ޔޫރޯ 2020 - ރަޝިއާ އާއި ޑެންމާކުގެ ކުރިމަތިލުން

ޔޫރޯ 2020 ގެ ގްރޫޕް ބީ ގެ ފަހު މެޗުގައި ރަޝިއާ އާއި ޑެންމާކް ބައްދަލުކުރާއިރު، މި މެޗުން މޮޅުވެ ދެވަނަ ބުރަށް ދިޔުމުގެ ފުރުސަތު ރަޝިއާއަށް އެބައޮތެވެ. ކޯޕަންހޭގަންގެ ޕާކެން ސްޓޭޑިއަމުގައި މި މެޗު ކުޅުމަށް ހަމަޖެހިފައިވާއިރު، މިއީ މުބާރާތުގައި ކުރިއަށް ދިޔުމަށް ރަޝިއާއަށް އެންމެ މުހިންމު އެއް މެޗެވެ.

ރަޝިއާއިން ފުރަތަމަ މެޗުގައި ބެލްޖިއަމް އަތުން 3-0 ގެ ނަތީޖާއަކުން ބަލިވެފައިވާއިރު، ދެވަނަ މެޗުގައި ވަނީ ފިންލެންޑް އަތުން 1-0 ގެ ނަތީޖާއަކުން މޮޅުވެފައެވެ. އަނެއްކޮޅުން ޑެންމާކުން މިހާތަނަށް ކުޅުނު ދެ މެޗުންވެސް ވަނީ ބަލިވެފައެވެ. ފުރަތަމަ މެޗުގައި ފިންލެންޑް އަތުން 1-0 ގެ ނަތީޖާއަކުން ބަލިވިއިރު، ދެވަނަ މެޗުގައި ބެލްޖިއަމް އަތުން ވަނީ 2-1 ގެ ނަތީޖާއަކުން ބަލިވެފައެވެ.

އެއާއެކު ރަޝިއާ އާއި ފިންލެންޑަށް ދެ މެޗުން ތިން ޕޮއިންޓް ލިބިފައިވާއިރު، އެއްވަނައިގައި އޮތް ބެލްޖިއަމަށް ވަނީ ދެ މެޗުން ހަ ޕޮއިންޓް ލިބިފައެވެ.

ޑެންމާކް މެޗުގެ ކުރިން ވާހަކަދައްކަމުން ރަޝިއާގެ ކޯޗު ސްޓަނިސްލާވް ޗެރްޗެޝޯފް ބުނީ މި މެޗުން މޮޅުވެ ދެވަނަ ބުރުން ޖާގަ ހޯދަން ރަޝިއާ އޮތީ ތައްޔާރަށް ކަމަށާއި، އެކަމަކު ޑެންމާކަކީ ބަލިކުރަން އުނދަގޫ ޓީމެއް ކަމަށެވެ. އެގޮތުން ބެލްޖިއަމް މެޗުން ޑެންމާކް ބަލިވެފައިވީ ނަމަވެސް، އެ މެޗުގައި ޑެންމާކުގެ ކުޅުންތެރިންގެ ފަރާތުން ތަފާތު މޮޅު ކުޅުމެއް ފެނިގެންދިޔަ ކަމަށްވެސް ޗެރްޗެޝޯފް ބުންޏެވެ.

ޑެންމާކުގެ ކޯޗު ކެސްޕަ ހިލްމަންޑް ބުނީ އެ ޓީމަށް އަދިވެސް ދެވަނަ ބުރަށް ދިޔުމުގެ ފުރުސަތު އެއްކޮށް ނުގެއްލޭ ކަމަށާއި، އެގޮތުން ކުރިއަށް އޮތް މެޗު ކާމިޔާބުކޮށްގެން ދެވަނަ ބުރަށް ދިޔުމުގެ ހަނި ފުރުސަތެއް އެބައޮތް ކަމަށެވެ. އެހެންކަމުން މި މެޗުން މޮޅުވާން އޭނާގެ ޓީމުން ތައްޔާރަށް ތިބި ކަމަށްވެސް ހިލްމަންޑް ބުންޏެވެ.

ޔޫރޯގެ ގްރޫޕް ބީ ގައި ރަޝިއާ އާއި ޑެންމާކް ބައްދަލުކުރާ މެޗު ފަށާނީ ހޯމަ ދުވަހުގެރޭ ރާއްޖެ ގަޑިން ދަންވަރު 00:00 ގައެވެ.