ނަފުރަތުގެ ބިލަށް އެމްއާރްއެމް އިން ތާއީދެއް ނޫން

ނަފްރަތުގެ ބިލަށް އެމްއާރްއެމުން ތާއީދު ނުކުރާ ކަމަށް އެ ޕާޓީން ބުނެފިއެވެ.

ސަރުކާރު ކޮލިޝަންގައި ވެސް ހިމެނޭ މޯލްޑިވްސް ރިފޯމް މޫވްމެންޓް، އެމްއާރްއެމުން ބުނީ، ނަފްރަތުގެ ޢަމަލަކީ ޖިނާއީ ކުށެއްގެ ގޮތުގައި ކަނޑައެޅުމަށްޓަކައި ދިވެހިރާއްޖޭގެ ޤާނޫނުލްޢުޤޫބާތަށް މިހާރު ހުށަހަޅާފައިވާ އިސްލާޙުތަކަށް ތާއީދު ނުކުރެވޭ ކަމަށް އެމް.އާރް.އެމް އެކްސްކޯ ބައްދަލުވުމުގައި ނިންމާފައިވާ ކަމަށާއި، އެބިލުގައި ހުރި ކަންބޮޑުވުންތައް ސަރުކާރާ ހިއްސާ ކުރުމަށް ވެސް ނިންމާފައިވާ ކަމަށެވެ.

ނަފްރަތުގެ އަމަލުތަކަކީ ޖިނާއީ ކުށެއްގެ ގޮތުގައި ކަނޑައެޅުމަށް ގާނޫނުލް އުގޫބާތުގެ 124 ވަނަ މާއްދާއަށް ތުޅާދޫ ދާއިރާގެ މެމްބަރު ހިސާން ހުސައިން ހުށަހެޅުއްވި އިސްލާހު ޖުޑިޝަރީ ކޮމިޓީން ދިރާސާކުރުމަށްފަހު މިހާރު ވަނީ މަޖިލީހުގެ ތަޅުމަށް ފޮނުވާފައެވެ. ޖުޑިޝަރީ ކޮމިޓީން ބިލަށް ބޮޑެތި އިސްލާހުތަކެއް ގެނެސްފައިވެއެވެ. އެގޮތުން ވަކިވަކި މާއްދާތަކަށް އިސްލާހު ގެނެސް ނަފުރަތުގެ އަމަލުތައް ފުޅާ ދާއިރާއެއްގައި މާނަ ކުރެވޭނެ ގޮތަށްވަނީ އިސްލާހުކޮށްފައެވެ.

ކޮމިޓީ މަރުހަލާގައި އިސްލާމިކް މިނިސްޓްރީ އާއި ޕްރޮސެކިޔުޓަރ ޖެނެރަލް އަދި ހިޔުމަން ރައިޓްސް ކޮމިޝަން އޮފް ދަ މޯލްޑިވްސް އިން ޚިޔާލު ހޯދިއެވެ. މީގެއިތުރުން މި ބިލަކީ އާންމުންގެ މަސްލަހަތު ބޮޑު ބިލަކަށް ވުމުން އާންމުންގެ ޚިޔާލު ހޯދުމަށް ކޮމިޓީން ނިންމީކަމަށް ވެސް ކޮމިޓީ ރިޕޯޓްގައި ބުނެފައިވެއެވެ. އެގޮތުން ހުޅުވާލި ފުރުސަތުގައި ގާތްގަނޑަކަށް 2462 ޚިޔާލު އާންމުންގެ ފަރާތުންނާއި ޖަމުޢިއްޔާ ޖަމާއަތްތަކުން ކޮމިޓީއަށް ލިބިފައިވާކަމަށް ކޮމިޓީ ރިޕޯޓްގައި ބުނެފައިވެއެވެ.