8 އަހަރުގެ ކުއްޖަކަށް ޖިންސީ ގޯނާ ކުރި މައްސަލައެއް ދެކުނު ޕޮލިސް ޑިވިޝަނުން ބަލަނީ
25 ޖޫން 2021 | ހުކުރު 16:55މައްސަލަ ފުލުހުންނަށް ހުށަހަޅާފައިވަނީ ޖޫން މަހުގެ 24ވަނަ ދުވަހުގެ ރޭގެ ވަގުތެއްގައި
ރޭޕާ ދެކޮޅަށް މެއި މަހުގެ 1ވަނަ ދުވަހު ކުރި މުޒާހަރާ
އުމުރުން 8 އަހަރުގެ ކުއްޖަކަށް ޖިންސީ ގޯނާ ކުރި މައްސަލައެއް ދެކުނު ޕޮލިސް ޑިވިޝަނުން ބަލަމުންދާ ކަމަށް ފުލުހުން ބުނެފިއެވެ.
ފުލުހުން ބުނީ ޏ އަތޮޅާއި ސ. އަތޮޅު ހިމެނޭ ދެކުނު ޕޮލިސް ޑިވިޝަނުން މި މައްސަލަ ބަލަމުން ދާކަމަށެވެ. މި މައްސަލަ ފުލުހުންނަށް ހުށަހަޅާފައިވަނީ ޖޫން މަހުގެ 24 ވަނަ ދުވަހުގެ ރޭގެ ވަގުތެއްގައި ކަމަށް ފުލުހުން ބުނެއެވެ.
މި މައްސަލައާ ގުޅިގެން އަދި މިހާތަނަށް މީހަކު ހައްޔަރުކޮށްފައި ނުވާއިރު ފުލުހުން ބުނީ މި މައްސަލަ އިތުރަށް ތަހުގީގު ކުރަމުންދާ ކަމަށެވެ.
ކުޑަކުދިންނަށް ކުރާ ޖިންސީ ގޯނާތަކުގެ މައްސަލަތައް ދޭތެރެދޭތެރެއިން ފެންމަތިވަމުން އަންނައިރު، ދާދިފަހުން ވެސް އުމުރުން އެންމެ ތިން އަހަރުގެ ތުއްތު ކުއްޖަކަށް ޖިންސީ ގޯނާ ކުރިކަމުގެ ތުހުމަތުގައި މީހަކު ހައްޔަރު ކޮށްފައިވެއެވެ.
މީގެ އިތުރުން އުތުރުގެ ރަށެއްގައި ކުޑަ ކުއްޖަކަށް ޖިންސީ ގޯނާ ކުރި މައްސަލައެއްގައި ބިދޭސީއަކު ވެސް ވަނީ ދާދި ފަހުން ހައްޔަރުކޮށްފައެވެ. އެއީ އުމުރުން 33 އަހަރުގެ ބަންގްލަދޭޝް މީހެއް ކަމަށްވެސް ފުލުހުން ވަނީ ބުނެފައެވެ.
