ކުއާޓާ ފައިނަލް - ސްވިޓްޒަލެންޑާއި ސްޕެއިންގެ ކުރިމަތިލުން

ޔޫރޯ 2020 ގެ ކުއާޓާ ފައިނަލުގެ މެޗުތައް ހުކުރު ދުވަހުގެރޭ ފަށާއިރު، ފުރަތަމަ މެޗުގައި ބައްދަލުކުރާނީ ސްވިޓްޒަލެންޑާއި ސްޕެއިނެވެ.

ކުއާޓާގެ ފުރަތަމަ މެޗުގައި ސްވިޓްޒަލެންޑާއި ސްޕެއިން ބައްދަލުކުރާއިރު، ކުއާޓާއަށް ސްވިޓްޒަލެންޑް ދަތުރުކުރީ ދެވަނަ ބުރުގައި ޕެނަލްޓީ ޖަހައިގެން ދުނިޔޭގެ ޗެމްޕިއަން ފްރާންސް ބަލިކުރުމަށްފަހުއެވެ. މި މެޗު ވެގެންދިޔައީ މި މުބާރާތުގައި އެންމެ ފޯރިގަދަ އެއް މެޗަށެވެ. މެޗުގެ ފުރިހަމަ ވަގުތު ހަމަވިއިރު ދެ ޓީމު އޮތީ 3-3 ގެ ނަތީޖާއަކުން އެއްވަރުވެފައެވެ. އެހެންކަމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، މި ދެ ހާފުގައިވެސް ލަނޑެއް ފެނިފައެއް ނުވެއެވެ. އެއާއެކު މި މެޗުގެ ނަތީޖާ ނެރުނީ ޕެނަލްޓީ ޖަހައިގެންނެވެ.

މީގެ އިތުރުން ސްޕެއިން ކުއާޓާއަށް ދަތުރުކުރީ އެންމެ ފަހުގެ ފީފާ ވޯލްޑް ކަޕުގެ ރަނަރަޕް ޓީމު ކަމަށްވާ ކްރޮއޭޝިއާ ކަޓުވާލުމަށްފަހުއެވެ. މި މެޗުގެ ފުރިހަމަ ވަގުތު ނިމުނީވެސް 3-3 ގެ ނަތީޖާއަކުން އެއްވަރުވެގެންނެވެ. އެހެންކަމުން ނަތީޖާ ނެރުމަށް އިތުރު ވަގުތުގެ ދެ ހާފު ކުޅުނުއިރު، ފުރަތަމަ ހާފުގައި ސްޕެއިނުން ވަނީ ދެ ލަނޑު ޖަހައި، 5-3 ގެ ނަތީޖާއަކުން މި މެޗު ކާމިޔާބުކޮށްފައެވެ.

ސްވިޓްޒަލެންޑް މެޗުގެ ކުރިން ވާހަކަ ދައްކަމުން ސްޕެއިންގެ ކޯޗު ލުއިސް އެންރީކޭ ބުނީ މިދިޔަ މެޗުގައި ސްވިޓްޒަލެންޑުން އެ ޓީމުގެ ފެންވަރު ސާބިތުކޮށްދީފައިވާ ކަމަށާއި، އެގޮތުން ފްރާންސް ކަހަލަ ވަރުގަދަ ޓީމެއް ބަލިކޮށް ކުއާޓާއަށް ދަތުރުކޮށްފައިވުމުން ސްވިޓްޒަލެންޑަށް ސަމާލުވާން ޖެހޭ ކަމަށެވެ. އަދި މި މެޗުގައި ސްޕެއިނުން ފޯކަސް ކުރާނީ އަނިޔާއެއް ނުވެ ސެމީ ފައިނަލުން ޖާގައެއް ހޯދުމަށް ކަމަށްވެސް އެންރީކޭ ބުންޏެވެ.

ސްވިޓްޒަލެންޑުގެ ކޯޗު ވްލެޑެމިއާ ޕެޓްކޮވިޗް ބުނީ މި މެޗަށް ނުކުންނައިރު ޓީމުގެ މޯޓިވޭޝަން އެތައް ގުނައެއް މަތިވެފައިވާ ކަމަށާއި، ހާއްސަކޮށް ފްރާންސް ކަޓުވާލުމަށްފަހު ކުއާޓާއިން ޖާގައެއް ހޯދުންވެސް އެއީ އެ ޓީމަށް އޮތް ހިތްހަމަޖެހުމެއް ކަމަށެވެ. އަދި ކުއާޓާގައި ނުކުންނަ ސްޕެއިނަކީ ގިނަ ވަގުތު ބޯޅަ ހިފަހައްޓައިގެން ކުޅެ އެޓޭކް ކުރާ ޓީމެއް ކަމަށާއި، އެހެންކަމުން މި މެޗުގައިވެސް ސްވިޓްޒަލެންޑުން ޓެކްޓިކަލް ޑިސިޕްލިން ހިފަހައްޓައި، ލިބޭ ފުރުސަތުތަކުގެ ބޭނުން ހިފަން އިސްކަމެއް ދޭން ޖެހޭ ކަމަށްވެސް ބުންޏެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ 20:00 ގައި ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓުންގެ ގޮތުގައި ބައިވެރިވެވަޑައިގަންނަވާނީ އިސްމާޢީލް ޒަރިިޔަންދު އާއި އިމާދު ލަތީފެވެ.

ސްވިޓްޒަލެންޑާއި ސްޕެއިން ބައްދަލުކުރާ މެޗު ފަށާނީ ހުކުރު ދުވަހުގެރޭ ރާއްޖެ ގަޑިން 21:00 ގައެވެ.