އެމްއެންޔޫގެ ލެކްޗަރާ ޝައިޚު އަލީ ޒައިދަށް އެ ޔުނިވާސިޓީން ފިޔަވަޅު އަޅައިފި

މަޝްހޫރު ދީނީ އިލްމުވެރިޔާ އަދި ރާއްޖޭގެ ގައުމީ ޔުނިވަސިޓީ (އެމްއެންޔޫ)ގެ ލެކްޗަރާ ޝައިޚު އަލީ ޒައިދަށް އެޔުނިވާސިޓީން ފިޔަވަޅު އަޅައިފިއެވެ.

ޝައިޚު ޒައިދު ކުރެއްވި ޓްވީޓެއްގައި ވިދާޅުވީ ކޮށްފައިވާ ޓްވީޓްތަކާ ގުޅިގެން ބާރު ސްޕީޑްގައި މިހާތަނަށް ދެފިޔަވަޅެއް އަޅާފައިވާ ކަމަށެވެ. އަދި ވަކީލު ކުރަނީ މާތްﷲއަށް ކަމަށާއި ބިރުވެތި ވަނީ ވެސް އެކަލާނގެއަށް ކަމަށް ޒައިދު ވިދާޅުވެފައި ވެއެވެ.

އެމްއެންޔޫގައި އޮންނަނީ ފަސް ފިޔަވަޅުކަން ފާހަގަކުރައްވައި ޝައިޚު ޒައިދު ވިދާޅުވީ އެއީ އަނގަބަހުން ނަސޭހަތް ދިނުން، ލިޔުމުން ނަސޭހަތް ދިނުން، އިންޒާރު ދިނުން، ސަސްޕެންޑް ކުރުން އަދި ކަނޑާލުން ކަމަށެވެ.

މިމައްސަލައާ ގުޅިގެން އެމްއެންޔޫއިން ބުނީ ޝައިޚު ޒައިދުއާ ގުޅޭ ގޮތުން ޔުނިވާސިޓީއަށް ހުށަހަޅާފައިވާ މައްސަލަތަކާއި ގުޅިގެން އުސޫލާ އެއްގޮތަށް ފިޔަވަޅު އަޅާފައިވާ ކަމަށެވެ.

ޝައިޚު ޒައިދަށް ފިޔަވަޅު އަޅާފައިވާއިރު، އެމްއެންޔޫގެ އެސިސްޓެންޓް ޕްރޮފެސަރު ގެ މަގާމުގައި ހުންނެވި މަޝްހޫރު ދިނީ އިލްމުވެރިޔާ ޑރ. މުހައްމަދު އިޔާޒް އަބްދުއްލަތީފް މިމަހުގެ އެއްވަނަ ދުވަހު ވަޒީފާއިން ވަނީ ކޮށްފައެވެ. އޭނާ ވަޒީފާއިން ވަކިކުރީ އަންހެންކުދިން ޚިތާނު ކުރުމާ ބެހޭ ގޮތުން ސޯޝަލް މީޑިއާގައި އޭނާ ފާޅު ކުރެއްވި ޚިޔާލުތަކެއްގެ މައްސަލަ ފެންމަތިވެ، އެ މައްސަލަ އިސްލާމިކް މިނިސްޓްރީން ވެސް ބަލަމުން ދަނިކޮށެވެ.

ޑރ.އިޔާޒު ވަޒީފާއިން ވަކިކުރުމާއި ގުޅިގެން އެކަން ކުށްވެރިކޮށް އަދާލަތު ޕާޓީން ވަނީ ޔުނިވާސިޓީއަށް ބޮޑެތި ތުހުމަތުތަކެއް ވެސް ކޮށްފައެވެ. އެގޮތުން ޔުނިވާސިޓީއަށް ސިޔާސީ ނުފޫޒު ފޯރާފައިވާ ކަމަށް އެޕާޓީން ބުނެފައިވެއެވެ.