ފުވައްމުލައް ސިޓީން މިހާތަނަށް 750 މީހަކު ޕޮޒިޓިވްވެ 681 މީހަކު ބަލިން ރަނގަޅުވެއްޖެ
26 ޖޫން 2021 | ހޮނިހިރު 10:00139 ސާމްޕަލެއްގެ ނަތީޖާ ނުލިބޭ
ފުވައްމުލަކުގެ މަގެއް، ބަލި ކޮންޓްރޯލް ކުރުމުގެ ގޮތުން ވަނީ ގިނަ ފިޔަވަޅުތަކެއް އަޅާފައި
ފުވައްމުލައް ސިޓީން މިހާތަނަށް 750 މީހަކު ޕޮޒިޓިވްވެ 681 މީހަކު ބަލިން ރަނގަޅުވެއްޖެއެވެ.
ފުވައްމުލަކު ހޮސްޕިޓަލުން ބުނީ ފާއިތުވި 24 ގަޑިއިރުގެ ތެރޭގައި އެކަކު ބައްޔަށް ޕޮޒިޓިވްވެ 9 މީހަކު ބަލިން ރަނގަޅުވެފައިވާ ކަމަށެވެ. އެގޮތުން މިހާތަނަށް ޖުމްލަ 750 މީހުން ޕޮޒިޓިވްވެފައިވާ ކަމަށާއި، 681 މީހަކު ބަލިން ރަނގަޅުވެފައިވާ ކަމަށެވެ.
ބަލީގެ އެއްވެސް އަލާމާތެއް ފެނިއްޖެކަމުގައި ވަނީނަމަ ލަސްނުކޮށް ސާމްޕަލް ނެގުމަށް އިލްތިމާސްކޮށްފައިވެއެވެ. އެގޮތުން މިހާތަނަށް 15،749 ސާމްޕަލެއް ނަގާފައިވާ ކަމަށާއި، 139 ސާމްޕަލެއްގެ ނަތީޖާ ނުލިބޭ ކަމަށް އެހޮސްޕިޓަލުން ބުނެއެވެ. ހައިރިސްކް ކޮންޓެކްޓުންގެ ގޮތުގައި 275 މީހަކު ފާހަގަކުރެވިފައިވާ ކަމަށާއި، ތިން މީހަކަށް ފެސިލިޓީގައި ދަނީ ފަރުވާ ދެމުންނެވެ. އަދި 636 ގެއެއް މޮނިޓަރިންނަށް ލާފައިވާ ކަމަށް ތަފާސް ހިސާބުތަކުން ދައްކައެވެ.
70 އެކްޓިވް ކޭސް ހިމެނޭއިރު، އެއީ 63 ދިވެހިންނާއި 7 ބިދޭސީން ކަމަށް ހޮސްޕިޓަލުން މައުލޫމާތުދެއެވެ.
ކޮވިޑް-19 ކޮންޓްރޯލް ކުރުމަށް ފުވައްމުލައް ސިޓީގައި ގިނަ ފިޔަވަޅުތަކެއް އަޅާފައިވެއެވެ. ވެކްސިން ޖެހުމުގެ މުހިންމުކަމާއި، ވެކްސިންއަށް އާއްމުން ހޭލުންތެރިވުމުގެ ގޮތުން ގިނަ މަސައްކަތްތަކަށް ހޮސްޕިޓަލުން ވެސް ކުރަމުންދެއެވެ. އެގޮތުން މިހާތަނަށް 5865 މީހުން ވެކްސިންގެ ފުރަތަމަ ޑޯޒު ޖަހާފައިވެއެވެ. އަދި 3236 މީހުން ވަނީ ދެވަނަ ޑޯޒު ޖަހާފައެވެ.
ފުވައްމުލައް ދެވަނަ ފަހަރަށް މޮނިޓަރިންގެ ހާލަތަށް ގެނެސްފައިވަނީ ރޯގާގެ އަލާމާތް ހުރުމުގެ ސަބަބުން މެއި މަހުގެ 5 ވަނަ ދުވަހު ފުލޫ ކުލިނިކަށް ދެއްކި މީހަކު ޕޮޒިޓިވްވުމާ ގުޅިގެންނެވެ.
