ތައިލެންޑްގައި ކޮވިޑްގެ ހާލަތު ގޯސްވެ ފިޔަވަޅުތައް ވަރުގަދަކުރަނީ

ތައިލެންޑްގައި ކޮވިޑްގެ ހާލަތު ގޯސްވަމުންދާތީ ވައިރަސް ފެތުރުން ކޮންޓްރޯލްކުރުމަށް އަޅާނެ ފިޔަވަޅުތައް އާދިއްތަ ދުވަހު އެގައުމުގެ ސަރުކާރުން ހާމަކުރާނެއެވެ.

ތައިލެންޑްގެ މައި ތަން ކަމުގައިވާ ބެންކޮކް އާއި އެސަރަހައްދާ ގުޅިފައިވާ ސަރަހައްދުތަކުގައި ކުރިޔަށް އޮތް 30 ދުވަހަށް ފިޔަވަޅުތައް އެޅުމަށް ވަނީ ހަމަޖެހިފައެވެ. ހޯމަ ދުވަހުން ފެށިގެން އެޅުމަށް ހަމަޖެހިފައިވާ ފިޔަވަޅުތަކުގެ ތެރޭގައި ހިމެނެނީ ރެސްޓޯރެންޓްތަކުގެ ތެރޭގައި ތިބެގެން ކައިބޮއި ހެދުން މަނާކުރުމެވެ. ބެންކޮކްގެ އިތުރުން ފަސް ޕްރޮވިންސެއްގައި ވެސް މިފިޔަވަޅު އެޅުމަށް ވަނީ ހަމަޖެހިފައެވެ.

މީގެއިތުރުން ޝޮޕިންގ މޯލްތައް ރޭގަނޑު 9 ޖަހާއިރު ބަންދުކުރުމާއި 20 މީހުންނަށްވުރެ ގިނަ މީހުން ބައިވެރިވެގެން ބާއްވާ ޕާޓީތަކާއި ހަފްލާތަކާއި އެހެނިހެން ހަރަކާތްތައް ވެސް ރޭގަނޑު 9ން ފެށިގެން ނުބޭއްވޭ ގޮތަށް ވަނީ ނިންމާފައެވެ.

މީގެއިތުރުން މި ސަރަހައްދުތަކުގައި ކޮންސްޓްރަކްޝަން ސައިޓްތައް ވެސް ބަންދުވާނެއެވެ. މިނިންމުން ނިންމާފައިމިވަނީ ކޮންސްޓްރަކްޝަން ސައިޓްތަކުން ގިނަ އަދަދެއްގެ ކްލަސްޓަރ ތަކެއް ފެނުމާ ގުޅިގެންނެވެ. މެއި މަހުން ފެށިގެން ބެންކޮކްގެ މިފަދަ ސައިޓްތަކުން 37 ކްލަސްޓަރއެއް ވަނީ ފެނިފައެވެ.

މީގެއިތުރުން ދަތުރުފަތުރުކުރާ މީހުން ޗެކްކުރުމަށް ބެންކޮކް އާއި ފަސް ޕްރޮވިންސްގައި ޗެކް ޕޮއިންޓްކެއް ގާއިމުކޮށްގެން ބަލަމުންދާނެ ކަމަށް ވަނީ ބުނެފައެވެ.