މައްސަލަތައް ނުނިމި ޝަރީއަތް ނިމެންދެން ބަންދުގައި ތިބި މީހުންގެ ތެރޭގައި 6 އަހަރު ދުވަހު ބަންދުގައި ތިބި މީހުން އެބަތިބިކަމަށް ޕްރޮސެކިއުޓަރ ޖެނެރަލްގެ އޮފީހުން ބުނެފިއެވެ.

ޖިނާއީ މައްސަލަތަކުގައި ތަހުގީގަށް ބަންދުކުރެވޭ މީހުންނާއި، ޝަރީއަތް ނިމެންދެން ބަންދުކުރެވޭ މީހުންނާގުޅޭ ގޮތުން ޕްރޮސިކިއުޓަރ ޖެނެރަލްގެ އޮފީހުންކޮށްފައިވާ މަސައްކަތުގެ މައްޗަށް ތައްޔާރުކޮށް ރައްޔިތުންގެ މަޖިލީހަށް ހުށަހަޅާ ހާއްސަ ރިޕޯޓް އާންމުކޮށްފައިވާ އިރު، ޖިނާއީ އަދުލުގެ ނިޒާމަށް މިވަގުތު ދިމާވެފައިވާ އެންމެ ބޮޑު އެއް ގޮންޖެހުމަކީ، ޝަރީއަތް ނިމެންދެން ބަންދުގައި ގިނަ ބަޔަކު ތިބުން ކަމަށް ރިޕޯޓްގައި ވަނީ ބުނެފައެވެ. އެގޮތުން ބަންދުގައި ތިބި މީހުންގެ ތެރޭގައި މައްސަލަތައް ނުނިމި 6 ނުވަތަ 5 އަހަރު ވެފައި ތިބިމީހުން އެބަ ތިބިކަމަށާއި މިއީ ކަންބޮޑުވާ ކަމެއް ކަމަށް ވަނީ ބުނެފައެވެ.

ޝަރީޢަތް ނިމެންދެން ބަންދުގައި ތިބި މީހުންގެ ތަފާސްހިސާބު ޕްރޮސިކިއުޓަރ ޖެނެރަލް އޮފީހުން އަންނަނީ ބަލަހައްޓަމުން ކަމަށާއި ތަފާސްހިސާބު ދައްކާ ގޮތުން މި ރިޕޯޓުގެ މުއްދަތުގައި 343 މީހަކު ޝަރީޢަތް ނިމެންދެން ބަންދުކޮށްފައި ތިބިކަަމަށް ޕީޖީން ބުނެއެވެ. ޕީޖީން ބުނީ އޭގެ ތެރެއިން 38 މީހުންނަކީ ރިމާންޑް ޖަލުތަކުގެ ޖާގައިގެ ދަތިކަމާހެދި ރިމާންޑްޖަލަކަށް ބަދަލު ނުކުރެވި ތިބި މީހުންކަމަށެވެ. އަދި ރިމާންޑު ޖަލަށް ބަދަލުނުކުރެވި ތިބި މީހުންގެ ތެރޭގައި 219 ދުވަސްވެފައި ތިބި މީހުން ވެސް އެބަތިބި ކަމަށާއި ރިމާންޑު މަރުކަޒުތަކަށް ބަލާއިރު މާލޭ ޖަލުގައި 135 މީހުން، މާފުށިޖަލުގައި 150 މީހުން، ހުޅުމާލެ ޖަލުގައި 12 މީހުން، ގޭ ބަންދުގައި 7 މީހަކު އަދި އައްސޭރި ޖަލުގައި ކުޑަކުއްޖަކު ހުރިކަމަށް ޕީޖީގެ ރިޕޯޓްގައިވެއެވެ.

ޕީޖީން އާންމުކުރި ރިޕޯޓްގައިވާ ގޮތުން ބަންޑާރަ ނާއިބުގެ ސިޔާސަތަށް އަމަލުކުރުމުގެ ގޮތުން، ޝަރީޢަތް ނިމެންދެން ބަންދުގައި ތިބި މީހުންގެ ތެރެއިން، އެމީހެއްގެ ބަންދުގެ މުއްދަތު 30 ދުވަސްވާ ކޮންމެ މީހެއްގެ މައްސަލަ ވަކިން ނަގައި، އެމީހަކީ ބަންދުގައި ހުންނަންޖެހޭ މީހެއްކަން ނުވަތަ ނޫންކަން ދެނެގަތުމުގެ މަސައްކަތް ވަނީ ކޮށްފައެވެ. އަދި އެމީހެއްގެ ބަންދާމެދު އިތުރު ގޮތެއް ނިންމަންޖެހޭކަން ނުވަތަ ނޫންކަމާމެދު ގޮތް ނިންމާފައިވާ ކަމަށާއި އެ މަސައްކަތް ކުރިއަށް ގެންގޮސްފައި ވަނީ އެކަމަށް ކަނޑައެޅިފައިވާ ފޯމެއް މެދުވެރިކޮށް ކަމަށް ޕީޖީން ބުނެއެވެ.

ރިޕޯޓްގައިވާ ގޮތުން އެ މައްސަލައެއްގައި އެވަގުތުގެ ޙާލަތަށް ބަލައި، ބަންދުން ލުއި ދެވެން ހުރި މީހުންނަށް ލުއި ދީފައިވާއިރު ޝަރީޢަތް ނިމެންދެން ބަންދުގައި ތިބީ، ކޮންމެހެން ބަންދުގައި ތިބެންޖެހޭ މީހުންކަން ނުވަތަ ނޫންކަން ކަށަވަރުކޮށް، ކުދިކުދި ކުށްތަކަށް ތުހުމަތު ކުރެވޭ މީހުންނާއި، އެމީހުންގެ ސަބަބުން މުޖްތަމަޢަށް ނުރައްކާވާނެ ކަމުގެ އިޙްތިމާލެއް ނެތް މީހުންނާއި، އެމީހުންގެ މައްޗަށް ކުށް ސާބިތުވެއްޖެނަމަ، އަންނާނެ އަދަބާއި ބަންދުގައި އެހާތަނަށް ހުރި މުއްދަތާ ދާދި ހަމަހަމަވާ ޙާލަތުގައި ތިބި މީހުން، ޝަރުތުތަކާއެކު ބަންދުން ވީއްލުމަށް ޕީޖީން އިސްކަންދީފައިވެއެވެ.

ޕޖީން ވަނީ މި މަސައްކަތް ކުރިއަށް ގެންދިޔައިރު، ކުޑަކުދިންނަށް ޖިންސީ ގޯނާކުރާކަމުގެ ތުހުމަތާއި، ނުރައްކާތެރި ހަތިޔާރުގެންގުޅޭ ކަމުގެ ތުހުމަތާއި، މީހުން މެރުމުގެ ތުހުމަތާއި، މަސްތުވާތަކެތީގެ ނެޓްވޯރކްތައް ހަދައިގެން ވިޔަފާރިކުރާކަމުގެ ތުހުމަތުގައިވާ މީހުންނާއި، ރާއްޖެއަށް މަސްތުވާތަކެތި އެތެރެކުރާކަމަށް ތުހުމަތު ކުރެވޭ މީހުންނާއި، ކިތަންމެ ކުޑަ ނަމަވެސް، އެމީހެއްގެ ސަބަބުން މުޖުތަމައުއަށް ނުރައްކަލެއް ވެދާނެ ކަމަށް ގަބޫލުކުރެވޭ ސަބަބުތައް ހުރި މީހުން ދޫކޮށްލާފައި ނުވާކަން ފާހަގަކޮށްފައެވެ.

ރިމާންޑް ޖަލުތަކުގެ ޖާގައިގެ ދަތިކަމާއި ކޮވިޑް19 އާ ގުޅިގެން އަޅައިފައިވާ ފިޔަވަޅުތަކުގެ ސަބަބުން ދިމާވި ކަންކަމާ ގުޅިގެން، ރިޕޯޓު ތައްޔާކުރި އިރު ރިމާންޑް ޖަލެއްގައި ބައިތިއްބުމަށް އަމުރުކޮށްފައިވާ 38 މީހަކު ކަސްޓޯޑިއަލް ޖަލުގައި އެބަތިބިކަމަށާއި މިކަމާބެހޭ ގޮތުން ތަފާތު ޝަކުވާ ލިބިފައިވާކަމަށް ޕީޖީ އޮފީހުން ބުނެއެވެ. ނަމަވެސް ކޮވިޑްގެ ފިޔަވަޅުތައް ހުރި ގޮތުން، މިގޮތަށް މީހުން ބަންދުގައި ހުރުމަކީ މިހާލަތުގެ ގޮތުން މެދުވެރިވި މަޖުބޫރީ ނަތީޖާއެއް ކަމަށާއި މިހާލަތް ފިޔަވައި، އެހެން ހާލަތެއްގައި، ބަންދުކުރުމުގެ ހުއްދަ އޮތް މަރުކަޒެއް ފިޔަވައި އެހެން ތަނެއްގައި މީހަކު ހައްޔަރުކޮށްފައި ހުރިކަމުގެ މަޢުލޫމާތެއް ނުވަތަ ޝަކުވާއެއް ޕީޖީ އޮފީހަށް ލިބިފައި ނުވާކަމަށް ރިޕޯޓްގައިވެއެވެ.