289 މީހަކު ބަލިން ރަނގަޅުވެ، 187 މީހަކު ޕޮޒިޓިވް
20 ޖޫން 2021 | އާދީއްތަ 18:05މާލެއިން ޕޮޒިޓިވްވީ 84 މީހުން
ކޮވިޑް-19އާއި ގުޅިގެން އާރުއާރުޓީން އާންމުން ބައްޔަށް ހޭލުންތެރިކުރުވުމަށް ކުރަމުން ގެންދިޔަ މަސައްކަތުގެ ތެރެއިން
އާދީއްތަ ދުވަހު 289 މީހަކު ބަލިން ރަނގަޅުވެފައިވާއިރު 187 މީހަކު ޕޮޒިޓިވްވެފައިވާ ކަމަށް ހެލްތް ޕްރޮޓެކްޝަން އެޖެންސީ (އެޗްޕީއޭ) އިން ބުނެފިެއެވެ.
ހޮނިހިރު ދުވަހުގެ އިރުއޮއްސި 6:00ން އާދިއްތަ ދުވަހުގެ އިރުއޮއްސި 6:00ށް ނަގާފައިވާ 5،613 ސާމްޕަލްގެ ތެރެއިން ޕޮޒިޓިވްވެފައިވަނީ 187 ސާމްޕަލެވެ. މީގެ ތެރޭގައި ހިމެނެނީ މާލެ ސަރަހައްދުން ޕޮޒިޓިވްވި 84 މީހުންނާއި ރަށްރަށުން ޕޮޒިޓިވްވި 91 މީހުންނެވެ. މީގެ އިތުރުން ރިސޯޓްތަކުން 7 މީހަކު، އަދި ސަފާރީއަކުން 5 މީހަކު ޕޮޒިޓިވްވެގެން ވަނީ ރިޕޯޓްކޮށްފައެވެ.
އާދީއްތަ ދުވަހު ޕޮޒިޓިވްވި 187 ސާމްޕަލާއެކު ރާއްޖެއިން މިހާތަނަށް ޖުމްލަ 71،896 މީހުން ވަނީ ބައްޔަށް ޕޮޒިޓިވްވެފައެވެ. އެކްޓިވް ކޭސްތަކުގެ އަދަދު ވަނީ 5300ށް ދަށްވެފައެވެ. އަދި މީގެ ތެރެއިން 45 މީހަކަށް ފަރުވާދެމުން އަންނަނީ ހޮސްޕިޓަލްތަކާއި ފެސިލިޓީތަކުގައި އެޑްމިޓްކޮށްގެންނެވެ. އަދި 206 މީހަކު މި ބަލީގައި ރާއްޖެއިން ނިޔާވެފައިވެއެވެ.
އާދިއްތަ ދުވަހު ބަލިން ރަނގަޅުވި 289 މީހުންނާއެކު، ރާއްޖެއިން މި ބަލިން ރަނގަޅުވި މީހުންގެ އަދަދު ވަނީ 66،379ށް އަރާފައެވެ.
އެޕްރީލް މަހުގެ ފަހުކޮޅުން ފެށިގެން މެއި މަހާ ހަމައަށް ރާއްޖެއިން ފެނުނު ކޭސްތަކުގެ އަދަދު 1000ން މަތިން ރިޕޯޓް ކުރިއެވެ. އަދި ކޮވިޑްގެ ކޭސްތައް އިތުރުވެފައިވަނީ ދުނިޔޭގައި ހަލުވިކަމާއެކު ފެތުރެމުން އަންނަ ވޭރިއެންޓްތައް ރާއްޖޭގައިވެސް ފެތުރެން ފެށުމާއެކުއެވެ.
ރާއްޖޭގައި ކޮވިޑްގެ ވޭރިއަންޓް އުޅެނީ ކިހާ މިންވަރަކަށްތޯ ދެނެގަތުމަށް، ރާއްޖެއިން ބޭރަށް ފޮނުވި 30 ސާމްޕަލްގެ ނަތީޖާ ލިބިފައިވާއިރު ނުރައްކާތެރި ދެ ވޭރިއަންޓްކަމުގައިވާ، އިންޑިޔާއިން ފެނިފައިވާ ޑެލްޓާ ވޭރިއަންޓްއާއި އިނގިރޭސިވިލާތުން ފެނިފައިވާ އަލްފާ ވޭރިއަންޓްގެ 47 އިންސައްތަ ކޭސް ހިމެނެއެވެ.
ހެލްތު އެމަރޖެންސީ އޮޕަރޭޝަން ސެންޓަރ (އެޗްއީއޯސީ)ގެ ތަރުޖަމާން ޑރ ނަޒްލާ ރަފީޤް ވިދާޅުވީ ރާއްޖޭގެ ބައެއް ސާމްޕަލްތައް ސީކުއަންސަށް ތިން ފަހަރެއްގެ މަތިން ފޮނުވާފައިވާކަމަށެވެ. އޭގެތެރެއިން ތިން ވަނަ ފަހަރު ފޮނުވި ސާމްޕަލްތަކުގެ ނަތީޖާ މިހާރު ލިބިފައިވާ ކަމަށް ނަޒްލާ ވިދާޅުވިއެވެ. މިއިން ކޮންމެ ފަހަރެއްގައިވެސް ފޮނުވާފައިވަނީ 30 ސާމްޕަލްއެވެ.
ސާމްޕަލްތަކުގެ ނަތީޖާ ދައްކާގޮތުން 20 އިންސައްތަ އަކީ އަލްފާ ވޭރިއަންޓެވެ. މިއީ މިދިޔަ އަހަރުގެ ޑިސެމްބަރ މަހު އިނގިރޭސިވިލާތުން ފެނުނު ވޭރިއަންޓެވެ. އަދި އިންޑިޔާގައި ހަލުވި ކަމާއެކު ފެތުރެމުން އަންނަ ޑެލްޓާ ވޭރިއަންޓްގެ 27 އިންސައްތަވެސް ވަނީ ފެނިފައެވެ.
