މަޖިލީހުގެ ރައީސާއި، އުއްތަމަފަނޑިޔާރު ދިރިއުޅުއްވުމަށް ތަނެއް ދައުލަތުން ހަމަޖެއްސުމަށް މަޖިލީހުން ފާސްކޮށްފި
މަޖިލީހުގެ ރައީސް ދިރިއުޅުއްވުމަށް ތަނެއް ދައުލަތުން ހަމަޖެއްސުމަށް ފާސްކޮށްފައިވަނީ 56 މެންބަރުންގެ އިއްތިފާގުން
ފަނޑިޔާރުންގެ ގާނޫނާއި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް ވަކިވަކިން ހުށަހެޅި އިސްލާހު ފާސްކުރުން
ރައްޔިތުންގެ މަޖިލީހުގެ ރައީސާއި އުއްތަމަފަނޑިޔާރު ދިރިއުޅުއްވުމަށް ޚާއްސަ ތަނެއް ދައުލަތުން ހަމަޖައްސައި ދިނުމަށާއި، މަޖިލީހުގެ ރައީސް އަދި އުއްތަމަފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން، މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމަށް ރައްޔިތުންގެ މަޖިލީހުން ފާސްކޮށްފިއެވެ.
ހޯމަ ދުވަހުގެ ޖަލްސާގައި ރައްޔިތުންގެ މަޖިލީހުގެ ރައީސް ދިރިއުޅުއްވުމަށް ތަނެއް ދައުލަތުން ހަމަޖެއްސުމަށް ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިންނެވި 56 މެންބަރުންގެ އިއްތިފާގުންނެވެ. އަދި ހަމަ އެ ޖަލްސާގައި އުއްތަމަފަނޑިޔާރު ދިރިއުޅުއްވުމަށް ތަނެއް ދައުލަތުން ހަމަޖެއްސުމަށް ފާސްކޮށްފައިވަނީ އެކަމަށްޓަކައި ނެގުނު ވޯޓުގައި ބައިވެރިވެވަޑައިންނެވި 56 މެންބަރުންގެ އިއްތިފާގުންނެވެ.
ފަނޑިޔާރުންގެ ގާނޫނާއި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް ވަކިވަކިން އިސްލާހު ހުށަހެޅުއްވާފައިވާއިރު މި ދެ ބިލު ދިރާސާކުރަން މަޖިލީހުގެ ސަލާމަތީ ޚިދުމަތްތަކާބެހޭ ކޮމިޓީން ވަނީ ސަބް ކޮމިޓީއެއް އެކުލަވާލައި މައްސަލަ ދިރާސާކޮށްފައެވެ. ސަބް ކޮމިޓީން ވަނީ އެ ދެ ބިލަށް ބައެއް ކުދިކުދި އިސްލާހުތައް ގެނެސްފައެވެ. އެގޮތުން، އެ ދެ ބިލުގައި ބަޔާން ކޮށްފައިވާ ގެއެއް ހަމަޖައްސައިދޭންވާނެ ކަމަށް ބުނާ އިބާރާތްވަނީ، ގެއެއްގެ ބަދަލުގައި ދިރިއުޅުއްވާނެ ތަނެއް ފޯރުކޮށްދޭންޖެހޭނެ މި ގޮތަށް އިސްލާހުކޮށްފައެވެ.
ސަބް ކޮމިޓީގެ މުގައްރިރު މާފަންނު އުތުރު ދާއިރާގެ މެމްބަރު އިމްތިޔާޒު ފަހުމީ ވިދާޅުވީ، ގެއެއް ކަމަށް ބަޔާންކޮށްފި ނަމަ، ވަކިން ހުންނަންޖެހޭ އިމާރާތެއްގެ ގޮތުގައި ސިފަކުރުމުގެ ފުރުސަތު އޮންނާނެ ކަމަށެވެ. މި ދެބޭފުޅުން ދިރިއުޅުއްވާ ތަނަށް ސެކިއުރިޓީ ހަމަޖައްސަން ޖެހޭނީ އެމްއެންޑީއެފުން ކަމަށް ވެސް އިސްލާހުގައި ވެއެެވެ. ރައްޔިތުންގެ މަޖިލީހުގެ ރައީސް ދިރިއުޅުއްވާ ތަނަށް މުވައްޒަފުން ހަަމަޖައްސަން ޖެހޭނީ ރައްޔިތުންގެ މަޖިލީހުން ކަމަށާއި، އުއްތަމަ ފަނޑިޔާރު ދިރިއުޅުއްވާ ތަނަށް މުވައްޒަފުން ހަމަޖައްސަން ޖެހޭނީ، ސުޕްރީމް ކޯޓުން ކަމަށް ބަޔާން ކޮށްފައިވެއެވެ.
މި ދެބޭފުޅުންގެ އާއިލާގެ ގޮތުގައި ބެލެވޭނީ އެ ބޭފުޅެއްގެ އަނބިކަނބަލުން ނޫނީ ފިރިކަލުންނާއި، މަންމަ އާއި ބައްޕަ އަދި 18 އަހަރު ނުފުރޭ ދަރިންނެވެ. އަށާރަ އަހަރުން މަތީގެ ދަރިންގެ ތެރެއިން ވެސް ކައިވެނިކޮށްގެން ނޫޅޭ ދަރިންނާއި ޚާއްސަ އެހީއަށް ބޭނުންވާ ދަރިން އޭގެ ތެރޭގައި ހިމެނޭނެ ކަމަށް ސަބް ކޮމިޓީން ގެނައި އިސްލާހުގައިވެއެވެ.
ރައްޔިތުންގެ މަޖިލީހުގެ ރައީސް ދިރިއުޅުއްވުމަށްޓަކައި ޚާއްސަކުރެވޭ ވަކި ތަނެއް ދައުލަތުން ހަމަޖައްސައި ދިނުމަށާއި، މަޖިލީހުގެ ރައީސަށް ދޭންޖެހޭ ހިމާޔަތާއި ރައްކާތެރިކަން، މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމަށް ކަނޑައެޅުމަށްޓަކައި ރައްޔިތުންގެ މަޖިލީހުގެ އިމްތިޔާޒުތަކާއި ބާރުތަކުގެ ގާނޫނަށް އިސްލާހު ގެނައުމަށް މި ބިލް ސަރުކާރުގެ ފަރާތުން ހުށަހެޅުއްވީ ފޭދޫ ދާއިރާގެ މެންބަރު މުހައްމަދު ނިހާދެވެ.
އުއްތަމަފަނޑިޔާރު ދިރިއުޅުމަށްޓަކައި ޚާއްސަކުރެވޭ ވަކި ތަނެއް ދައުލަތުން ހަމަޖައްސައި ދިނުމަށާއި އުއްތަމަފަނޑިޔާރަށް ދޭންޖެހޭ ހިމާޔަތާއި ރައްކާތެރިކަން މޯލްޑިވްސް ނޭޝަނަލް ޑިފެންސް ފޯސްއިން ހަމަޖައްސައިދޭންވާނެ ކަމަށް ކަނޑައެޅުމަށްޓަކައި ފަނޑިޔާރުންގެ ގާނޫނަށް އިސްލާހު ގެނައުމުގެ ބިލު ހުށަހެޅުއްވީ މަތިވެރި ދާއިރާގެ މެމްބަރ ހަސަން ޒަރީރެވެ.
