ރާއްޖޭގެ ރަށްރަށުގައި އަޅަމުންދަނީ 'ތާޖް މަހަލް" ފަދަ ރީތި އިންޖީނުގެތަކެއް - ފިރުޝާން

ރާއްޖޭގެ ރަށްރަށުގައި އަޅަމުންދަނީ 'ތާޖް މަހަލް" ފަދަ ރީތީ އިންޖީނުގެތަކެއް ކަމަށް މަޑަވެލި ދާއިރާގެ މެންބަރު ހުސައިން ފިރުޝާން ވިދާޅުވެއްޖެއެވެ.

ގަލޮޅު ދެކުނު ދާއިރާގެ މެންބަރު މީކާއީލު އަޙްމަދު ނަސީމް ހުށަހަޅުއްވާފައިވާ، ސްޓެލްކޯގެ ޖަނަރޭޓަރުތަކާއި ދުންހޮޅިތަކާއި ތެޔޮތާނގީތައް މީހުން ދިރިއުޅޭ ސަރަޙައްދާ މާ ގާތުގައި ބެހެއްޓުމުގެ ސަބަބުން، އެ ސަރަޙައްދުގައި ދިރިއުޅެމުންދާ ރައްޔިތުންނަށް ލިބެމުންދާ ގެއްލުންތަކަށް ހައްލެއް ހޯދައިދިނުމަށް އެދި ހުށަހަޅާފައިވާ ޤަރާރަށް ބަހުސް ކުރައްވަމުން ފިރުޝާން ވިދާޅުވީ، މި މައްސަލައަކީ ރަށްރަށުގައި ވެސް ބޮޑު މައްސަލައެއް ކަމަށެވެ. މިކަމުގެ ސަބަބުން ސިއްޙީ ގެއްލުންތައް ލިބެމުންދާކަމަށް ފިރުޝާން ވިދާޅުވިއެވެ.

މިކަމަކީ އަންދާޒާ ވެސް ނުކުރެވޭ ވަރުގެ ގެއްލުމެއް ރައްޔިތުންނަށް ލިބެމުންދާ ކަމެއް ކަމަށާއި، މިކަމަށް ހައްލެއް ލިބެން ޖެހޭ ކަމަށެވެ. މީހުން ދިރި ނޫޅޭ ސަރަހައްދުތަކަށް އިންޖީނުގެތައް ބަދަލުކުރުމުގެ މަސައްކަތް މިހާރު ކުރަމުން އަންނަ ކަމަށެެވެ. އަދި ރަށްރަށުގެ ކަރަންޓުގެ ޚިދުމަތް ދެމުން އަންނަ ކުންފުނި ފެނަކައިން މިހާރު ރާއްޖޭގެ ރަށްރަށުގައި 'ތާޖު މަހަލް' ފަދަ ރީތި އިންޖީނުގެތަކެއް އަޅަމުންދާ ކަމަށެވެ. އެބަދަލު އެހެން ކުންފުނިތަކުން ވެސް ގެންނަން ޖެހޭ ކަމަށް ފިރުޝާން ވިދާޅުވިއެވެ.

މަޑަވެލި، ހޯޑެއްދޫގެ އިންޖީނުގެ އެއްކޮށްލައި، ވަކި ރަށަކަށް ގެންދިޔުމަށް ފެނަކައިން ހަދާފައިވާ ޕްލޭންނަށް މަސައްކަތް ނުފެށިގެން އުޅެނީ، ފިނޭންސުން ލިބެންޖެހޭ ހުއްދައެއް ނުލިބިގެން ކަމަށް ފިރުޝާން ވިދާޅުވިއެވެ. އަދި އެ ހުއްދަ ދެއްވުމަށް އެދޭ ކަމަށެވެ.

އިންޖީނުގެތައް މީހުން ދިރިނުއުޅޭ ސަރަހައްދަށް ގެންދިޔުމަށް ގައުމީ ސިޔާސަތެއް އޮންނަން ޖެހޭ ކަމަށް ފިރުޝާން ވިދާޅުވިއެވެ.