ފާއިތުވި 24 ގަޑިއިރުގެ ތެރޭގައި ކޮވިޑް-19ށް މާލެ ސަރަހައްދުން ޕޮޒިޓިވްވީ 30 މީހުން
އަތޮޅުތެރެއިން 101 މީހުން ޕޮޒިޓިވްވެފައިވޭ
ސަލާމަތީ ބާރުތައް- ކޮވިޑް-19 އިން ރައްކާތެރިވުމަށް އަޅާފައިވާ ފިޔަވަޅުތައް ތަންފީޒު ކުރުމުގެ މަސައްކަތުގައި
ހޮނިހިރު ދުވަހު މާލެ ސަރަހައްދުން ކޮވިޑް-19އަށް ޕޮޒިޓިވްވީ 30 މީހުން ކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ގެ ތަފާސްހިސާބުތަކުން ދައްކައިފިއެވެ.
އެޗްޕީއޭއިން އާންމުކުރި ތަފާސްހިސާބުތައް ދައްކާގޮތުން ހުކުރު ދުވަހުގެ އިރު އޮއްސި 6ން ފެށިގެން ހޮނިހިރު ދުވަހުގެ އިރު އޮއްސި 6އާ ދެމެދު ނެގި 5،763 ސާމްޕަލްތަކުގެ ތެރެއިން ޕޮޒިޓިވްވީ 150 ސާމްޕަލްއެވެ. އެއީ މާލެ ސަރަހައްދުން 30 ސާމްޕަލްއާއި، އަތޮޅުތެރެއިން 101 ސާމްޕަލް އާއި، ރިސޯޓުތަކުން 17 ސާމްޕަލްގެ އިތުރަށް ލައިވް އެބޯޑްތަކުން ދެ ސާމްޕަލްއެވެ.
މިއާއެކު މުޅި ރާއްޖެއިން ޕޮޒިޓިވްވި ކޭސްތަކުގެ އަދަދު 73،094ށް އަރާފައިވާއިރު، އޭގެ ތެރެއިން 68،806 މީހަކު ވަނީ ރަނގަޅުވެފައެވެ. މިވަގުތު 4،067 މީހަކަށް ފަރުވާދެމުން އަންނައިރު އޭގެ ތެރެއިން 30 މީހުންނަށް ފަރުވާދެނީ އެޑްމިޓްކޮށްގެންނެވެ. އަދި މިބަލީގައި ރާއްޖެއިން މިހާތަނަށް 209 މީހަކު ވަނީ ނިޔާވެފައެވެ.
ރާއްޖޭގައި ކޮވިޑްގެ ހާލަތު އެންމެ ގޯސްވާން ފަށާފައިވަނީ މިދިޔަ މެއިމަހުގެ ތެރޭގައެވެ. އެއާއެކު ސަރުކާރުން އެޅި ހަރުކަށި ފިޔަވަޅުތަކަށްފަހު ޕޮޒިޓިވްވާ މީހުންގެ އަދަދު މިހާރު ވަނީ މަދުވާން ފަށާފައެވެ. ޕޮޒިޓިވް ކޭސްތައް މަދުވާން ފެށުމާއެކު، ސަރުކާރުން ވަނީ ބައެއް ފިޔަވަޅުތަކަށް ލުއިދޭން ފަށާފައެވެ.
