ރައްޔިތުންގެ މަޖިލީހުގައި މިހާރު ހިނގަމުންދާ ދެވަނަ ދައުރު ޖުލައި މަހުގެ 8 ވަނަ ދުވަހާ ހަމައަށް ދިގުދަންމާލަން ފާސްކޮށްފިއެވެ.
ބުދަ ދުވަހުގެ ޖަލްސާގައި މިކަން ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިންނެވި 38 މެންބަރުގެ އިއްތިފާގުންނެވެ.
ޖަލްސާ ފައްޓަވަމުން ރިޔާސަތުގައި އިންނެވި ނައިބު ރައީސް އީވާ އަބްދުﷲ ވިދާޅުވީ މިހާރު މަޖިލީހަށް ހުށަހެޅިފައިވާ މުހިންމު މައްސަލަތައް ނިންމުމަށްޓަކައި މިދައުރު ދިގުދަންމާލުމަށް ޖެހޭކަމަށެވެ.
އެގޮތުން މަޖިލީހުގެ ގަވާއިދުގައި ބުނާގޮތުން ދެ ވަނަ ދައުރު ހިނގާނީ މެއި މަހުގެ 16 ވަނަ ދުވަހުން ފެށިގެން ޖޫން މަސް ނިމެންދެން ކަމަށާއި ނަމަވެސް މަސައްކަތްތައް ނިންމުމަށްޓަކައި ޖުލައި މަހުގެ 8 ވަނަ ދުވަހާ ހަމައަށް ދައުރު ދަންމާލުމަށް ހުށަހަޅުއްވާކަމަށެވެ.
އަޅުގަނޑަށް އެއް ބައި ކޮމިޓީތަކުން ލިޔުން އައިސްފައި އެބަހުރި މަސައްކަތް ނިންމުމަށްޓަކައި އިތުރު ހަފްތާއެއް ދިނުމަށްޓަކައި. އެގޮތުގެ މަތިން މިއެދެނީ ދައުރު ދިގު ކޮށްދިނުމަށް ޖުލައި 8 އާ ހަމައަށް.އީވާ އަބްދުﷲ/ ނައިބު ރައީސް
މިދައުރުގައި ހިނގަމުންދާ މުހިންމު މަސައްކަތްތަކަށް ބަލާއިރު ގާނޫނުލްއުގޫބާތަށް އިސްލާހު ގެނައުމުގެ ބިލްތަކުގެ މަސައްކަތާއި ޓެރަރިޒަމް މަނާކުރުމުގެ ގާނޫނަށް ހުށަހަޅާފައިވާ އިސްލާހުގެ ބިލްގެ މަސައްކަތް ހިމެނެއެވެ.
މީގެއިތުރުން ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދަށް އަމާޒުކޮށް ދިން ހަމަލާގައި އެމަނިކުފާނުގެ ސެކިޔުރިޓީ ފެއިލްވި ގޮތުގެ އިންކުއަރީ ކުރިޔަށްގެންދާ 241 ކޮމިޓީގެ މަސައްކަތް ހިމެނެއެވެ. އެކޮމިޓީން މަސައްކަތްކުރަމުން އަންނަނީ މި މަސް ނިމެންވާއިރަށް ކޮމެޓީ ރިޕޯޓް އެކުލަވާލައި ތަޅުމަށް ފޮނުވުމަށެވެ.
ރައްޔިތުންގެ މަޖިލީހުގެ ގަވާއިދު ބުނާގޮތުން ތިން ވަނަ ދައުރު ހިނގާނީ އޮގަސްޓްމަހުގެ 16 ވަނަ ދުވަހުން ފެށިގެން ނޮވެމްބަރ މަހުގެ ނިޔަލަށެވެ.
