ކޮވިޑް-19އާ ގުޅިގެން އަޅާފައިވާ ފިޔަވަޅުތަކަށް އިތުރު ލުއިތަކެއް ދޭން އަދި ނިންމާފައި ނުވާ ކަމަށް ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ން ބުނެފިއެވެ.
އެޗްއީސޯސީން "ރާއްޖެ އެމްވީ"އަށް ބުނީ ފިޔަވަޅުތައް އަޅާ ހިސާބުން ފެށިގެން ކޭސްތަކަށް އަންނަ ބަދަލުތައް މޮނިޓަރކޮށް، ލުއިތައް ދޭނެ ގޮތްތަކާ މެދު މަޝްވަރާތައް ކުރެވޭނެ ކަމަށެވެ. އަދި ލުއިތައް ދެނީ އެގޮތުގެ މަތިން ކަމަށް ބުނެފައިވެއެވެ.
ކޮވިޑް-19ގެ ހަތަރު ވަނަ ރާޅެއް ރާއްޖެއަށް ބިންދާލުމާއެކު އަޅާފައިވާ ހަރުކަށި ފިޔަވަޅުތަކަށް މި މަހުގެ 21ވަނަ ދުވަހު ލުއިތަކެއް ދީފައިވާއިރު، ފިޔަވަޅުތައް ދަމަހައްޓަން އޮތީ މި މަހުގެ ނިޔަލަށެވެ. އެޗްއީއޯސީން ބުނީ ލުއިތައް ދޭން ނިންމާނީ ކޭސްތަކަށް އަންނަ ބަދަލުތައް ހަފުތާއަކަށް ބެލުމަށްފަހު ކަމަށާއި ހަފުތާ ހަމަވާނީ އަންނަ ހޯމަ ދުވަހަށް ކަމަށެވެ. އެހެންވީމާ އެ މަޝްވަރާ ފަށާނީ ވެސް ހޯމަ ދުވަހު ކަމަށް ބުންްޏެވެ.
ކޮވިޑް-19އާ ގުޅިގެން އަޅާފައިވާ ފިޔަވަޅުތަކަށް މިހާރު ދީފައިވާ ލުއިތަކަށް ބަލާއިރު، މީގެ ކުރިން ހަވީރު 4ން ހެނދުނު 8ށް އިއުލާންކޮށްފައިވާ ކާފިއު މިހާރު ވަނީ އިރު އޮއްސި 6ން ހެނދުނު 6ށް ކުރުކޮށްފައެވެ. އަދި ކެފޭ ރެސްޓޯރަންޓުތަކުން ވެސް ޓޭކްއަވޭއާއި ޑެލިވަރީގެ ޚިދުމަތް ދެވޭނެ ގަޑިތައް އިތުރުކޮށްފައިވާއިރު ސެލޫންތަކާއި ޖިމްތައް ވެސް ވަކި އުސޫލެއްގެ ދަށުން ހުޅުވުމުގެ ހުއްދަ ވަނީ ދީފައެވެ. މީގެ އިތުރަށް ހެނދުނު 6ން 8ށް އެކަނި ކަސްރަތަށް ނިކުމެ އުޅުން ވެސް ވަނީ ހުއްދަކޮށްފައެވެ.
މި ލުއިތައް ދިން ނަމަވެސް ކާފިއު ނޫން ގަޑިތަކުގައި އަދިވެސް ބޭރުގައި އުޅެވޭނީ ފުލުހުން ދޫކުރާ ޚާއްސަ ފާހަކާ އެކުގައެވެ. އެގޮތުން ކޮންމެ ގޭބީސީއަކަށް ދޫކުރާ ދެ ފާސް އޮންނަ އިރު، ހަމައެކަނި ޒަރޫރީ ބޭނުންތަކަށް ބޭރަށް ނިކުތުމަށް އެކަނި ފާހުގެ ބޭނުން ހިފުމަށް އެޗްޕީއޭއިން އިލްތިމާސްކޮށްފައިވެއެވެ. އަދި ކާފިއު ގަޑީގައި ބޭރުގައި އުޅުމަށް ޚާއްސަ ހާލަތްތަކުގައި، ޚާއްސަ ފާސްތަކެއް އޮންނައިރު، އެމަޖަންސީ ހާލަތުގައި ދާން ޖެހޭ ތަންތަނަށް ދިއުމަށް ފުލުހުން ދަނީ ފާސް ދޫކުރަމުންނެވެ.
