ފްލެޓް ބަލަން އަންނައިރު ބޭނުންވާ މައުލޫމާތު ހޯދަން ތައްޔާރުވެގެން އައުމަށް އިލްތިމާސް ކޮށްފި
ފްލެޓު ބެލުމުގެ ފުރުސަތު ދެނީ ކޮންމެ ފެލްޓަކުން ވެސް ދެ މީހަކަށް
ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރު ސުހައިލް އަހުމަދު ވާހަކަދައްކަވަނީ
ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ މަޝްރޫގެ ފްލެޓު ލިބުނު މީހުން ފްލެޓް ބަލަން އަންނައިރު ސާފު ކުރަން ބޭނުންވާ މައުލޫމާތު ސާފުކުރުމާ ތަނުގެ މިން ނަގަން ބޭނުންވާ ނަމަ އެކަމަށް ތައްޔާރުވެގެން އައުމަށް އިލްތިމާސް ކުރާކަމަށް ހައުސިންގ ޑިވެލޮޕްމަންޓް ކޯޕަރޭޝަން (އެޗްޑީސީ)ގެ މެނޭޖިންގ ޑިރެކްޓަރު ސުހައިލް އަހުމަދު ވިދާޅުވެއްޖެއެވެ.
ހުޅުމާލެ ދެވަނަ ފިޔަވަހީގައި އަޅާފައިވާ ހިޔާ މަޝްރޫގެ ފްލެޓު ލިބުނު މީހުންނަށް ފްލެޓުތައް ދައްކާލަން ފަށާފައިވާއިރު ފްލެޓު ދެއްކުން ކުރިއަށް ގެެންދަން ހަމަޖައްސާފައި ވަނީ ކޮންމެ ދުވަހަކު ވެސް ހަތަރު ދަންފަޅިއަކަށް ބަހާލައިގެންނެވެ. އެގޮތުން ފްލެޓުތައް ދައްކަނީ ހެނދުނު 8ން 10:30ށް، އެއް ވަނަ ފަންގިފިލާއިން ހަތް ވަނަ ފަންގިފިލާއާ ދެމެދު، 10:30ން 13:00ށް، 8 ވަނަ ފަންގިފިލާއިން 14 ވަނަ ފަންގިފިލާއާ ދެމެދު، 13:00ން 14:30ށް 15 ވަނަ ފަންގިފިލާއިން 19ވަނަ ފަންގިފިލާއާ ދެމެދު އަދި 14:30ން 16:00 20-24 ވަނަ ފަންގިފިލާއާ ދެމެދެވެ.
މި ގަޑިތަކުގައި ފްލެޓު ބެލުމުގެ ފުރުސަތު ދެނީ ކޮންމެ ފެލްޓަކުން ވެސް ދެ މީހަކަށެވެ. ފެލްޓު ބަލަން ދާއިރު އައިޑީކާޑު ގެންދަންޖެހެއެވެ. އަދި ދަނީ ވެރިފަރާތް ނޫން މީހެއް ނަމަ އެމީހެއްގެ އައިޑީކާޑާއި ވެރިފަރާތުގެ އައިޑީކާޑުގެ ސާފު ފޮޓޯއެއް ގެންދަންޖެހެއެވެ. މިކަމާ ގުޅިގެން ސުހައިލް ވިދާޅުވީ މިހާ ކޮންޓްރޯލް ކޮށްގެން މިކަންކަން ކުރިއަށް ގެންދަނީ އަދިވެސް ނުނިމި ހުރި މަސައްކަތް ކުރަމުން ދިއުމާ ގުޅިގެން ކަމަށެވެ.
އެޗްޑީސީން ބުނީ ހިޔާ މަޝްރޫއުގެ ދަށުން ހުޅުމާލޭ ދެވަނަ ފިޔަވަހީގައި އިމާރާތް ކުރި 6،720 ފްލެޓު ލިބުނު މީހުންނަށް އެތަންތަން ދައްކަން ހަމަޖެހިފައި ވަނި މި މަހުގެ 26ވާ ހޮނިހިރު ދުވަހުން ފެށިގެން ގޮސް އަންނަ މަހުގެ 4 ވާ އާދިިއްތަ ދުވަހާ ހަމައަށް ކަމަށެވެ. އެއީ 26 ވަނަ ދުވަހު އެޗް-14 އަދި އެޗް-13، 27 ވަނަ ދުވަހު އެޗް-10 އަދި އެޗް-9، 28 ވަނަ ދުވަހު އެޗް-16 އަދި އެޗް-15، 29 ވަނަ ދުވަހު އެޗް-4 އަދި އެޗް-3، 30 ވަނަ ދުވަހު އެޗް-12 އަދި އެޗް-11، 1 ޖުލައިގައި އެޗް-2 އަދި އެޗް-1، 3 ޖުލައިގައި އެޗް-7 އަދި އެޗް-8، 4 ޖުލައިގައި އެޗް-5 އަދި އެޗް-6 ވަނަ ޓަވަރެވެ.
އެޗްޑީސީން ބުނީ ފްލެޓު ބަލަން ހާޒިރުނުވެވޭ މީހުންނަށް ފްލެޓު ދައްކަން ހަމަޖެހިފައި ވަނީ އެއްބަސްވުމުގައި ސޮއިކޮށް ފްލެޓު ހަވާލުކުރާ ދުވަހު ކަމަށެވެ. އަންނަ މަހުގެ 14 ވަނަ ދުވަހު އެއްބަސްވުމުގައި ސޮއިކުރަން ފަށާއިރު، ސޮއިކުރަން ފަށާ ދުވަހު ތަޅުދަނޑި ހަވާލުކުރާނެ ކަމަށް އެޗްޑީސީން ބުނެފައިވެއެވެ. މީގެ އިތުރުން އެއްބަސް ވުމުގައި ސޮއި ކުރަން ފެށުމުގެ ކުރިން ކަރަންޓުގެ މަސައްކަތް ކޮށް ނިންމުމަށް މަސައްކަތް ކުރާ ކަމަށާ އެދުވަހާ ހަމައަށް ނުނިމިއްޖެ ނަމަ ޖުލައި މަސް ނިމުމުގެ ކުރިން ކަރަންޓުގެ މަސައްކަތް ނިންމާނެ ކަމުގެ ޔަގީންކަން އަރުވާ ކަމަށް އެޗްޑީސީން ބުނެއެވެ.
