އެމެރިކާއިން އީރާންގެ ދައުލަތުގެ ނޫސް ވެބްސައިޓްތައް ސީޒްކޮށްފި

އެމެރިކާއިން އީރާނުގެ ދައުލަތުގެ މީޑިއާ އައުޓްލެޓްތަކެއް ސީޒްކޮށްފިއެވެ.

ދޮގު ޚަބަރު ފަތުރާ ކަމުގެ ތުހުމަތުގައި އެމެރިކާގެ ޑިޕާޓްމަންޓް އޮފް ޖަސްޓިސްއިން މީގެ ކުރިން ވެސް އީރާނުގެ ޑޮމެއިންތަކެއް ސީޒްކޮށްފައިވެއެވެ. އަދި ޓްވިޓާއާއި، ގޫގުލް ފަދަ އެމެރިކާގެ ސޯޝަލް މީޑިއާ ކޯޕަރޭޝަންތަކުން އީރާންގެ އޮންލައިން ނޫސްތަކާމެދު ތަފާތުކުރުންތަކެއް ގެންގުޅެފައިވެއެވެ. އެކަމަކު އީރާންގެ ބޮޑު މީޑިއާއެއްގެ ވެބްސައިޓް ސީޒްކުރި މީ ފުރަތަމަ ފަހަރެވެ.

އެމެރިކާއިން ސީޒްކުރި އަލްއާލަމްއާއި ޕްރެސްޓީވީ އަކީ އީރާންގެ ދައުލަތުގެ މީޑިއާ ކޯޕަރޭޝަން، އިސްލާމިކް ރިޕަބްލިކް އޮފް އިރާން ބްރޮޑްކާސްޓިންގެ ދެ ވެބްސައިޓެވެ. ޕްރެސްޓީވީއަކީ އިނގިރޭސި ބަހުން ޚަބަރު ގެނެސްދޭ މީޑިއާއެކެވެ. އެކަމަކު އަލްއާލަމްއިން އިނގިރޭސިބަހުގެ އިތުރުން އަރަބި އަދި ފާރިސީބަހުން ބްރޮޑްކާސްޓްކުރެއެވެ.

އެމެރިކާއިން އިތުރަށް ސީޒްކުރި އަލްމަސިރަހް އަކީ 2012 ވަނަ އަހަރު ލުބުނާންގެ ބެއިރޫތުގައި ޔަމަނުގެ އަންސާރުﷲ މޫވްމަންޓުން އުފެއްދި މީޑިއާއެކެވެ. ހަމައެއާއެކު ހަމާސް ޖަމާއަތަށް ބާރުދޭ ރިޕޯޓުތައް ގެނެސްދޭ ސައިޓެއް ކަމަށްވާ 'ޕަލެސްޓައިން ޓުޑޭ' ވެސް އެމެރިކާއިން ސީޒްކޮށްފައިވެއެވެ.

އެމެރިކާއިން މީގެ ކުރިން ވެސް އޮންލައިން ނޫސްތަކާ މެދު މި ފަދަ ފިޔަވަޅުތައް އަޅާފައިވެއެވެ. އެގޮތުން ޝަރުތުތަކާއި ޚިލާފުވީކަމަށް ބުނެ، ޓްވިޓާއިން ވަނީ މިދިޔަ އަހަރުގެ އޮކްޓޯބަރުމަހު އަލްމަސިރަހްގެ އެކައުންޓް ސަސްޕެންޑްކޮށްފައެވެ. މިއަހަރުގެ ޖެނުއަރީމަހު ފޭސްބުކް އިން ވަނީ ޕްރެސްޓީވީގެ ފޭސްބުކް ޕޭޖް ޑިލީޓްކޮށްލާފައެވެ.

އީރާނުގެ މައި މީޑިއާއެއް އެމެރިކާއިން ސީޒްކޮށްފައިމިވަނީ، އީރާންގެ ރިޔާސީ އިންތިޚާބު ބޭއްވިތާ ކުޑަ ދުވަސްކޮޅެއްގެ ތެރޭގައެވެ. މި އިންތިޚާބު ކަމިޔާބުކުރެއްވީ އިބްރާހިމް ރައީސީއެވެ.