ބޮލިވިއާ ބަލިކޮށް އާޖެންޓީނާއަށް ގްރޫޕުގެ އެއްވަނަ

ދެކުނު އެމެރިކާގެ އެންމެ ޝަރަފުވެރި ފުޓްބޯޅަ މުބާރާތް ކަމަށްވާ ކޮޕާ އެމެރިކާގައި ބޮލިވިއާ ބަލިކޮށް އާޖެންޓީނާއިން ގްރޫޕް އޭ ގެ އެއްވަނަ ހޯދައިފިއެވެ.

ބްރެޒިލްގައި ކުރިއަށްދާ މި މުބާރާތުގައި އަންގާރަ ދުވަހުގެ ފަތިހު ކުޅުނު މެޗުން އާޖެންޓީނާ މޮޅުވީ 4-1 ގެ ނަތީޖާއަކުންނެވެ.

މި މެޗު ފަށައިގެން ހަވަނަ މިނެޓުގައި އާޖެންޓީނާއިން ލީޑު ނެގިއިރު، ކެޕްޓަން ލިއޮނެލް މެސީ ދިން ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ޕަޕޫ ގޯމޭޒްއެވެ. އަދި މެޗުގެ 31 ވަަނަ މިނެޓުގައި ލިބުނު ޕެނަލްޓީއަކުން މެސީ ވަނީ އާޖެންޓީނާއަށް ލީޑު ފުޅާކޮށްދީފައެވެ. މިއީ އޭރިއާ ތެރެއިން ޕަޕޫ ގޯމޭޒްއަށް ކުރި ފައުލަކަށް ރެފުރީ ދިން ޕެނަލްޓީއެކެވެ. އަދި ފުރަތަމަ ހާފު ނިމުމުގެ ކުރިން ސާޖިއޯ އަގުއޭރޯ ދިން ބޯޅައަކުން މެސީ ވަނީ އިތުރު ލަނޑެއް ޖަހާފައެވެ.

މި މެޗުގެ ދެވަނަ ހާފުގައި ބޮލިވިއާއިން ލަނޑެއް ޖެހިއިރު، މެޗުގެ 60 ވަނަ މިނެޓުގައި މި ލަނޑު އެ ޓީމަށް ކާމިޔާބުކޮށްދިނީ އާވިން ސާވެޑްރާއެވެ. އެކަމަކު އޭގެ ފަސް މިނެޓު ފަހުން ލަޓާރޯ މާޓީނޭޒް ވަނީ އާޖެންޓީނާގެ ހަތަރުވަނަ ލަނޑު ޖަހާފައެވެ.

މި މޮޅާއެކު އާޖެންޓީނާއިން ގްރޫޕް އޭ ގެ އެއްވަނަ ހޯދީ 10 ޕޮއިންޓާއެކުއެވެ. ދެވަނައިގައި އޮތް އުރުގުއޭ ވަނީ ހަތް ޕޮއިންޓް ލިބިފައެވެ. އަދި ތިންވަނައަށް ދިޔަ ޕެރަގުއޭއަށް ހަ ޕޮއިންޓް ލިބުނުއިރު، މި ގްރޫޕުން ހަތަރުވަނަ ޓީމުގެ ގޮތުގައި ކުއާޓާގެ ޖާގަ ހޯދީ ފަސް ޕޮއިންޓް ހަމަކުރި ޗިލީއެވެ.

ގްރޫޕުގެ އެއްވަނަ ޓީމުގެ ގޮތުގައި އާޖެންޓީނާ ކުއާޓާއަށް ދަތުރުކުރިއިރު، ކުއާޓާގައި އާޖެންޓީނާ ބައްދަލުކުރަން ޖެހޭނީ އެކުއެޑޯއާއެވެ.