ކުއާޓާ ފައިނަލް - ބެލްޖިއަމާއި އިޓަލީގެ ކުރިމަތިލުން

ޔޫރޯ 2020 ގެ ކުއާޓާ ފައިނަލުގައި އެންމެ ފޯރިގަދަވާނެ މެޗެއްގެ ގޮތުގައި ބެލެވިފައިވަނީ ދުނިޔޭގެ ރޭންކިންގެ އެއްވަނައިގައި އޮތް ބެލްޖިއަމާއި އިޓަލީގެ ކުރިމަތިލުމެވެ.

މި މުބާރާތުގެ ކުއާޓާއިން ބެލްޖިއަމް ޖާގަ ހޯދީ ދެވަނަ ބުރުގައި އެންމެ ފަހުގެ ޗެމްޕިއަން ޕޯޗުގަލް ކަޓުވާލުމަށްފަހުއެވެ. އެ މެޗުން ބެލްޖިއަމް މޮޅުވީ 1-0 ގެ ނަތީޖާއަކުންނެވެ. އެކަމަކު ފޯރިގަދަ ކުޅުމެއް ފެނިގެންދިޔަ މި މެޗުގައި ބެލްޖިއަމުގެ ކެޕްޓަން އެޑެން ހަޒާޑާއި، މިޑްފީލްޑަރު ކެވިން ޑި ބްރޭނާއަށް ވަނީ އަނިޔާވެފައެވެ. އެހެންކަމުން ކުއާޓާގައި މި ދެ ކުޅުންތެރިންނަށް ކުޅެވޭނެ ކަމާ މެދު ވަނީ ސުވާލުއުފެދިފައެވެ.

އެނެއްކޮޅުން ކުއާޓާގެ ޖާގައެއް އިޓަލީން ހޯދީ ދެވަނަ ބުރުގައި 2-1 ގެ ނަތީޖާއަކުން އޮސްޓްރިއާ ބަލިކޮށްގެންނެވެ. މި މެޗުގެ ފުރިހަމަ ވަގުތު ހަމަވިއިރު ދެ ޓީމުން ކުރެ ޓީމަކަށް ލަނޑެއް ޖެހިފައި ނުވާތީ ނަތީޖާ ނެރުނީ އިތުރު ވަގުތު ކުޅެގެންނެވެ. އިތުރު ވަގުތުގެ ފުރަތަމަ ހާފުގައި އިޓަލީން ވަނީ ދެ ލަނޑު ޖަހާފައެވެ. މި މެޗުގައި އޮސްޓްރިއާއިން ކާމިޔާބުކުރި ހަމައެކަނި ލަނޑު ފެނިގެންދިޔައީ އިތުރު ވަގުތުގެ ދެވަނަ ހާފު ނިމެން ކައިރިވެފައިވަނިކޮށެވެ. މިއީ އިޓަލީން ޖެހިޖެހިގެން މޮޅުވި 12 ވަނަ މެޗެވެ. އަދި އެންމެ ފަހުން ކުޅުނު 31 މެެޗުންވެސް އިޓަލީ ބަލިވެފައެއް ނުވެއެވެ. މިއީ އެ ގައުމުގެ ފުޓްބޯޅައިގެ އައު ރެކޯޑެކެވެ.

ބެލްޖިއަމް މެޗުގެ ކުރިން އިޓަލީގެ ކޯޗު ރޮބާޓޯ މަންޗިނީ ބުނީ އިޓަލީން މި މުބާރާތާއި ކުރިމަތިލީ ފައިނަލް ކުޅެ ތަށި ހޯދުމަށް ކަމަށާއި، އެކަން ކުރުމަށް ބެލްޖިއަމް ބަލިކުރަން ޖެހޭ ކަމަށެވެ. އެކަމަކު މި މެޗަކީ އުނދަގޫ މެޗަކަށްވާނެ ކަމަށާއި، ނަމަވެސް އިޓަލީގެ ކުޅުންތެރިން މި މެޗަށް ވަރަށް ރަނގަޅަށް ތައްޔާރުވެފައިވާ ކަމަށް މަންޗިނީ ވަނީ ބުނެފައެވެ.

ބެލްޖިއަމުގެ ކޯޗު ރޮބާޓޯ މާޓިނޭޒް ބުނީ އޭނާގެ ޓީމުގައި އަނިޔާގެ މައްސަލަ އެބަހުރި ކަމަށާއި، އެގޮތުން ބައެއް ކުޅުންތެރިން މި މެޗަށް ފިޓް ނޫން ކަމަށެވެ. އެކަމަކު އޭގެ އަސަރު ޓީމުގެ ކުޅުމުން ނުދައްކާނެ ކަމަށްވެސް ބުންޏެވެ. އިޓަލީއާ ބެހޭ ގޮތުން ވާހަކަ ދައްކަމުން މާޓިނޭޒް ބުނީ އިޓަލީއަކީ އެޓޭކުތަކުގައި ވަރުގަދަ ޓީމެއް ކަމަށާއި، އަނެއްކޮޅުން އެ ޓީމުގެ ޑިފެންސްވެސް ވަރުގަދަ ކަމަށެވެ. އެހެންކަމުން އިޓަލީގެ ގޯލު ފޫއަޅުވާލަން އުނދަގޫވާނެ ކަމަށްވެސް ވަނީ ބުނެފައެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓުންގެ ގޮތުގައި ބައިވެރިވެވަޑައިގަންނަވާނީ މުޙައްމަދު ނިޒާމް (ނިޒާމްބެ) އާއި އިސްމާޢީލް ޒަރިިޔަންދެވެ.

ބެލްޖިއަމާއި އިޓަލީ ބައްދަލުކުރާ މެޗު ފަށާނީ ހުކުރު ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.