އަންހެނުން ހިތާނުކުރުމާ ގުޅޭގޮތުން ރާއްޖޭގެ ކަމާބެހޭ ފަރާތްތަކުގެ ޚިޔާލު ހޯދުމަށް ރައްޔިތުންގެ މަޖިލީހުގެ ހިޔުމަން ރައިޓްސް އެންޑް ޖެންޑަރ ކޮމިޓީން ހުށަހަޅާފައިވާ ހުށަހެޅުން އަލުން މުރާޖާ ކުރުމަށް ރައްޔިތުންގެ މަޖިލީހުގެ ނާއިބު ރައީސް އީވާ އަބްދުﷲ އެދިއްޖެއެވެ.

ބުދަ ދުވަހުގެ ޖަލްސާގައި އީވާ ވިދާޅުވީ މި ގޮތަށް އެދުނު މައިގަނޑު ސަބަބަކީ މިކަމާމެދު ޚިޔާލުހޯދައި އެކަމުގެ ގޮތް ހޯދުމަށް މަސައްކަތް ކުރަން ޖެހޭ ކަމަށް ގަބޫލު ނުކުރެއްވޭ ކަމަށް ދެކިވަޑައިގަންނަވާތީ ކަމަށެވެ. އީވާ ވިދާޅުވީ ކޮމިޓީއަކުން ނިންމާ ނިންމުމެއް ހުއްޓުވުމުގެ ބާރު ރިޔާސަތައް ނޯންނަ ކަމަށާއި އެހެންނަމަވެސް ކޮމިޓީއަކުން ނިންމާ ކަމެއް އިތުރަށް މުރާޖަޢާ ކުރަން ދެންނެވިދާނެ ކަމަށެވެ.

ހިޔުމަން ރައިޓްސް ކޮމިޓީން އަންގާރަ ދުވަހު ބޭއްވި ބައްދަލުވުމަށް އެޖެންޑާކޮށްފައިވަނީ އަންހެނުން ހިތާނުކުރުމަށް ހިތްވަރުދޭގޮތަށް ދީނީ ޢިލްމުވެރިޔާ އަދި ދިވެހިރާއްޖޭގެ ޤައުމީ ޔުނިވަރސިޓީގެ އެސިސްޓެންޓް ޕްރޮފެސަރ ޑރ. މުޙައްމަދު ޢިޔާޟް ޓްވީޓް ކުރައްވާފައިވާތީވެ އެކަން ރައްޔިތުންގެ މަޖިލީހުގެ ހިޔުމަން ރައިޓްސް އެންޑް ޖެންޑަރ ކޮމިޓީ މެދުވެރިކޮށް ބެލުމަށް އެދި ގަލޮޅު ދެކުނު ދާއިރާގެ މެމްބަރ މީކާއީލް އަޙުމަދު ނަސީމް ހުށަހަޅުއްވާފައިވާ މައްސަލައެވެ.

މި މައްސަލައިގައި މެމްބަރުން ދެކޭގޮތް ހާމަކުރުމަށް ކޮމިޓީގެ ބައްދަލުވުމުގައި ހުޅުވާލުމުން، އައްޑޫ މީދޫ ދާއިރާގެ މެމްބަރ ރޮޒައިނާ އާދަމް ވިދާޅުވީ މި މައުޟޫޢަކީ މިހާރު އެކި ތަންތަނުގައި ފުޅާ ދާއިރާއެއްގައި ބަހުސްކުރެވެމުންދާ މައުޟޫއެއް ކަމަށެވެ. ރާއްޖޭގައި އެހާ އާންމުވެފައިނުވާ ކަމެއްގެ ވާހަކަ މާބޮޑަށް ދެކެވި މިކަން ނުކުރާން ތިބި ބަޔަކު ވެސް މިކަން ކުރުމަށް ހިތްވަރުލިބިގެންދާ ފަދަ ކަންކަން ވެގެން ހިނގައިދާނެ ކަމަށާއި އެހެންކަމުން މިކަމަށް ދާއިމީ ހައްލެއް ހޯދަންޖެހޭ ކަމަށް ރޮޒައިނާ ވިދާޅުވިއެވެ.

ރޮޒައިނާގެ މިހުށަހެޅުއްވުމަށް ތާއީދުކުރެއްވީ ފުވައްމުލަކު ދެކުނު ދާއިރާގެ މެމްބަރ މުޙައްމަދު މުމްތާޒެވެ. މިކަމުގައި ވާހަކަދެއްކެވި ހުރިހާ މެމްބަރުން ވެސް ވަނީ މިކަމުގައި ކަމާބެހޭ ފަރާތްތަކުގެ ވިސްނުން ހުރި ގޮތެއް ދެނެގަނެ މިކަން ވަކިގޮތަކަށް ނިންމަންޖެހޭ ކަމުގެ މުހިންމުކަން ފާހަގަކުރައްވާފައެވެ. ހޮޅުދޫ ދާއިރާގެ މެމްބަރ ޔޫނުސް ޢަލީ ހުށަހެޅުއްވީ ދީނީ ކަންކަމާ ގުޅޭގޮތުން އެންމެ ފަހު ބަސް ބުނާތަނަކީ ފިޤުހު އެކަޑަމީ ކަމަށްވާއިރު އެތަނުގެ ބަހެއް ވެސް މިކަމުގައި ހޯދުމަށެވެ. އަދި މަކުނުދޫ ދާއިރާގެ މެމްބަރ މުޙައްމަދު ރާއީ ވަނީ މިކަމުގައި ހިޔުމަން ރައިޓްސް ކޮމިޝަން އޮފް ދަ މޯލްޑިވްސް (އެޗްއާރުސީއެމް)ގެ ބަހެއް ވެސް ހޯދުމަށް ހުށަހަޅުއްވާފައެވެ.

މީގެއިތުރުން ކޮމިޓީގެ މުޤައްރިރު ހިންނަވަރު ދާއިރާގެ މެމްބަރ ޖީހާން މަޙްމޫދު ވަނީ ސަރުކާރުން އދ. ގެ ޔޫޕީއާރު ބައްދަލުވުމުގައި މި ކަންތައް ރާއްޖޭގައި މަނާކުރުމަށް މަސައްކަތްކުރަމުންދާ ކަމަށް ބަންޑާރަ ނައިބު އަލްއުސްތާޒު އިބްރާހީމް ރިފްޢަތު ވިދާޅުވެފައިވާތީ އެކަން އޮތް ހިސާބެއް ބެލުމަށް ހުށަހަޅުއްވާފައެވެ. މިކަން މަނާކުރުމަށް މިހާރު ސަރުކާރުން ކުރަމުންދާ މަސައްކަތާއި އެކަން ގޮސްފައިވާ ހިސާބެއް ސާފުކުރުމަށް ވަނީ ހުށަހަޅުއްވާފައެވެ. މީގެއިތުރުން މިކަމަކީ ސިއްހީ މައްސަލައެއްގެ ގޮތުގައި ދުނިޔެއިން ދެކޭއިރު މިއީ ސިއްހީ ގޮތުން އިޔާދަނުކުރެވޭ ވަރުގެ ބޮޑެތި ގެއްލުންތައް ލިބޭކަމެއްކަމަށް ސާބިތުވާއިރު މިކަމުގައި ހެލްތު މިނިސްޓްރީގެ ބަހެއް ހޯދުމަށް ވެސް ވަނީ ހުށަހަޅުއްވާފައެވެ.

ކޮމިޓީގައި މެމްބަރުންގެ މެދުގައި މަޝްވަރާކުރުމަށްފަހު ނިމިގެންދިޔައީ މި މައްސަލާގައި އިސްލާމިކް މިނިސްޓްރީ އާއި، ފިޤުހު އެކަޑަމީން މިކަމާމެދު ދެކޭ ގޮތާއި އެޗްއާރުސީއެމް އަދި ހެލްތު މިނިސްޓްރީން މިކަމުގައި ދެކޭގޮތް ފުރަތަމަ ލިޔުން ހޯދުމަށެވެ. އަދި ބަންޑާރަ ނައިބު މިކަމުގައި ކުރައްވަމުން ގެންދަވާ މަސައްކަތްތަކުގެ މައުލޫމާތު ވެސް ލިޔުމުން އެންމެ ފުރަތަމަ ސާފުކުރުމަށް ވަނީ ކޮމިޓީން ނިންމާފައެވެ. ލިޔުމުން މިކަންކަން ސާފުކުރުމަށްފަހު މިފަރާތްތަކާ ކޮމިޓީން ބައްދަލުކުރުމަށްފަހު ރާއްޖޭގައި މިކަންތައް ނިމުމަކަށް ގެނެވޭނެ ގޮތްތަކާ ގުޅޭގޮތުން ކަމާބެހޭ ފަރާތްތަކާ މަޝްވަރާކޮށް ގޮތެއް ނިންމުމަށް ކޮމިޓީން ވަނީ ނިންމާފައެވެ.