ބުއްދިއަކީ އިންސާނާގެ ފާރަވެރިޔާ ކަމަށާއި، ބުއްދީގެ ބޭނުން ހެޔޮގޮތުގައި ނުހިފާ މީހާގެ އެތައް ކަމެއް އުނިވާނެ ކަމަށް ހުކުރު ޚުތުބާގައި ބުނެފިއެވެ.
''ބުއްދީގެ ނިއުމަތް'' މި މައުޟޫއަށް ރާއްޖޭގެ އެކިކަންކޮޅުތަކަށް އިއްވި ހުކުރު ޚުތުބާގައި ބުނީ ބުއްދި އަކީ ރިޒުގު ދެއްވާފަދައިން އެކި ވަރުވަރަށް އެކި އިންސާނުންނަށް މާތް ﷲ ދެއްވާ މަތިވެރި ނިއުމަތެއް ކަމަށާއި، މި ނިއުމަތަކީ އިންސާނާއަށް ﷲ ދެއްވާފައިވާ އެންމެ މަތިވެރި ނިއުމަތް ކަމަށެވެ. ޚުތުބާގައި ބުނީ ބުއްދިވެރިކަން ލިބިގެންވާ މީހާގެ އެތައް ކަމެއް ފުރިހަމަވެގެންވާ ކަމަށާއި، ބުއްދިވެރިކަމެއް ނެތް މީހާ އާއި، ބުއްދީގެ ބޭނުން ހެޔޮގޮތުގައި ނުހިފާ މީހާގެ އެތައް ކަމެއް އުނިވެގެންވާ ކަމަށެވެ. ބުއްދިވެރިކަމަކީ ބާއްޖަވެރިކަމުގެ ތަޅުދަނޑި ކަމަށާއި، ބުއްދި އަކީ، ﷲ ވޮޑިގެންވާކަމުގެ ވަރަށް މަތިވެރި ދަލީލެއް ކަމަށެވެ. އަދި ފާޅުވެގެންވާ ޙުއްޖަތެއް ކަމަށް ޚުތުބާގައި ބުނެފައިވެއެވެ.
އިންސާނުން އެކި ރޮނގުތަކުން ކުރިއަރައިގޮސް، މީގެ ކުރީން ދެކެފައިނުވާ އިލްމީ އާލަމެއް އިންސާނުން ދެކެމުން ދަނީ ބުއްދީގެ އަލީގައިކަން ފާހަގަކޮށް ޚުތުބާގައި ބުނީ ދުނިޔެ ދެކެމުންދާ އަޖައިބުން ފުރިގެންވާ އިލްމީ ވަސީލަތްތައް އުފެއްދީ ނިކަމެތި އިންސާނާގެ ބުއްދިން ކަމަށެވެ. ޚުތުބާގައި ބުނީ ބުއްދިވެރިކަމާ ނުލައި ދީންވެރިކަމެއް ނުވާ ކަމަށާއި، ދީންވެރި ކަމާނުލައި ލަދުވެތިކަމެއް ނެތް ކަމަށެވެ. މިއީ އިންސާނާގެ ދުނިޔެ އާއި އާޚިރަތް ބާއްޖަވެރިކޮށްދޭ މާތް ސިފަތަކެއް ކަމަށާއި، ބުއްދިވެރިކަމާ އެކީ، ދީންވެރިކަމުގެ ސިފަ ނުލިބިއްޖެ މީހާގެ ބުއްދިއަކީ، އެމީހާގެ މައްޗަށް ހުރި ވަބާއެއް ކަމަށް ޚުތުބާގައި ބުނެފައިވެއެވެ.
މީގެ އިތުރުން ޚުތުބާގައި ބުނީ އެކަލާނގެ އެއްކައުވަންތަ ކުރުމަށް އިންސާނުންނާއި، ޖިންނީންގެ މައްޗަށް ލާޒިމުވެގެންވާ ކަމަށާއި، ބުއްދީގެ ބޭނުން ހެޔޮގޮތުގައި ހިފުމަކީ އެއީ ކަމަށެވެ. އެހެންނޫންނަމަ ބުއްދީގެ ބޭނުން ހެޔޮގޮތުގައި ހިފާބަޔަކަށް ނުވާނެ ކަމަށް ޚުތުބާގައި ފާހަގަކޮށްފައިވެއެވެ.
ޤުރްއާނުގައި މާތް ﷲ ވަޙީ ކުރައްވާފައި ވެއެވެ. މާނައީ: "އަދި އެއުރެން ބުނާނެތެވެ. ތިމަންމެން އަޑުއަހާ ކަމުގައިވީނަމަ، ނުވަތަ ވިސްނައި ފިކުރުކުރާކަމުގައި ވީނަމަ، ނަރަކައިގެ އަހުލުވެރިންގެ ތެރެއަކު ތިމަންމެން ނުވީހެވެ. ފަހެ، އެއުރެން، އެއުރެންގެ ފާފަތަކަށް އިޢުތިރާފު ވާނެތެވެ. ފަހެ، ނަރަކައިގެ އަހުލުވެރިންނަށް ރަޙުމަތުން ދުރުކުރެއްވުން ހުއްޓެވެ." މުސްލިމް އަޚުންނޭވެ! އެބައިމީހުން އެގޮތަށް އެ ބުނަނީ އެބައި މީހުންގެ ދުނިޔަވީ ޙަޔާތުގައި އެބައިމީހުންނަށް ބުއްދި ދެއްވާފައިނުވާތީ ހެއްޔެވެ؟ ޖަވާބުގައި ހަމަކަށަވަރުން ވެސް ތިޔަބައި މީހުން ބުނާނީ އެބައި މީހުންނަށް ބުއްދި ދެއްވާފައިވާ ވާހަކައެވެ. ނަމަވެސް އެބައި މީހުން ބުއްދީގެ ބޭނުން ހެޔޮގޮތުގައި ނުހިފީއެވެ. ﷲ ފިޔަވައި ބުދަތަކަށާއި، އެނޫން ވެސް ތަކެއްޗަށް އަޅުކަން ކުރީއެވެ. ﷲގެ މަގަށް ހުރަސް އެޅީއެވެ. ރަސޫލުންނާއި، ނަބިއްޔުންގެ ދަޢުވަތަށް އިންކާރު ކުރީއެވެ. ނަތީޖާ އަކީ އެބައިމީހުން ނަރަކައިގެ ޢަޛާބުގެ ރަހަ ދެކެންޖެހުމެވެ.ހުކުރު ޚުތުބާ
އިސްލާމް ދީނުގައި ހުރި ބައެއް ކަންކަމަކީ ހަމައެކަނި އިންސާނާގެ ބުއްދީގެ ނުވަތަ ސައިންސުގެ އަލީގައި އޭގެ ތެދު ދޮގު ކަށަވަރު ކުރެވޭނެ ކަންކަން ނޫންކަން ފާހަގަކޮށް ޚުތުބާގައި ބުނީ ﷲ ތަޢާލާ އެކަލާނގެ ނަބީންނާއި ރަސޫލުންނަށް ދެއްވި ބައެއް މުއުޖިޒާތަކީ މި މާއްދީ ދުނިޔޭގައި ﷲ ލައްވާފައިވާ ގުދުރަތީ އާދަ ފޫވައްޓާލައިފަނިވި ކަންކަން ކަމަށެވެ. ޚުތުބާގައި ބުނީ އެފަދަ އެއްވެސް ކަމެއްގެ ތެދު ދޮގު ހަމައެކަނި ބުއްދީގެ ބޭނުންކޮށްގެން ކަށަވަރެއް ނުކުރެވޭނެ ކަމަށާއި، ޝަރީއަތުގެ ބައެއް ހުކުމްފުޅުތަކަކީ ވެސް ހަމައެކަނި ބުއްދިއަށް ބަރޯސާވެގެން އެނގޭނެ ކަންކަމެއް ނޫން ކަމަށެވެ. މިގޮތުން ކީރިތި ޤުރްއާނާއި ރަސޫލާގެ ސުންނަތުގައި އައިސްފައިވާ ބައެއް ކަންކަމަކީ ބުއްދިއަށް ނުވިސްނުނު ނަމަވެސް އެގޮތަށް ގަބޫލުކޮށް، އަމަލުކުރަން ޖެހޭ ކަންކަން ކަމަށް ޚުތުބާގައި ބުނެފައިވެއެވެ.
މީގެ އިތުރަށް ޚުތުބާގައި ބުނީ ޝައިޠާނާއަށް އެންމެ އުނދަގޫ ކަމަކީ ބުއްދިވެރި މުއުމިނަކު މަގުފުރެއްދުން ކަމަށާއި، ބުއްދިވެރި މުއުމިނަކަށް ވަސްވާސް ދިނުމަށް ވުރެ، ސަތޭކަ ޖާހިލުން މަގުފުރެއްދުން ޝައިތާނާއަށް ފަސޭހަވެގެންވާ ކަމަށެވެ.
ޚުތުބާގައި ބުނީ ދުނިޔޭގެ އެއްވެސް އެދުމެއް ނެތް، ބުއްދިވެރިކަމުގެ ސިފަ މަލާއިކަތުންނަށް ﷲ ދެއްވާފައިވާ ކަމަށާއި، ބުއްދިވެރިކަމާ ނުލައި ދުނިޔޭގެ އެދުން ޖަނަވާރުންގެ ކިބައިގައި ލައްވާފައިވާ ކަމަށެވެ. ނަމަވެސް މި ދެބައި އިންސާނާއަށް ދެއްވާފައިވާކަން ޚުތުބާގައި ފާހަގަކޮށްފައިވެއެވެ. އެމީހެއްގެ ދުނިޔަވީ އެދުމާއި، ދަހިވެތިކަމުގެ މައްޗަށް ބުއްދިވެރިކަން އިސްކޮށްފި މީހާގެ ހެޔޮކަން ބޮޑު ވެގެންވާ ކަމަށާއި، އެ މީހެއްގެ ބުއްދިވެރިކަމުގެ މައްޗަށް ދުނިޔޭގެ އެދުމާއި، ދަހިވެތިކަން އިސްކޮށްފިމީހާ ޖަނަވާރުންގެ ދަރަޖައަށް ވެއްޓިދާ ކަމަށް ޚުތުބާގައި ބުނެފައިވެއެވެ.
ޚުތުބާގައި ބުނީ ބުއްދި އަކީ ނިއުމަތެއް ކަމަށާއި، ބުއްދިއަށް އުނިކަން ލިބޭ ޒާތުގެ ކަންކަމުން ދުރުހެލިވާން ޖެހޭނެ ކަމަށެވެ. އެގޮތުން ޖުވާކުޅުމާއި، ރާބުއިމާއި، މަސްތުވާތަކެތި ބޭނުންކުރުމާއި، ޙަރާމް ތަކެތި ކެއުން ފަދަކަންކަމީ ދެ ދުނިޔޭގައި ވެސް ގެއްލުންހުރި ކަންކަން ކަމަށް ޚުތުބާގައި ބުނެފައިވެއެވެ. ބުއްދިވެރި ހެޔޮ ލަފާ މުޖުތަމައެއް ބިނާކުރެވޭނީ މުޖުތަމައުގެ އެންމެހައި އަފްރާދުން އެއްބަޔަކު އަނެއް ބަޔަކަށް އެހީތެރިވެދިވެގެން ކަމަށެވެ. ނަމަވެސް ހިތާމައަކީ މިއަދު މިފަދަކަންކަމާ މެދު މުޖުތަމަޢުގެ އެއް ބަޔަކު ޣާފިލުވެފައިވާކަން ކަމަށް ޚުތުބާގައި ބުނެފައިވެއެވެ.
އެހެންކަމުން ބުއްދީގެ ބޭނުން ހެޔޮގޮތުގައި ހިފުމަށް ޚުތުބާގައި ވަނީ ގޮވާލާފައެވެ.
