ކޮވިޑް-19ގެ ސަބަބުން ސަރުކާރުން ތައާރަފުކޮށްފައިވާ ސްޓިމިއުލަސް ޕެކޭޖްތަކުގެ ދަށުން ކެފޭ/ރެސްޓޯރެންޓްތަކަށް 49 މިލިއަން ރުފިޔާގެ ލޯނު ފޯރުކޮށްދީފައިވާ ކަމަށް އިކޮނޮމިކް މިނިސްޓަރ ފައްޔާޒު އިސްމާޢީލް ވިދާޅުވެއްޖެއެވެ.

ރައީސް އޮފީހުން ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން މިނިސްޓަރ ފައްޔާޒު ވަނީ ބޭންކް އޮފް މޯލްޑިވްސް މެދުވެރިކޮށް ދޫކުރެވުނު ސްޓިމިއުލަސް ލޯނުތަކުގެ ތެރެއިން 5 ލޯނެއް ކެފޭ/ރެސްޓޯރެންޓްތަކަށް ދޫކޮށްފައިވާ ކަމަށާއި، އެއީ 16 މިލިއަން ރުފިޔާގެ ލޯނުކަމަށް ވިދާޅުވެފައެވެ. އަދި އެސްއެމްއީ ޑިވެލޮޕްމެންޓް ފައިނޭސިން ކޯޕަރޭޝަން މެދުވެރިކޮށް 156 ކެފޭ/ރެސްޓޯރެންޓް ވިޔަފާރިއަށް 33 މިލިއަން ރުފިޔާގެ ލޯނު ދޫކޮށްފައިވާ ކަމަށާއި އޭގެ ތެރެއިން 90 ލޯނު ދޫކޮށްފައި ވަނީ މާލެ ސަރަހައްދުގެ ރެސްޓޯރެންޓްތަކަށް ކަމަށް މިނިސްޓަރ ވިދާޅުވިއެވެ.

މިނިސްޓަރ ފައްޔާޒު ވަނީ ކޮވިޑް-19ގެ ސަބަބުން އެންމެ ފުރަތަމަ ދޫކުރި ސްޓިމިއުލަސް ޕެކޭޖްތަކުގެ ދަށުން ބީއެމްއެލް މެދުވެރިކޮށް 357 މިލިއަން ރުފިޔާގެ ލޯނުގެ އިތުރުން 585 މިލިއަން ރުފިޔާގެ ލޯނު ބޮޑެތި ވިޔަފާރިތަކަށް ދޫކޮށްފައިވާ ކަމަށާއި އެސްޑީއެފްސީ މެދުވެރިކޮށް ކުދި އަދި މެދުފަންތީގެ ވިޔަފާރިތަކަށާއި އަމިއްލަ މަސައްކަތްކުރާ ފަރާތްތަކަށް 363 މިލިއަން ރުފިޔާގެ ލޯނު ދޫކޮށްފައިވާކަން ފާހަގަކުރައްވާފައެވެ.

އޭގެއިތުރުން އެސްޑީއެފްސީގެ މަސައްކަތް ފެށި 2019އިން ފެށިގެން މިހާތަނަށް 1.3 ބިލިއަން ރުފިޔާގެ ލޯނު ކުދި އަދި މެދު ފަންތީގެ ވިޔަފާރިތަކާއި އަމިއްލަ މަސައްކަތްކުރާ ފަރާތްތަކަށް ދޫކޮށްފައިވާނެ ކަމަށް މިނިސްޓަރ ފާހަގަކުރެއްވިއެވެ. އެއީ ކޮވިޑް ރިލީފްގެ ގޮތުގައި ދޫކުރެވުނު 363 މިލިއަން ރުފިޔާގެ އިތުރުން ބޭންކުން ދޫކޮށްފައިވާ އެއް ބިލިއަން ރުފިޔާފެ ލޯނެވެ. އެގޮތުން އެސްޑީއެފްސީން ވަނީ 765 ފަރާތައް ވަނީ އެއް ބިލިއަން ރުފިޔާގެ ލޯނު އެޕްރޫވްކޮށް 524 މިލިއަން ރުފިޔާގެ ލޯނު ދޫކޮށްފައެވެ.

ކޮވިޑް-19ގެ ސަބަބުން އަސަރުކޮށްފައިވާ ވިޔަފާރިތަކަށް އެހީތެރިވުމަށް ސަރުކާރުން އިތުރު ދެ ސްޓިމިއުލަސް ޕްލޭން ތައާރަފްކޮށްފައިވާ އިރު، އެއީ ބީއެމްއެލް މެދުވެރިކޮށް ވިޔަފާރިތަކަށް ދޫކުރާ ކޮވިޑް-19 އިކޮނޮމިކް ސްޓިމިއުލަސް ލޯނާއި އެސްޑީއެފްސީ މެދުވެރިކޮށް ތައާރަފްކޮށްފައިވާ ކޮވިޑް-19 ސަސްޓެއިނެބަލް ސްޓިމިއުލަސް ލޯނެވެ. ކޮވިޑް-19 އިކޮނޮމިކް ސްޓިމިއުލަސް ލޯނު ޕެކޭޖުގެ ދަށުން 10 މިލިއަން ރުފިޔާއާ ހަމައަށް ލޯނު ދޫކުރާއިރު، ކޮވިޑް-19 ސަސްޓެއިނެބަލް ސްޓިމިއުލަސް ލޯނުގެ ދަށުން ތިން ޕެކޭޖެއް ވިޔަފާރިވެރިންނަށް ދޫކުރެއެވެ. އެއީ ހިނގަމުންދާ ޕްރޮޖެކްޓްތައް ނިންމުމަށް ދޫކުރާ ޕެކޭޖަކާއި ވިޔަފާރި ހިންގުމަށް ބޭނުންވާ ފައިސާގެ އެހީ ފޯރުކޮށްދިނުމަށް ދޫކުރާ ޕެކޭޖެއްގެ އިތުރުން ދެމެހެއްޓެނިވި ގޮތެއްގައި ވިޔަފާރި ފުޅާކުރުމާއި، ލޯނު ނުހިމެނޭ ގޮތަށް ވިޔަފާރިއާ ގުޅޭ ފަންނީ ލަފާ ލިބިގެންދާ ޕެކޭޖެކެވެ. ކޮވިޑް-19 ސަސްޓެއިނެބަލް ސްޓިމިއުލަސް ލޯނުގެ ދަށުން އެންމެ ގިނަވެގެން ދޫކުރާނީ އެއް މިލިއަން ރުފިޔާއެވެ. މި 2 ސްކީމްގެ ދަށުންވެސް ލޯނު ދޫކުރަނީ 6 އިންސައްތައިގެ އިންޓަރެސްޓް ރޭޓެއްގައި ގިނަ ދުވަހުން ދެއްކޭ ގޮތަށެވެ.