ކައުންސިލްގެ އެސްޖީ ކަނޑައެޅުމާ ގުޅޭ ގޮތުން ދެ ގާނޫނަކަށް ހުށަހެޅި އިސްލާހު އަނބުރާ ގެންގޮސްފި
21 ޖޫން 2021 | ހޯމަ 07:17ބިލް ހުށަހެޅީ ޕީޖީ ގްރޫޕުގެ ތާއީދާއެކު
އިސްލާހު ހުށައެޅުއްވީ ގެމަނަފުށީ ދާއިރާގެ މެންބަރު އަހުމަދު ސައީދު
ކައުންސިލްގެ އެންމެ އިސް އިދާރީ މުވައްޒަފެއްގެ ގޮތުގައި ކައުންސިލްގެ ސެކްރެޓަރީ ޖެނެރަލްކަމުގެ މަގާމަށް މީހަކު އައްޔަނުކުރާނީ ސިވިލް ސަރވިސް ކޮމިޝަނުން ކަމަށް ކަނޑައަޅައި، ދެ ގާނޫނަކަށް ގެނައި އިސްލާހު އަނބުރާ ގެންގޮސްފިއެވެ.
ދިވެހި ސިވިލް ސަރވިސްގެ ގާނޫނާއި ދިވެހި ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނަށް ގެމަނަފުށީ ދާއިރާގެ މެންބަރު އަހުމަދު ސައީދު ހުށައެޅުއްވި އިސްލާހު މެންބަރު އަނބުރާ ގެންދަަވާފައިވާކަން ހޯމަ ދުވަހުގެ ރައްޔިތުންގެ މަޖިލީހުގެ ޖަަލްސާގައި ރިޔާސަތުން ވަނީ އަންގަވާފައެވެ.
މިކަމާ ގުޅިގެން މެމްބަރު ސައީދު ވިދާޅުވީ އިސްލާހު އަނބުރާ ގެންދަން ނިންމެެވީ ބިލް ހުށަހެޅުމުން ބައެއް މެމްބަރުން އެ ބިލާމެދު ޚިޔާލު ތަފާތުވުމާއި، ސަރުކާރުން ވެސް އެ ބިލާމެދު އެހާ ހިތްހަމަ ނުޖެހޭތީ ކަމަށެވެ. ސައީދު ވިދާޅުވީ ބިލު އަމިއްލަ ގޮތުން ހުށަހެޅި ނަމަވެސް މަޖިލީހަށް ބިލެއް ހުށަހަޅަނީ ޕީޖީގެ މެމްބަރުންގެ ތާއީދާއެކު ކަމަށެވެ. އެެހެންނަމަވެސް ބިލް ހުށަހެޅި ބަހުސް ފެށުމާއެކު، ތާއީދު ކުރެއްވި މެމްބަރުން ވެސް ޚިޔާލު ތަފާތުވުމުން މި ދަނޑިވަޅުގައި ބިލު އަނބުރާ ގެންދެވީ ކަމަށެވެ.
މި އިސްލާހު ހުށަހެޅުމުގެ ބޭނުމަކީ ސިވިލް ސަރވިސްގެ ވަޒީފާތަކަށް ކުރިމަތިލުމުގެ ފުރުސަތު ފާޅުކަން ބޮޑުގޮތެއްގައި ހުޅުވާލުމާއި، އެކަށީގެންވާ ހަމަހަމަ ފުރުސަތު މުޖުތަމައުގެ ހުރިހާ ފަރާތްތަކަށް ވެސް ލިބިދެވޭނެ ނިޒާމެއް ގާއިމުވެފައި އޮޮތުން ކަމަށް މެންބަރުވަނީ ވިދާޅުވެފައެވެ.
މިހާރު އަމަލުކުރަމުން އަންނަ ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުގެ 126 ވަނަ މާއްދާގެ (ހ) ގައި ބުނެފައިވަނީ ކައުންސިލްގެ އެންމެ އިސް އިދާރީ މުވައްޒަފެއްގެ ގޮތުގައި، ކައުންސިލްގެ ލަފަޔާއެކު، ކައުންސިލްގެ ސެކެޓްރީ ޖެނެރަލްކަމުގެ މަގާމަށް މީހަކު އައްޔަންކުރާނީ ސިވިލް ސަރވިސް ކޮމިޝަނުން ކަމަށެވެ.
އަދި މިހާރު އަމަލުކުރަމުން އަންނަ ދިވެހި ސިވިލް ސަރވިސްގެ ގާނޫނުގެ 1-59 ވަނަ މާއްދާގެ (ހ) ގައި ބުނެފައިވަނީ ކައުންސިލްގެ އެންމެ އިސް އިދާރީ މުވައްޒަފެއްގެ ގޮތުގައި ކައުންސިލްގެ ލަފަޔާއެކު، ކައުންސިލްގެ ސެކެޓްރީ ޖެނެރަލްކަމުގެ މަގާމަށް މީހަކު އައްޔަނުކުރާނީ ސިވިލް ސަރވިސް ކޮމިޝަނުން ކަމަށެވެ. ހުށަހަޅާފައިވާ އިސްލާހުގެ ދެ ބިލްގައި ވެސް ވަނީ ކައުންސިލްގެ ލަފަޔާއެކު އޮތް ބައި އުނިކޮށްފައެވެ.
