ހިޔާ ޓަވަރުގެ ލިފްޓެއްގައި 9 މީހުން ތާށި ވެއްޖެ
މީހުން ތާށިވީ ދަނބު ކުލައިގެ ޓަވަރުގެ 17 ވަނަ ފަންގިފިލާގައި ލިފްޓުގައި
ހިޔާ ފުލެޓުގެ ލިފްޓުގައި ތާށިވި ބަޔަކު ސަލާމަތް ކުރުމުގެ މަސައްކަތް އިމާރާތުގެ ތެރޭގައި ކުރަނީ
ހުޅުމާލެ ދެވަނަ ފިޔަވަހީގައި ގާއިމްކޮށްފައިވާ ހިޔާ ފްލެޓުގެ ޓަވަރެއްގެ ލިފްޓުގައި ބަޔަކު ތާށި ވެއްޖެއެވެ.
އެ ސަރަހައްދުގައި މަސައްކަތް ކުރާ ބިދޭސީ އަކު ރާއްޖެ އެމްވީ އަށް ބުނީ މީހުން ތާށިވީ ދަނބު ކުލައިގެ ޓަވަރުގެ 17 ވަނަ ފަންގިފިލާގައި ލިފްޓުގައި ކަމަށެވެ. ތާށިވީ 8 ބިދޭސީންނާއި ދިވެއްސަކާއި ކަމަށާއި އެއީ އެތަނުގައި މަސައްކަތްކުރާ މީހުން ކަމަށް ވެސް ބުންޏެވެ.
އޭނާ ބުނިގޮތުގައި އެމީހުން ތާށިވީ ޓަވަރުން ކަރަންޓު ކެނޑިގެން ހަވީރު ފަސްގަޑި ބައި ހާއިރުއެވެ. އަދި އެމީހުން ނެެރުނީ ފުލުހުން އައިސް މިރޭ 7:30 ވެސް ވީ ފަހުން ކަމަށް ބުންޏެވެ. އެތަނުގައި މަސައްކަތްކުރާ މީހުން ކިޔާދިން ގޮތުގައި އެތަނުގައި އެ މައްސަލަ ވަރަށް ގިނައިން ދިމާވާކަމަށެވެ.
"އެއް ދުވަހު ތިންވަނަ ބުރިން ކަރަންޓު ގޮސްގެން ލިފްޓު ހަމަ ބަން ކިޔާފަ އެންމެ ތިރިއަށް ވެއްޓުނީ، އެކަމާ ބިރުން 21 ވަނަ ބުރިން ހިނގާފަވެސް ފައިބައިފިން" އެތަނުގައި މަސައްކަތްކުރާ މީހެއް
އެކަމާ ގުޅިގެން އެޗްޑީސީގެ އެމްޑީ ސުހައިލް ރާއްޖެ އެމްވީ އަށް ވިދާޅުވީ އެހެން ދިމާވީ ލިފްޓުގެ މައްސަލައަކުން ނޫން ކަމަށެވެ. ދެވަނަ ފިޔަވަހީގެ ކަރަންޓު އަދި އަޅާ ސްޓޭބަލް ނުވާ ކަމަށާއި އޭގެ ސަބަބުން ބައެއް ފަހަރު އެހެން ކަރަންޓު ދާ ކަމަށް ވިދާޅުވިއެވެ. އެކަމަކު އެތަން އާންމުންނަށް ދޭއިރު އެ މައްސަލަ ދިމާ ނުވާނެ ކަމަށް ވިދާޅުވިއެވެ.
ސުހައިލް މިހެން ވިދާޅުވިއިރު މިހާރުވެސް އެތަނަށް އާންމުން ގެންގޮސް ތަން ދައްކާލުމުގެ މަސައްކަތް ދަނީ ކުރިއަށެވެ.
