާ ގުޅޭގޮތުން ގޮތް ނިންމާފައިވާއިރު، އެކިއެކި ސަބަބުތަކާ ހުރެ 247 އިލްތިމާސްއެއް ބާތިލްކުރަން ޖެހިފައިވެއެވެ.
ކްލެމެންސީ ބޯޑަކީ 11 މެމްބަރުންގެ މައްޗަށް އެކުލެވޭ ބޯޑެކެވެ. ބޯޑުގައި ހިމެނެނީ ޤާނޫނީ ދާއިރާއިން މީހަކާއި ތަޢުލީމީ ދާއިރާގެ މީހަކާއި އިޖުތިމާއީ ދާއިރާގެ މީހަކާއި ޞިއްޙީ ދާއިރާގެ މީހަކާއި ދީނީ ޢިލްމުވެރިންގެ ތެރެއިން މީހަކާއި މަދަނީ ޖަމްޢިއްޔާއެއްގެ މީހެއްގެ އިތުރުން ޕެރޯލް ބޯޑުގެ މެންބަރެކެވެ.
