ބެލްޖިއަމް ކަޓުވާލައި އިޓަލީ ސެމީއަށް

ޔޫރޯ 2020 ގެ ކުއާޓާ ފައިނަލުން ބެލްޖިއަމް ކަޓުވާލުމަށްފަހު ސެމީ ފައިނަލަށް އިޓަލީ ދަތުރުކޮށްފިއެވެ.

ހުކުރު ދުވަހުގެރޭ ޖަރުމަނުގެ އަލިއާންޒް އެރީނާގައި ކުޅުނު މެޗުން އިޓަލީ މޮޅުވީ 2-1 ގެ ނަތީޖާއަކުންނެވެ.

މި މެޗު ފަށައިގެން ދެ ޓީމުގެ ފަރާތުން ރަނގަޅު ކުޅުމެއް ފެނިގެންދިޔައިރު، މެޗުގައި އެންމެ ފުރަތަމަ ލަނޑު ޖަހާ ލީޑު ނެގީ އިޓަލީންނެވެ. މާކޯ ވެރާޓީގެ އެހީތެރިކަމާއެކު މެޗުގެ 31 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ ނިކޯލޯ ބަރެއްލާއެވެ. އަދި މެޗުގެ 44 ވަނަ މިނެޓުގައި ލޮރެންޒޯ އިންސިނިއޭ ވަނީ ހިތްގައިމު ލަނޑެއް ޖަހައި، އިޓަލީގެ ލީޑު ފުޅާކޮށްދީފައެވެ.

ނަމަވެސް ފުރަތަމަ ހާފު ނިމުމުގެ ކުރިން ބެލްޖިއަމުން ވަނީ ލަނޑެއް ޖަހައި ފަރަގު ކުޑަކޮށްފައެވެ. ފުރަތަމަ ހާފުގެ އިތުރު ވަގުތުގައި ލިބުނު ޕެނަލްޓީއަކުން މި ލަނޑު އެ ޓީމަށް ކާމިޔާބުކޮށްދިނީ ރޮމެލޫ ލުކާކޫއެވެ. މިއީ އޭރިއާ ތެރެއިން ބެލްޖިއަމުގެ ޖެރެމީ ޑޯކޫއަށް އިޓަލީގެ ޖިއޮވާނީ ޑި ލޮރެންޒޯ ކުރި ފައުލަކަށް ރެފުރީ ދިން ޕެނަލްޓީއެކެވެ.

މި މެޗުގެ ދެވަނަ ހާފުގައި ބެލްޖިއަމުން އެ ޓީމުގެ އެޓޭކުތައް ވަރުގަދަ ކުރިއިރު، މި ހާފުގައި ބެލްޖިއަމުގެ ލުކާކޫއަށް ވަނީ ލަނޑު ޖަހަން ހުސް ދެ ފުރުސަތެއް ލިބި ބޭކާރުވެފައެވެ. އަދި އިޓަލީގެ އިންސިނިއޭ އާއި، ޗީރޯ އިމޮބެލީއަށްވެސް ވަނީ ލަނޑު ޖަހަން ފުރުސަތުތަކެއް ލިބި ބޭކާރުވެފައެވެ.

މި މޮޅާއެކު އިޓަލީ ސެމީއަށް ދަތުރުކުރިއިރު، ސެމީގައި އެ ޓީމު ބައްދަލުކުރަން ޖެހޭނީ ސްވިޓްޒަލެންޑް ބަލިކޮށް ސެމީއަށް ދަތުރުކުރި ސްޕެއިނާއެވެ.