މޯޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) އަށް 2020 ވަނަ އަހަރު ލިބުނު ފައިދާއިން ހިއްސާއަކަށް ތިން ރުފިޔާ ބަހަން ފާސްކޮށްފިއެވެ.

ފާއިތުވި އަހަރު އެމްޓީސީސީ އަށް ލިބުނު ފައިދާއިން ހިއްސާއަކަށް ތިން ރުފިޔާ ބަހަން ފާސްކޮށްފައި ވަނީ ޖޫން 20 ވަނަ ދުވަހު، އެމްޓީސީސީ އިން އޮންލައިން ކޮށް ކުރިއަށް ގެންދިޔަ 2020 ވަނަ އަހަރުގެ އަހަރީ އާންމު ޖަލްސާގައި ބައިވެރިވި 37 ހިއްސާދާރުންގެ ތެރެއިން ވޯޓްގައި ބައިވެރިވި 31 ހިއްސާދާރުންގެ 86 އިންސައްތަ ވޯޓާއެކުއެވެ. 2020 ވަނަ އަހަރުގެ ހިއްސާ ލިބެނީ 2021 ވަނަ އަހަރުގެ މެއި 21 ގެ ނިޔަލަށް އެމްޓީސީސީގެ ހިއްސާދާރުންގެ ގޮތުގައި ރަޖިސްޓްރީކޮށްފައިވާ ފަރާތްތަކަށެވެ. 2019 ވަނަ އަހަރު އެމްޓީސީސީން ހިއްސާގެ ފައިދާގެ ގޮތުގައި ބަހާފައި ވަނީ ހިއްސާއަކަށް ދެ ރުފިޔާއެވެ.

މި ޖަލްސާގައި 2020 ވަނަ އަހަރުގެ ސެޕްޓެމްބަރ 27 ވަނަ ދުވަހު ބާއްވާފައިވާ 2019 ވަނަ އަހަރުގެ އަހަރީ އާންމު ޖަލްސާގެ ޔައުމިއްޔާ ފާސްކޮށްފައިވާއިރު، ޔައުމިއްޔާ ފާސްކޮށްފައި ވަނީ ވޯޓްގައި ބައިވެރިވި 29 ހިއްސާދާރުންގެ ވޯޓާ އެކުއެވެ. އަދި 2020 ވަނަ އަހަރުގެ އޮޑިޓްކޮށްފައިވާ މާލީ ހިސާބުތަކާއި އޮޑިޓަރުންގެ ރިޕޯޓު 35 ހިއްސާދާރުންގެ ވޯޓާއެކު ފާސްކޮށްފައިވާއިރު، 2020 ވަނަ އަހަރުގެ ކުންފުނީގެ ޑިރެކްޓަރުންގެ ރިޕޯޓު ފާސްކޮށްފައި ވަނީވެސް 35 ހިއްސާދާރުންގެ ވޯޓާއެކުއެވެ.

މީގެ އިތުރުން މި ޖަލްސާގައި ވަނީ 2021 ވަނަ އަހަރަށް އެމްޓީސީސީގެ އޮޑިޓަރުން އައްޔަންކޮށް، އޮޑިޓަރުންގެ އުޖޫރަ ކަނޑައަޅާފައެވެ. އެގޮތުން އުޖޫރައިގެ ގޮތުގައި 385,500 ރުފިޔާ ދީގެން 2021 ވަނަ އަހަރުގެ އޮޑިޓަރުންގެ ގޮތުގައި ޕްރައިޒް ވޯޓަރ ހައުސް ކޫޕަރސް އައްޔަނުކުރުމަށް 30 ހިއްސާދާރުންގެ ވޯޓާ އެކު ވަނީ ފާސްކޮށްފައެވެ. މި ޖަލްސާގައި ވަނީ އެމްޓީސީސީގެ ޑިރެކްޓަރުންގެ ބޯޑަށް އައްޔަނުކުރެވިފައިވާ އަދި އިންތިޚާބުކުރެވިފައިވާ ހިއްސާދާރުން ވަނީ އިއުލާންކޮށްފައެވެ.

އެމްޓީސީސީގެ 2020 ވަނަ އަހަރުގެ އަހަރީ އާންމު ޖަލްސާ ފަހިވޯޓް މެދުވެރިކޮށް، އޮންލައިންކޮށް ކުރިއަށް ގެންގޮސްފައިވާއިރު، މި ޖަލްސާގައި ޖުމްލަ 37 ހިއްސާދާރުން ވަނީ ބައިވެރިވެފައެވެ. އެއީ އަމިއްލަ ގޮތުން ބައިވެރިވި 30 ހިއްސާދާރުންނާއި ޕްރޮކްސީކޮށް ބައިވެރިވި 7 ހިއްސާދާރުންނެވެ.