ކުޑަކުދިންނަށް ޖެހޭ ނުރައްކާތެރިބަލި "މިސްކު" ގައި ހަތަރު ކުއްޖަކު އައިސީޔޫގައި!

ކޮވިޑް-19 ޖެހޭ ކުޑަކުދިންނަށް އެ ބަލިން ރަނގަޅުވުމަށް ފަހު ޖެހޭ ނުރައްކާތެރި ބަލި "މަލްޓި ސިސްޓަމް އިންފްލެމޭޓްރީ ސިންޑްރަމް" (މިސްކް) ޖެހިގެން ރާއްޖޭގައި ހަތަރު ކުޑަކުދިންނަށް އައިސީޔޫގައި ފަރުވާދެމުން އަންނަ ކަމަށް މޯލްޑިވްސް ޓެކްނިކަލް އެޑްވައިޒަރީ ގުރޫޕް އޮން އިމިއުނައިޒޭޝަންގެ ޗެއާޕާސަން ޑރ. އަހުމަދު ފައިސަލް ވިދާޅުވެއްޖެއެވެ.

"ރާއްޖެ އެމްވީ"ށް ދެއްވި އިންޓަވިއުއެއްގައި ޑރ. ފައިސަލް ވިދާޅުވީ އުމުރުން 3 އަހަރާއި 10 އަހަރާ ދެމެދުގެ 8 ކުއްޖަކަށް މިހާރު ވެސް އެބަލި ޖެހިގެން ރާއްޖޭގައި ރިޕޯޓުކޮށްފައިވާ ކަމަށެވެ. ފައިސަލް ވިދާޅުވީ އެ ބަލީގައި ފެންނަނީ އާންމުކޮށް ވެސް ފެންނަ ކަހަލަ ބައެއް އަލާމާތްތަކުން ބަލި ބޮޑުނުވެ މައިލްޑް އަލާމާތްތައް ނަމަ ބަލި ދެނެނުގަނެވި ވެސް ހުންނާނެ ކަމަށެވެ. އެގޮތުން ބަލީގައި ފެންނަ އެންމެ މައިގަނޑު އެއް އަލާމާތަކީ ހުން އައުން ކަން ފައިސަލް ފާހަގަކުރެއްވިއެވެ.

ޑރ. ފައިސަލް ވިދާޅުވީ މި ބަލި ޖެހޭނީ ހަމައެކަނި ކޮވިޑް-19 ޖެހި ރަނގަޅުވެފައިވާ ކުޑަކުދިންނަށް ކަމަށެވެ. ބަލި ޖެހޭނީ ކޮވިޑް-19 ޖެހޭތާ 2 ހަފްތާއާއި 6 ހަފްތާއާ ދެމެދުގައި ކަމަށް ވިދާޅުވިއެވެ. ބަލީގެ އަލާމާތްތައް ތެރޭގައި ވަރަށް ގަދައަށް ހުން އައުމާއި، ހަންގަނޑު ރަތްވެ ދުޅަވުމާއި ބިހި ނަގައި ލޯ ރަތްވުން ފަދަ ކަންކަން ވުމާއި، ހޮޑުލައި، ބޭރަށް ހިނގުމާއި، ލޭ މަނާ ނުވުމާއި، ބްލަޑް ޕްރެޝަރ ދަށްވެ ޝޮކަށް ދިއުން ފަދަ އަލާމާތްތައް ފެންނާނެ ކަމަށް ވިދާޅުވިއެވެ.

ޑރ. ފައިސަލް ވިދާޅުވީ މި ބައްޔަކީ ގައިން ގަޔަށް އަރާ ބައްޔެއް ނޫން ކަމަށެވެ. މި ބައްޔަކީ ކޮވިޑް-19 ޖެހިގެން ފެތުރޭ ބައްޔެއް ކަމަށާއި، ކޮވިޑް ޖެހޭ އެންމެންނަށް މި ބަލި ނުޖެހުން ވެސް އެކަށީގެންވާ ކަމަށެވެ. އެގޮތުން މި ބަލި ޖެހެނީ ކޮވިޑް-19 ޖެހިފައި ރަނގަޅުވުމަށް ފަހު ދެން ހަށިގަނޑުގައި އުފައްދާ މާއްދާތަކެއްގެ ސަބަބުން ކަމަށް ޑރ. ފައިސަލް ވިދާޅުވިއެވެ. އެގޮތުން މިއީ އިންފްލެމޭޝަންއެއް ކަމަށް ވިދާޅުވިއެވެ.

ޑރ. ފައިސަލް ވިދާޅުވީ މި ބަލީގެ އެކި ދަރަޖަތައް ހުންނަ ކަމަށެވެ. އެގޮތުން މައިލްޑް މޮޑަރޭޓް އަދި ސިވިއަރ އަދި ކްރިޓިކަލް ސްޓޭޖް ހިމެނޭ ކަމަށް ވިދާޅުވިއެވެ.

އަވަށްޓެރި އިންޑިއާގައި މިބަލި ވަރަށް ހަލުވިކޮށް ފެތުރެމުންދާއިރު، ކޮވިޑް-19ގެ މިދިޔަ ރާޅުގައި ރާއްޖެއިން މި ބަލި ފެނިފައެއް ނުވެއެވެ. އެހެންނަމަވެސް ރާއްޖެއިން އިންޑިއާ ވޭރިއަންޓް، "ޑެލްޓާ" ފެތުރެމުން ދާއިރު މި ބަލި ފެނިފައިވާކަން ޑރ. ފައިސަލް ފާހަގަކުރެއްވިއެވެ. ޑރ. ފައިސަލް ވިދާޅުވީ މި ބައްޔަކީ އެހެން ކަމަކުން އަދި އެހެން ގޮތަކުން ފެތުރޭ ބައްޔަކަށް ނުވާތީ މި ބަލިން ރައްކާތެރިވުމަށް ކުރެވޭނެ ކަމަކީ ކޮވިޑް-19އިން ރައްކާތެރިވުން ކަމަށެވެ. އެހެންވީމަ ކުޑަކުދިންގެ ރައްކާތެރިކަމަށް ބޮޑެތި މީހުން ވަރަށް ސަމާލުވާން ޖެހޭ ކަމަށް ވިދާޅުވިއެވެ.