"އެކަނިދާ އަންހެން ކުދިން ކައިރިން ސިންގަލްހޭ ފުލުހުން ނާހާނެ"
އާންމު މީހަކު ކޮށްފައިވާ ޓްވީޓެއްގައި ބުނެފައިވަނީ މަގުމަތިން ދާ އަންހެން ކުދިން ހުއްޓުވައި އެ މީހާ ސިންގަލްތޯ އެކަނި ދަނީ ކީއްވެގެންތޯ އަދި ކޮންތާކަށްތޯ ބައެއް ފުލުހުން ސުވާލުކުރަމުންދާ ކަމަަށް
ފުލުހުން- ލޮކްޑައުން ތެރޭގައި ހަރަކާތްތެރި ވަނީ
ކޮވިޑާ ގުޅިގެން މާލޭގައި ކާފިއު ހިންގާ ވަގުތުގައި، އެކަނި ދާ އަންހެން ކުދިން ކައިރީގައި "ސިންގަލް" ހޭ ފުލުހުން ނާހާނެ ކަމަށާއި، މަސައްކަތާ ނުގުޅޭ މައުލޫމާތު ފުލުހުން ސާފު ނުކުރާނެ ކަމަށް ފުލުހުން ބުނެފިއެވެ.
ފުލުހުން މިހެން ބުނެފައިވަނީ އާންމުންގެ މީހަކު ކުރި ޓްވީޓަކާއި ގުޅިގެން ނޫސްވެރިން ކުރި ސުވާލަކަށް ޖަވާބު ދެމުންނެވެ. އެމީހާ ކޮށްފައިވާ ޓްވީޓުގައި ބުނެފައިވަނީ މަގުމަތިން ދާ އަންހެން ކުދިން ހުއްޓުވާ އެ މީހާ ސިންގަލްތޯ، އެކަނި ދަނީ ކީއްވެގެންތޯ އަދި ކޮންތާކަށްތޯ ބައެއް ފުލުހުން ސުވާލުކުރަމުންދާ ކަމަަށެވެ. އަދި މިއީ ބަލައިގަނެވޭނެ ކަމެއް ނޫން ކަމަށާއި، ފުލުހުންގެ ޒިންމާއަކީ މުޖްތަމައަކީ ރައްކާތެރިތަނެއްކަން ކަށަވަރު ކުރުން ކަމަށެވެ.
މިކަމާ ގުޅޭގޮތުން ފުލުހުން ބުނީ، ކޮވިޑް-19އާ ގުޅިގެން ހެލްތު ޕްރޮޓެކްޝަން އޭޖެންސީ (އެޗްޕީއޭ)އިން އަޅާފައިވާ ފިޔަވަޅުތައް ތަންފީޒު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން، މަސައްކަތާ ނުގުޅޭ މައުލޫމާތު ސާފުކުރާ ކަމުގެ އެއްވެސް ޝަކުވާއެއް އެއްވެސް ފަރާތަކުން މިހާތަނަށް ފުލުހުން ހުށަހަޅާފައި ނުވާ ކަމަށެވެ.
އަދި މިފަދަ ކަމެއް އެއްވެސް ފުލުހެއްގެ ފަރާތުން ފެނިއްޖެނަމަ، ހަމަޖެހިފައި އޮންނަ އުސޫލުގެ ތެރެއިން ފުލުހުންގެ ޕްރޮފެޝަނަލް ސްޓެންޑަރޑްސް ކޮމާންޑަށް ނުވަތަ ނެޝަނަލް އިންޓެގްރިޓީ ކޮމިޝަނަށް ހުށަހަޅައިގެން އެ މައްސަލައެއް ބެލުން އެއީ އެންމެ ރަނގަޅު ގޮތް ކަމުގައި ދެކޭކަމަށެވެ.
މީގެ އިތުރުން އެޗްޕީއޭ އިން އަޅާފައިވާ ފިޔަވަޅުތައް ތަންފީޒު ކުރުމަށް ފުލުހުން ކުރަމުންދާ މަސައްކަތުގެ ތެރެއިން، ޕަރމިޓް ވެރިފައި ކުރުމަށް ބައެއް ހާލަތްތަކުގައި ދިވެހި ރައްޔިތެއްކަން އަންގައިދޭ ކާޑު ނަންބަރު، އަދި ޖޫރިމަނާ ކުރަން ޖެހިއްޖެ ހާލަތެއްގައި، އެކަން އެސްއެމްއެސް މެދުވެރިކޮށް އެ ފަރާތަކަށް އެންގުމަށްޓަކައި ފޯނު ނަންބަރު އޮޅުން ފިލުވާނެކަމަށް ފުލުހުން ވަނީ ބުނެފައެވެ.
ފުލުހުން ފަހުން ކުރި ޓްވީޓެއްގައި ބުނެފައިވަނީ ކޮވިޑް-19އާ ގުޅިގެން ހެލްތު ޕްރޮޓެކްޝަން އޭޖެންސީއިން އަޅާފައިވާ ފިޔަވަޅުތައް ތަންފީޒު ކުރުމަށް ފުލުހުން ކުރަމުންދާ މަސައްކަތްތަކުގެ ތެރެއިން، މަސައްކަތާ ނުގުޅޭ މައުލޫމާތު ސާފުކުރާ ކަމުގެ އެއްވެސް ޝަކުވާއެއް އެއްވެސް ފަރާތަކުން މިހާތަނަށް ފުލުހުން ހުށަހަޅާފައި ނުވާ ކަމަށާއި، ނަމަވެސް، ސޯޝަލް މީޑިއާގައި ބައެއް ފަރާތްތަކުން މިފަދަ ކަންކަމަށް ތުހުމަތު ކޮށްފައި ވާތީ ޕްރޮފެޝަނަލް ސްޓޭންޑަރޑްސް ކޮމާންޑުން ދަނީ އެކަމާ ގުޅިގެން ބަލަންޖެހޭ ކަންކަން ބަލަމުން ކަމަށެވެ.
އަދި، މިފަދަ ކަމެއް އެއްވެސް ފުލުހެއްގެ ފަރާތުން ފެނިއްޖެނަމަ، ހަމަޖެހިފައި އޮންނަ އުސޫލުގެ ތެރެއިން ޕްރޮފެޝަނަލް ސްޓެންޑަރޑްސް އީމެއިލްއަށް އީމެއިލް ކުރައްވައިގެން މައްސަލަ ހުށަހެޅުމަށް ފުލުހުން ވަނީ އިލްތިމާސް ކޮށްފައެވެ.
މާލެ ސަރަހައްދުގައި ކާފިއު ހިންގަމުން އަންނަނީ ހަވީރު 4:00ން ފަތިހު 4:00އަށެވެ. ނަމަވެސް ދަންވަރު 12ގެ ފަހުން ފުލުހުން ހަރަކާތްތެރި ނުވާކަމަށް ބުނެ ސޯޝަލް މީޑިއާގައި އާންމުން އެކަމުގެ ކަންބޮޑުވުން ފާޅުކުރެއެވެ. ކާފިއު ގަޑީގައި ފުލުހުން މަގުމަތި ބަލަހައްޓަމުން އަންނަ އިރު ދުވާލެއްގެ މައްޗަށް 21،000އާ ގާތްކުރާ އަދަދަކަށް މީހުންނާ ސުވާލު ކުރެވޭ ކަމަށް ފުލުހުން މީގެ ކުރިން ވަނީ ހާމަކޮށްފައެވެ.
