މަރާލާފައިވާ ކުއްޖާ ކުށްވެރިވާ ގޮތަށް ބައެއް ޚަބަރު ފަތުރަމުންދާތީ ކޮމިޓީން ކަންބޮޑުވުންފާޅުކޮށްފި
ގާނޫނުތަކާ ތައާރަޒުވާ ގޮތަށް ހުރި ލިޔުންތައް ދެނެގަންނަން ޖެހޭ ކަމަށް މެންބަރުން ބުނޭ
ހިއުމަންރައީޓްސް އެންޑް ޖެންޑާ ކޮމެޓީން މީގެ ކުރިން ބޭއްވި ބައްދަލުވުމެއްގެ ތެރެއިން
ރަހީނުކޮށްގެން އުޅުނު ކުއްޖަކު މަރާލާފައި އޮއްވައި ހުޅުމާލެއިން ފެނުނު މައްސަލައާ ގުޅިގެން އެ ކުއްޖާ ކުށްވެރިވާ މޭރުމުރުން ބައެއް މީހުން ޚަބަރު ފަތުރަމުންދާ ކަމަށްބުނެ ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން ކަންބޮޑުވުން ފާޅުކޮށްފިއެވެ.
މި މައްސަލައާ ގުޅިގެން އަންގާރަ ދުވަހު އެ ކޮމިޓީން ކުރިއަށް ގެންދިޔަ ބައްދަލުވުމުގައި މެންބަރު ވަނީ ކުއްޖާ ކުށްވެރިވާ މޭރުމުން ބައެއް ނޫސްތަކުގައި ޚަބަރު ލިޔެފައިވާ ކަމަށާއި، ގާނޫނުތަކާ ތައާރަޒުވާ ގޮތަށް ހުރި ލިޔުންތައް ދެނެގަންނަން ޖެހޭ ކަމަށް ބުނެފައެވެ.
މިކަމާ ގުޅިގެން ކޮމިޓީގެ މުގައްރިރު ހިންނަވަރު ދާއިރާގެ މެންބަރު ޖީހާން މަހުމޫދު ވިދާޅުވީ މިފަދަ ހާދިސާތައް ދިމާވުމުން މީގެ ކުރިންވެސް އަމަލުކުރަމުން އަންނަ އުސޫލާ އެއްގޮތަށް މިނިވަން މުއައްސަސާތަކުގެ ކޮމިޓީގެ ސަމާލުކަން އެކަމަށް ގެނައުމަށް ހުށަހަޅާ ކަމަށެވެ.
މީގެ އިތުރުން ލިޔުމުން މައުލޫމާތު ސާފުކުރުމަށް ވެސް ކޮމިޓީން ނިންމާފައިވެއެވެ. އެގޮތުން މިކަން ހިނގާފައިވާ ގޮތާއި އެ ކުއްޖާއަށް ގާނޫނުން ލިބެންޖެހޭ ހިމާޔަތާއި ރައްކާތެރިކަން ފޯރުކޮށްދެވިފައިވާ މިންވަރު ބެލުމާއި މައްސަލައާ ގުޅިގެން އަޅާފައިވާ ފިޔަވަޅުތައް ވެސް ބަލަން ޖެހޭކަމަށް މެންބަރުން ވަނީ ވިދާޅުވެފައެވެ. އެއަށްފަހު މައްސަލައިގައި އަމަލުކުރާނެ ގޮތެއް ކަނޑައެޅުމަށް ކޮމިޓީން ވަނީ ނިންމާފައެވެ.
އިތުރު ކަމެއްގެ ގޮތުން މުގައްރިރު ޖީހާން ވިދާޅުވީ މުއްދަތެއް ދިނުމަށްފަހު ލިޔެކިޔުންތައް ލިބުމާއެކު ކަމާބެހޭ ހުރިހާ މުއައްސަސާތަކާއެކު ކޮމިޓީން ބައްދަލުކުރަން ވެސް ހުށަހަޅާ ކަމަށެވެ. އެގޮތުން ހާދިސާއާ ގުޅޭ މައުލޫމާތުތައް ދިނުމަށް މުއައްސަސާތަކަށް ދެ ދުވަހުގެ މުއްދަތެއް ދިނުމަށް ނިންމާފައިވެއެވެ. ކޮމިޓީގެ މިއަދުގެ ބައްދަލުވުން ނިންމާލީ އިތުރު ބައްދަލުވުމެއް ހޮނިހިރު ދުވަހު ބޭއްވުމަށް ނިންމާފައެވެ.
