ގަދަ 16 - ބެލްޖިއަމާއި ޕޯޗުގަލުގެ ކުރިމަތިލުން

ޔޫރޯ 2020 ގެ ދެވަނަ ބުރުގެ މެޗުތައް ފެށިގެން ކުރިޔަށްދާއިރު، ބެލްޖިއަމާއި ޕޯޗުގަލުގެ ކުރިމަތިލުމަކީ މި ބުރުގައި އެންމެ ފޯރިގަދަވާނެ އެއް މެޗެވެ.

މި ދެ ޓީމުން މި މުބާރާތުގައި މިހާތަނަށް ހަތް ލަނޑު ޖަހާފައިވާއިރު، ބެލްޖިއަމުން ދެވަނަ ބުރަށް ދަތުރުކުރީ ގްރޫޕް ބީ ގައި އެ ޓީމުން ކުޅުނު ހުރިހާ މެޗެއް ކާމިޔާބުކޮށް ގްރޫޕުގެ އެއްވަނަ ޓީމުގެ ގޮތުގައެވެ. ގްރޫޕް ސްޓޭޖުގައި ބެލްޖިއަމުން ކުޅުނު ފުރަތަމަ މެޗުގައި ރަޝިއާ އަތުން 3-0 ގެ ނަތީޖާއަކުން މޮޅުވިއިރު، ދެވަނަ މެޗުން ޑެންމާކް އަތުން މޮޅުވީ 2-1 ގެ ނަތީޖާއަކުންނެވެ. އަދި ގްރޫޕުގެ ފަހު މެޗުގައި ފިންލެންޑް އަތުން މޮޅުވީ 2-0 ގެ ނަތީޖާއަކުންނެވެ.

އެހެންނަމަވެސް އެންމެ ފަހުގެ ޗެމްޕިއަން ޕޯޗުގަލް ދެވަނަ ބުރަށް ދަތުރުކުރީ މަރުގެ ގްރޫޕް ކަމަށްވާ ގްރޫޕް އެފް ގެ ތިންވަނަ ޓީމުގެ ގޮތުގައެވެ. ޕޯޗުގަލުން ކުޅުނު ފުރަތަމަ މެޗުން ހަންގޭރީ އަތުން 3-0 ގެ ނަތީޖާއަކުން މޮޅުވި ނަމަވެސް، ދެވަނަ މެޗުގައި ވަނީ ޖަރުމަން އަތުން ބަލިވެފައެވެ. އަދި ފަހު މެޗުގައި ފްރާންސްއާ ބައްދަލުކުރިއިރު، އެ މެޗު ނިމުނީ އެއްވަރުވެގެންނެވެ.

ދެވަނަ ބުރުގެ މެޗަށް ނުކުންނައިރު، މި މުބާރާތުގެ ލަނޑު ލިސްޓުގެ އެއްވަނައިގައި އޮތް ޕޯޗުގަލުގެ ކެޕްޓަން ކްރިސްޓިއާނޯ ރޮނާލްޑޯ ވަނީ މިހާތަނަށް ފަސް ލަނޑު ކާމިޔާބުކޮށްފައެވެ. އަދި ބެލްޖިއަމަށް އެންމެ ގިނަ ލަނޑު ކާމިޔާބުކޮށްދިން ކުޅުންތެރިޔާއަކީ ތިން ލަނޑު ޖަހާފައިވާ ފޯވާޑް ރޮމެލޫ ލުކާކޫއެވެ.

ބެލްޖިއަމް މެޗުގެ ކުރިން ވާހަކަ ދައްކަމުން ޕޯޗުގަލުގެ ކޯޗު ފެނާންޑޯ ސަންޓޯސް ބުނީ ބެލްޖިއަމަކީ ދުނިޔޭގެ ރޭންކިންގެ އެއްވަނަ ޓީމު ކަމަށާއި، އަދި ބެލްޖިއަމުގެ ގޯލްޑަން ޖެނެރޭޝަންގެ ކުޅުން ތަފާތު ކަމަށެވެ. އަދި މި މެޗުގައި ބެލްޖިއަމުގެ މިޑްފީލްޑަރު ކެވިން ޑި ބްރޭނާ އާއި ރޮމެލޫ ލުކާކޫ ހުއްޓުވަން ޕޯޗުގަލުގެ ޑިފެންޑަރުންނަށް އުނދަގޫވާނެ ކަމަށްވެސް ވަނީ ބުނެފައެވެ.

ބެލްޖިއަމްގެ ކޯޗު ރޮބާޓޯ މާޓިނޭޒް ބުނީ ޕޯޗުގަލުގައި މި ވަގުތު އޮތް ސްކޮޑަކީ ފެންވަރުގެ ގޮތުން ބަލާނަމަ މިހާތަނަށް ޕޯޗުގަލުން މުބާރާތަކަށް ނެރުނު އެންމެ ވަރުގަދަ ސްކޮޑް ކަމަށެވެ. އަދި ޕޯޗުގަލުގެ ތަރި ރޮނާލްޑާއަށް 36 އަހަރު ވެފައިވީ ނަމަވެސް، އޭނާއަކީ މި ވަގުތުވެސް ދުނިޔޭގައި ތިބި އެންމެ މޮޅުތި ކުޅުންތެރިންގެ ތެރޭގައި ހިމެނޭ ކުޅުންތެރިއެއް ކަމަށް ވަނީ ބުނެފައެވެ. އެހެންކަމުން މި މެޗުގައި ޕޯޗުގަލަށް ހާއްސަ ސަމާލުކަމެއް ދީގެން ކުޅެން ޖެހޭނެ ކަމަށްވެސް މާޓިނޭޒް ވަނީ ބުނެފައެވެ.

ޔޫރޯ 2020 ގެ ލޯކަލް އެކްސްކްލޫސިވް ބްރޯޑްކާސްޓިން ރައިޓްސް ރާއްޖެޓީވީން ނަގާފައިވުމާއެކު، މި މެޗު ދިވެހި ރައްޔިތުންނާ ހަމައަށް ރާއްޖެޓީވީން ވަގުތުން ގެނަސްދޭނެއެވެ. އަދި ރާއްޖެ.އެމްވީ ވެބްސައިޓުންވެސް މި މެޗު ސްޓްރީމްކުރާނެއެވެ.

މެޗުގެ ކުރިން މައިލޯ ޔޫރޯ ފޯރި ޝޯ ރާއްޖެޓީވީން ގެނެސްދޭއިރު، މި ޝޯ ހުށަހަޅާނީ ރާއްޖެޓީވީގެ ކުޅިވަރު ނޫސްވެރިޔާ އިސްމާޢީލް ޝާހެވެ. ޝާހާއެކު އެނަލިސްޓެއްގެ ގޮތުގައި މުޙައްމަދު ނިޒާމް (ނިޒާމްބެ) ބައިވެރިވެވަޑައިގަންނަވާއިރު، ޚާއްސަ މެހުމާނެއްގެ ގޮތުން މުޙައްމަދު ޝާހިދު (ޝާޑް) ވެސް ބައިވެރިވެވަޑައިގަންނަވާނެއެވެ.

ބެލްޖިއަމާއި ޕޯޗުގަލް ބައްދަލުކުރާ މެޗު ފަށާނީ އާދީއްތަ ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.