ރައީސް ނަޝީދަށް ދިން ހަމަލާގައި އަމަލީގޮތުން ބައިވެރިވި 4 މީހުންގެ މައްޗަށް ދައުވާކުރަން ފޮނުވަނީ
އެ ހަމަލާގައި އަމަލީގޮތުން ބައިވެރިވި 8 މީހުންގެ ތަހުގީގު މިހާރު ކުރިއަށް އެބަ ދޭ
ރައީސް ނަޝީދު
މިދިޔަ މޭ މަހުގެ 6ވަނަ ދުވަހު ރައްޔިތުންގެ މަޖިލީހުގެ ރައީސް މުހައްމަދު ނަޝީދަށް ދިން ޓެރަރިސްޓު ހަމަލާގައި އަމަލީގޮތުން ބައިވެރިވި ހަތަރު މީހެއްގެ މައްޗަށް ދައުވާކުރަން ފޮނުވަން ތައްޔާރުވެފައިވާ ކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިޙު ވިދާޅުވެއްޖެއެވެ.
އަންގާރަ ދުވަހު ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ރައީސް ވިދާޅުވީ، ރައީސް ނަޝީދަށް ދިން ހަމަލާގެ މައްސަލަތައް ވަރަށް ގާތުން ބައްލަވަމުން އަންނަ ކަމަށެވެ. އެގޮތުން އެކަމާ ގުޅޭ ތަފްސީލްތައް ފުލުހުން މީގެ ދެ ދުވަސްކުރިން ހިއްސާކޮށްފައިވާ ކަމަށް ވިދާޅުވިއެވެ.
ރައީސް ވިދާޅުވީ ފުލުހުން އެންމެ ފަހުން ދިން މައުލޫމާތަށް ބަލާއިރު، އެ ހަމަލާގައި އަމަލީގޮތުން ބައިވެރިވި 8 މީހުންގެ ތަހުގީގު މިހާރު ކުރިއަށްދާ ކަމަށެވެ. އަދި އޭގެ ތެރެއިން ހަތަރު މީހުންގެ ތަހުގީގު މިހާރު ނިމިފައިވާ ކަމަށާއި، ވަރަށް އަވަހަށް އެ މީހުންގެ މައްސަލަ ޕީޖީ އޮފީހަށް ދައުވާކުރަން ފޮނުވަން ތައްޔާރުވެފައިވާ ކަމަށް ރައީސް ވިދާޅުވިއެވެ.
ރައީސް ނަޝީދަށް ދިން ހަމަލާގެ އެއްވެސް މައުލޫމާތެއް ޕޮލިސް އިންޓެލިޖެންސް އަށް ލިބިފައި ނުވާތީ މި މައްސަަލައަށް ފަހު އިންޓެލިޖެންސްގައި ބަދަލުކުރަން ޖެހޭ ކަމެއް އޮތްތޯ ބެލުމުގެ މަސައްކަތް ވެސް ކުރަމުން އަންނަ ކަމަަށާއި، އެގޮތުން އެކަންކަން ބެލުމަށް އެމަނިކުފާނު އެކުލަވާލެއްވި ކޮމިޓީގެ މަސައްކަތް ވެސް މިހާރު ގާތްގަނޑަކަށް ނިމިފައިވާ ކަމަށް ވިދާޅުވިއެވެ.
ރައީސް ވިދާޅުވީ މި ހަމަލާއާ ގުޅިގެން ރައްޔިތުންގެ މަޖިލީހުގެ 241 ކޮމިޓީއިން ކުރަމުންދާ މަސައްކަތްތައް ވެސް ނިމި މިހާރު އޮތީ ފައިނަލް ރިޕޯޓު އެކުލަވާލުމާ ހަމައިގަ ކަމަށެވެ. އަދި މަޖިލީހުގެ ކޮމިޓީ ރިޕޯޓާއި އިންޓެލިޖެންސްގެ މައްސަލަ ބަލާ ކޮމިޓީ ރިޕޯޓުގައި ހުރި ކަން ކަމަށް ބެލުމަށް ފަހު އިސްލާހުކުރަން ޖެހޭ ކަންކަން އިސްލާހުކުރައްވާނެ ކަމަށެވެ.
މި ހަމަލާ ދިނުމުގައި އަމަލީގޮތުން ބައިވެރިވި ފަސް މީހަކު ހައްޔަރުކޮށްފައިވާކަން ފުލުހުން މީގެ ކުރިން ހާމަކޮށްފައިވެއެވެ. އޭގެ ތެރޭގައި ގޮއްވާލި ސައިކަލުގެ ވެރިފަރާތާއި، ބޮން ގޮއްވާލި މީހާ ވެސް ހިމެނެއެވެ. އެ މައްސަލާގައި މުޅި ރާއްޖޭގެ އެކި ހިސާބުތަކުގައި ފުލުހުން އޮޕަރޭޝަންތައް ކުރިއަށް ގެންދާއިރު، އޭގެ ތެރެއިން ވެސް މީހުން ހައްޔަރުކޮށްފައިވެއެވެ.
ރައީސް ނަޝީދަށް ލިބިވަޑައިގެންނެވި އަނިޔާތަކަށް އޭޑީކޭ ހޮސްޕިޓަލްގައި ވަނީ 16 ގަޑިއިރުގެ ދިގު އޮޕަރޭޝަނެއް ކުރިޔަށް ގެންގޮސްފައެވެ. އައިއީޑީއެއް ގޮއްވާލުމުގެ ހާދިސާގައި އެމަނިކުފާނުގެ ހަށިކޮޅަށް 10 ރޭޒާފުއް ވަދެ ހަށިގަނޑުގެ މުހިއްމު ގުނަވަންތައް ފޫއަޅުވާލާފައިވެއެވެ. މިކަމަށް އިތުރު ފަރުވާ ހޯއްދެވުމަށް އެމަނިކުފާނު ޖަރުމަނުވިލާތަށް ވަޑައިގެންނެވީ މެއި މަހުގެ 13 ވަނަ ދުވަހުއެވެ. އޭގެފަހުން ޖަރުމަނުވިލާތުގައިވެސް ވަނީ އިތުރު އޮޕަރޭޝަންތަކެއް ކުރައްވާފައެވެ.
މި ހަމަލާއަށް ފަހު އެމަނިކުފާނުގެ ހާލުކޮޅާ ގުޅިގެން ވާހަކަދައްކަވަމުން ރައީސް ނަޝީދު ދާދި ފަހުން ވިދާޅުވީ ޖުމްލަ ގޮތެއްގައި ހާލުކޮޅު ރަނގަޅު ކަމަށާއި، އެކަމަކު އަދިވެސް ވާތް ފަރާތުގެ ގިނަ ހިސާބުތަކެއް އައްސިވެ އެކަމުގެ އަސަރު ނުކެނޑި އެބަހުރި ކަމަށެވެ. އަދި މި ނޮވެމްބަރު މަހު ވެސް އިތުރު އޮޕަރޭޝަނެއް ކުރަންޖެހޭއިރު، މަސައްކަތްކުރައްވަނީ ވީހާވެސް އަވަހަށް އެނބުރި ރާއްޖެ ވަޑައިގަތުމަށް ކަމަށް އެމަނިކުފާނުވިދާޅުވިއެވެ.
