ކުރީގެ ޓޫރިޒަމް މިނިސްޓަރ އަލީ ވަހީދުގެ ޕާސްޕޯޓު ހިފެހެއްޓުމަށް ކޯޓު އަމުރަކަށް އެދިއްޖެއެވެ.
އަލީ ވަހީދު ޓޫރިޒަމް މިނިސްޓަރ ކަމުގެ މަގާމުގައި ހުރި އިރު، އެ ވުޒާރާގެ އަންހެން މުވައްޒަފުންތަކަކަށް ޖިންސީ ގޯނާކުރި މައްސަލައެއްގައި އަލީ ވަހީދުގެ މައްޗަށް ދައުވާ އުފުލައި ޝަރީއަތް ކުރިއަށްދާއިރު އަލީ ވަހީދު ހުރީ ބޭސްފަރުވާއަށް ރާއްޖެއިން ބޭރުގައެވެ. އެ މައްސަލަ ފެންމަތިވުމާ އެކު އޭނާގެ ޕާސްޕޯޓު ހިފެހެއްޓުމަށް ފަހު ކޯޓު އަމުރެއްގެ ދަށުން ޕާސްޕޯޓު ދޫކުރީ ހަތަރު މަހަށެވެ. އަދި އެކަން ކުރީ އައްސަދު އަލީ (އަޑުބަރޭ) ޖާމިނުވާގޮތަށެވެ. އެހެންނަމަވެސް ހަތަރު މަސްވެ، ޝަރީއަތް ފެށުނު އިރު ވެސް އަލީ ވަހީދު ރާއްޖެއަށް އެނބުރި އައިސްފައެއް ނުވެއެވެ. އަދި އެކަމުގެ ޒިންމާ އަޑުބަރޭ ވެސް ނަގާފައެއް ނުވެއެވެ.
އަލީ ވަހީދުގެ ޕާސްޕޯޓު ހިފެހެއްޓުމަށް މި މަހުގެ 22 ވަނަ ދުވަހު ފުލުހަށް ހުށަހަޅާފައިވާކަން ޕީޖީ އޮފީހުން ވަނީ ރާއްޖެ އެމްވީއަށް ޔަގީންކޮށްދީފައެވެ. އަދި ޖޫން 23 ވަނަ ދުވަހު ފުލުހުން އެކަން ކޯޓަށް ހުށަހެޅި ކަމަށް ވެސް ބުންޏެވެ.
އަލީ ވަހީދު ބޭސްފަރުވާ ކުރުމަށް މިވަގުތު ހުރީ އިނގިރޭސިވިލާތުގައި ކަމަށްވާތީ، އަލީ ވަހީދުގެ އެދުމުގެ މަތިން ކޯޓުން ޝަރީއަތް ކުރިއަށް ގެންދަނީ އޮންލައިންކޮށެވެ. އަލީ ވަހީދު ޝަރީއަތުގައި ބައިވެރިވާން ޖެހެނީ އެ ގައުމުގެ ހައިކޮމިޝަނުގައި ހުރެގެންނެވެ. ކޯޓުން މިގޮތަށް ނިންމާފައި ވަނީ އަލީ ވަހީދުގެ ބޭސްފަރުވާ ނުނިމޭކަން ހާމަކޮށް ލިޔެކިޔުންތައް ހުށަހެޅުމުންނެވެ. އެ ލިޔެކިޔުންތައް ދައުލަތާ ހިއްސާކުރުމަށް ޕީޖީ އޮފީހުން ކޯޓުގައި އެދިފައިވާ ކަމަށް ވެސް އެ އޮފީހުން ބުނެފައިވެއެވެ.
މި މަހުގެ 21 ވަނަ ދުވަހު އަލީ ވަހީދު މައްސަލައިގެ ޝަރީއަތުގެ އަޑުއެހުމެއް ބާއްވާފައިވާއިރު ދައުލަތުން ވަނީ އަލީވަހީދުގެ ޝަރީއަތް އޮންލައިންކޮށް ކުރިއަށް ގެންދިއުމަށް އިންކާރުކޮށްފައެވެ. އެގޮތުން އޭނާ ހުރީ ކޮންތާކުކަން ދައުލަތަށް ޔަގީން ނުވާކަމަށާއި، އިނގިރޭސިވިލާތުގައި ހުރި ނަމަވެސް އެތަނަކީ ރާއްޖޭގެ އިހްތިސާސް ހިނގާ ތަނަކަށް ނުވާތީ އެތަނުގައި އަލީ ވަހީދު ހުރެގެން ޝަރީއަތް ކުރިއަށް ގެންދިއުމަށް ތަކުރާރުކޮށް އިންކާރުކޮށްފައިވެއެވެ. އެހެންނަމަވެސް ކޯޓުން ވަނީ އެ ދުވަހުގެ އަޑުއެހުން ކުރިއަށް ގެންގޮސްފައެވެ.
އަލީ ވަހީދުގެ އަޑުއެހުމަކީ ރާއްޖޭގެ ގާނޫނު ނުހިނގާ ތަނެއްގައި ވީޑިއޯ ކޮންފަރެންސްކޮށް ޖިނާއީ މައްސަލައެއްގައި ޝަރީއަތުގެ އަޑުއެހުމެއް ބޭއްވި ފުރަތަމަ އަޑުއެހުމެވެ. އެއީ ސުޕްރީމް ކޯޓުގެ ގަވާއިދާ މުޅިން ޚިލާފު ކަމަކަށްވާތީ އެ އޮފީހުން ވަނީ އެ ޝަރީއަތް އޮންލައިންކޮށް ގެންދަން ނިންމި ނިންމުން ހައިކޯޓުގައި އިސްތިއުނާފުކުރަން ނިންމާފައެވެ.
