މާލެ ސަރަަހައްދުން ޕޮޒިޓިވްވި މީހުންގެ އަދަދު 28ށް ދަށްކުރެވިއްޖެއެވެ.

ރާއްޖެއިން ކޯވިޑް-19އަށް އިތުރު 155 މީހުން ޕޮޒިޓިވްވެއްޖެއެވެ. އެޗްޕީއޭއިން ޢާއްމުކޮށްފައިވާ ތަފާސްހިސާބަށް ބަލާއިރު އަލަށް ޕޮޒިޓިވްވި 155 މީހުންގެ ތެރޭގައި ހިމެނެނީ، މާލެ ސަރަހައްދުން ބައްޔަށް ޕޮޒިޓިވްވި 28 މީހުންނާއި އަތޮޅުތަކުގެ ރަށްރަށުން ޕޮޒިޓިވްވި 70 މީހުންނާއި ރިސޯޓުތަކުން ޕޮޒިޓިވްވި 31 މީހުންނާއި ތަރައްގީކުރަމުންދާ ރަށްރަށުން ޕޮޒިޓިވްވި 26 މީހުންނެވެ.

އަލަށް މި ބައްޔަށް ޕޮޒިޓިވްވީ މީހުންނާއެކު ރާއްޖެއިން ޖުމްލަ 73،482 މީހުންވަނީ ކޯވިޑް-19އަށް ޕޮޒިޓިވްވެފައެވެ.

އެކްޓިވް ކޭސްތަކުގެ އަދަދު އާދީއްތަ ދުވަހު ހުރީ 3،883 ގައެވެ. ބައްޔަށް ޕޮޒިޓިވްވެފައި ތިބި މީހުންގެ ތެރެއިން ހޮސްޕިޓަލްގައި އެޑްމިޓްކޮށްގެން ފަރުވާދެމުން މިހާރު އަންނަނީ 27 މީހަކަށެވެ.

ވޭތުވެދިޔަ 24 ގަޑިއިރު ތެރޭގައި ބަލިން ރަނގަޅުވެފައިވަނީ 347 މީހުންނެވެ. މިއާއެކު ބަލިން ރަނގަޅުވި މީހުންގެ ޖުމްލަ ޢަދަދުވަނީ 69،378 އަށް އިތުރުވެފަ އެވެ. ވޭތުވެދިޔަ 24 ގަޑިއިރު ތެރޭގައި 4،972 ސާމްޕަލް ވަނީ ޓެސްޓުކޮށްފައެވެ.

ރާއްޖޭގައި ކޯވިޑް ބަލީގައި މިހާތަނަށް ނިޔާވި މީހުންގެ އަދަދު މިހާރުވަނީ 209ށް އަރާފައެވެ. މީގެތެރޭގައި ހިމެނެނީ 191 ދިވެހިންނާ 18 ބިދޭސީންނެވެ.