ހުޅުމާލެ ދެވަނަފިޔަވަހީގައި މަރާލާފައި އޮއްވާ ފެނުނު 13 އަހަރުގެ ފިރިހެން ކުއްޖާގެ ހަށިގަނޑު މާދަމާ ޕޯސްޓްމޯޓަމް އަށް ފޮނުވަން ހަމަޖެހިފައިވާ ކަމަށް ފުލުހުން ބުނެފިއެވެ.

ރަހީނުކޮށް މަރާލި ކުއްޖާގެ ހަށިގަނޑު މިދިޔަ ހަފުތާ ތެރޭގައި ޕޯސްޓްމޯޓަމް އަށް ފޮނުވާނެ ކަމަށް ފުލުހުން ކުރިން ބުނެފައިވެއެވެ. އެކަމަކު ފޮނުވާފައެއް ނުވެއެވެ. އެކަމާ ގުޅިގެން ފުލުހުންގެ މީޑިއާ އޮފިސަރު ވިދާޅުވީ އެ ކުއްޖާގެ ހަށިގަނޑު ހޯމަ ދުވަހު ޕޯސްޓްމޯޓަމް އަށް ފޮނުވާނެ ކަމަށެވެ. އަދި އެކަމަށް ވާން ޖެހޭ ހުރިހާ ތައްޔާރީއެއް ވެފައިވާ ކަމަށް ވެސް ވިދާޅުވެފައިވެއެވެ.

ފުލުހުން ބުނެފައިވަނީ 13 އަހަރުގެ ފިރިހެން ކުއްޖަކު ރަހީނުކޮށްގެން ގެންގުޅޭ މައްސަލައެއް ޖޫން މަހުގެ 20 ވަނަ ދުވަހު ރިޕޯޓް ކޮށްފައިވާތީ، އެ ކުއްޖާ ހޯދުމުގެ މަސައްކަތް ކުރަމުންދަނިކޮށް، ކުއްޖާ މަރާލާފައި އޮއްވައި ފެނުނީ ޖޫން މަހުގެ 21 ވަނަ ދުވަހުގެ ރޭ، ދަންވަރު 2:38ހާއިރު ކަމަށެވެ.

މި މައްސަލައާ ގުޅިގެން 17 އަހަރުގެ ދިވެހި ފިރިހެން ކުއްޖަކާއި 27 އަހަރުގެ ދިވެހި ފިރިހެނަކު ހައްޔަރުކޮށްފައިވެއެވެ. 27 އަހަރުގެ މީހާ ޝަރީއަތް ނިމެންދެން ބަންދުކުރުމަށް ނިންމާފައިވާއިރު، 17 އަހަރުގެ ކުއްޖާގެ ބަންދަށް 15 ދުވަސް ވަނީ ޖަހާފައެވެ. ދެ މީހުންގެ މައްޗަށް ވެސް ގަސްދުގައި މީހަކު މެރުން، މާރާމާރީ ހިންގުން، ރަހީނުކުރުން، އަދި ކުޑަކުއްޖަކާ މެދު ޖިންސީ ގޯނާކުރުމުގެ ތުހުމަތު ވަނީ ކޮށްފައެވެ.

ފުލުުހުން ބުނީ މި މައްސަލަ ވަރަށް ސީރިއަސް މައްސަލައެއްގެ ގޮތުގައި ތަހުގީގު ކުރަމުން އަންނައިރު، ތަހުގީގަށް ބޮޑު ކުރިއެރުމެއް ލިބިފައިވާ ކަމަށެވެ.