ކޮވިޑް-19ށް ފަރުވާ ހޯދަމުން ދިޔަ އިތުރު މީހަކު ނިޔާވެއްޖެއެވެ.
ހެލްތް ޕްރޮޓެކްޝަން އޭޖެންސީ (އެޗްޕީއޭ)ން ބުނީ ހޯމަ ދުވަހުގެ ދަންވަރު 02:33ގައި ހުޅުމާލެ މެޑިކަލް ފެސިލިޓީގައި ކޮވިޑަށް ފަރުވާ ހޯދަމުން ދިޔަ އުމުރުން 48 އަހަރުގެ ދިވެހި ފިރިހެނެއް ނިޔާވެފައިވާ ކަމަށެވެ. މިއީ ރާއްޖެއިން މި ބަލި ޖެހިގެން ނިޔާވި 210 ވަނަ މީހާއެވެ.
ރާއްޖޭގައި ކޮވިޑުގައި ނިޔާވި މީހުންގެ އަދަދު 210ށް އަރާފައިވާ އިރު ފާއިތުވި މެއި މަހު އެކަނި ކޮވިޑް ބަލި ޖެހިގެން 88 މީހަކު ވަނީ ނިޔާވެފައެވެ.
ރާއްޖޭގައި ކޮވިޑްގެ ހާލަތު އޭޕްރީލް މަހުގެ ފަހުކޮޅުން ފެށިގެން ގޯސްވަމުން އައިސް މެއި މަހު ވަނީ ހާލަތު ވަރަށް ބޮޑަށް ގޯސްވެފައެވެ. އެއާއެކު ކޮވިޑް ފެތުރުން ކޮންޓްރޯލްކުރުމަށް އެޅި ފިޔަވަޅުތަކާއެކު މިހާރު ހާލަތު އަންނަނީ ރަނގަޅުވަމުންނެވެ. އެގޮތުން ޖޫން މަސް ފެށުނު ފަހުން ދުވާލެއްގެ މައްޗަށް ޕޮޒިޓިވްވާ ކޭސްތަކުގެ އަދަދު ވަރަށް ބޮޑުތަން ދަށްވެފައިވާއިރު، އަޅާފައިވާ ފިޔަވަޅުތަކަށް ވެސް އަންނަނީ ލުއިތައް ދެމުންނެވެ.
