ޔޫރޯ 2020 - ލަނޑު ލިސްޓުގެ ކުރީގައި ރޮނާލްޑޯ އާއި ޝިކް

ޔޫރޯ 2020 ފުޓުބޯޅަ މުބާރާތް ނިމުމަކާ ގާތްވެފައިވާއިރު، މި މުބާރާތަކީ ވާދަވެރިކަން ބޮޑު މުބާރާތެއް ކަމަށް ގިނަ ބަޔަކު ގަބޫލުކުރެއެވެ. ގައުމުތަކުގެ ވާދަވެރިކަމާއި، ކުޅުންތެރިންގެ ވާދަވެރިކަންވެސް މި މުބާރާތުގައި ބޮޑެވެ. އެކަން އެނގޭ އެއް ކަމަކީ މި މުބާރާތުގެ ލަނޑު ލިސްޓުގެ ވާދަވެރިކަމުންނެވެ.

މި މުބާރާތުގައި އެންމެ ގިނަ ލަނޑު ޖަހަގައިން ޕޯޗުގަލުގެ ކެޕްޓަން ކްރިސްޓިއާނޯ ރޮނާލްޑޯ ލަނޑު ލިސްޓުގެ އެއްވަނައިގައި އޮތްއިރު، މި މުބާރާތުގައި ރޮނާލްޑޯ ވަނީ ފަސް ލަނޑު ކާމިޔާބުކޮށްފައެވެ. ޔޫރޯގެ ތާރީޚުގައި އެންމެ ގިނަ ލަނޑުވެސް ޖަހާފައިވާ ކުޅުންތެރިޔާ މިހާތަނަށް ވަނީ ޔޫރޯގައި ޖުމްލަ 14 ލަނޑު ޖަހާފައެވެ. އެކަމަކު މުބާރާތުގެ ދެވަނަ ބުރުން ޕޯޗުގަލް ކަޓާފައިވުމާއެކު، މުބާރާތް ނިމޭއިރު ލަނޑު ލިސްޓުގެ އެއްވަނައިގައި ރޮނާލްޑޯގެ ނަން އޮތުމަކީ ނާދިރު ކަމެކެވެ.

މި ލިސްޓުގެ ދެވަނައިގައި އޮތް ޗެކް ރިޕަބްލިކުގެ ތަރި ޕެޓްރިކް ޝިކްވެސް ވަނީ މިހާތަނަށް ފަސް ލަނޑު ޖަހާފައެވެ. އެކަމަކު ލިސްޓުގެ ދެވަނައަށް ޝިކް ވެއްޓެނީ ލިސްޓުގެ އެއްވަނައިގައި އޮތް ރޮނާލްޑޯ ފަސް ލަނޑާއެކު އެއް ލަނޑު ޖެހުމަށް އެހީތެރިވެދީފައިވާތީއެވެ. ޔުއެފާއިން ނެރުނު އައު ގަވާއިދު ބުނާ ގޮތުން ލަނޑު ލިސްޓުގައި ދެ ކުޅުންތެރިން އެއް އަދަދަކަށް ލަނޑު ޖަހާފައިވާނަމަ، ދެން ބަލާނީ އެސިސްޓަށެވެ. އެކަމަކު މި މުބާރާތުގެ ކުއާޓާ ފައިނަލުން ޗެކް ރިޕަބްލިކް ކަޓާފައިވުމާއެކު، މި ލިސްޓުގެ ދެވަނަ ޝިކްއަށް ގެއްލުމަކީވެސް އެކަށީގެންވާ ކަމެކެވެ.

މި ލިސްޓުގެ ތިންވަނައިގައި އޮތް ފްރާންސްގެ ފޯވާޑް ކަރިމް ބެންޒެމާއާ، ސްވިޑެންގެ މިޑްފީލްޑަރު އެމީލް ފޯސްބާގް އަދި ބެލްޖިއަމުގެ ފޯވާޑް ރޮމެލޫ ލުކާކޫ ވަނީ ހަތަރު ލަނޑު ޖަހާފައެވެ. އެކަމަކު ޔޫރޯގެ ދެވަނަ ބުރުން ފްރާންސް އާއި ސްވިޑެން ކަޓާފައިވާއިރު، ކުއާޓާ ފައިނަލުން އިޓަލީ އަތުން ބަލިވެ ބެލްޖިއަމްވެސް ވަނީ ކަޓާފައެވެ.

ލަނޑު ލިސްޓުގެ އެއްވަނައަށް އެރުމުގެ ފުރުސަތު އެންމެ ބޮޑު ކުޅުންތެރިންނަކީ ޑެންމާކުގެ ފޯވާޑް ކެސްޕާ ޑޯލްބާގާއި، އިންގްލެންޑްގެ ފޯވާޑް ރަހީމް ސްޓާލިން އަދި ކެޕްޓަން ހެރީ ކޭންއަށެވެ. މިއިން ކޮންމެ ކުޅުންތެރިއަކުވެސް މިހާތަނަށް ވަނީ ތިން ލަނޑު ކާމިޔާބުކޮށްފައެވެ. އެހެންކަމުން ކުރިއަށް އޮތް މެޗުގައި ދެ ލަނޑު ކާމިޔާބުކޮށްގެންވެސް މި ކުޅުންތެރިންއަށް ލަނޑު ލިސްޓުގެ އެއްވަނައަށް އެރުމުގެ ފުރުސަތު އެބައޮތެވެ.