ރާއްޖެއިން ޖުމްލަ 183،373 މީހުން ވެކްސިންގެ ދެ ޑޯޒް ފުރިހަމަކޮށްފައިވާކަމަށް އެޗްޕީއޭގެ ތަފާސްހިސާބުތަކުން ދައްކައިފިއެވެ.

އެޗްޕީއޭއިން ހޯމަދުވަހުގެރޭ އާންމުކުރި ތަފާސްހިސާބުތަކަށް ބަލާއިރު، އާދީއްތަ ދުވަހު މާލެ ސަރަހައްދުން ވެކްސިންގެ ދެ ވަނަ ޑޯޒް ޖެހީ 300 މީހުންނެވެ. އަތޮޅުތެރެއިން 358 މީހުން ދެވަނަ ޑޯޒް ޖަހާފައިވެއެވެ. މިއާއެކު ވެކްސިންގެ ދެ ޑޯޒް ފުރިހަމަކުރި މީހުންގެ އަދަދު ވަނީ 183،373 އަށް އަރާފައެވެ.

އާދީއްތަ ދުވަހު ޖުމްލަ 126 ވެކްސިންގެ ފުރަތަމަ ޑޯޒް ޖަހާފައިވާކަމަށް އެޗްޕީއޭގެ ތަފާސް ހިސާބުތަކުން ދައްކައެވެ. އޭގެތެރޭގައި ހިމެނެނީ މާލެ ސަރަހައްދުން ވެކްސިން ޖެހި 86 މީހުންނާއި، އަތޮޅުތެރެއިން ވެކްސިން ޖެހި 40 މީހުންނެވެ. މިއާއެކު ފުރަތަމަ ޑޯޒްޖެހި މީހުންގެ ޖުމްލަ އަކީ 315،282 އެވެ.

ރާއްޖޭގައި މިހާރު ޖަހަމުން އަންނަނީ ކޮވިޝީލްޑް ވެކްސިނާއި، ފައިޒަރ ވެކްސިން، އަދި ސިނޮފަރމް ވެކްސިނެވެ. މީގެތެރެއިން ކޮވިޝީލްޑް ވެކްސިންގެ ދެވަނަ ޑޯޒް ޖެހުން މާލެ ސަރަހައްދުގައި މެއި މަހުގެ 2 ވަނަ ދުވަހުން ފެށިގެން ވަނީ މެދުކަނޑާލާފައެވެ.

މާލެ ސަރަހައްދުގައި އުމުރުން 18 އަހަރާއި 60 އަހަރާ ދެމެދުގެ މީހުންނަށް ސިނޮފަރމް ވެކްސިންގެ ފުރަތަމަ ޑޯޒާއި ދެވަނަ ޑޯޒް ޖަހަމުން އަންނައިރު، މާލެއާއި ވިލިމާލެ އަދި ހުޅުމާލެ ހިމެނޭހެން 6 ސެންޓަރެއްގައި ވެކްސިން ދިނުން ކުރިއަށްދާއިރު، އަދި ގޭގެއަށް ގޮސްގެން ވެކްސިން ދިނުމަށް 2 މޮބައިލް ޓީމް ހަރަކާތްތެރިވަމުން އަންނަނީ ހަރަކާތްތެރި ވަމުންނެވެ. މީގެއިތުރުން އަތޮޅުތަކުގައި 193 ވެކްސިން ސެންޓަރުން އަންނަނީ ވެކްސިންދެމުންނެވެ.